Read Southern Rengma Naga EZEKIEL 21 Bible Online

EZEKIEL 21 - Southern Rengma Naga bible

EZEKIEL 21

¹Npugü le aka zo,

²“Silakehü temi gü, Jerusalem nkhin shü. Temi dan le rüshvu kehü bin dan nkhin shülo. Israel nyu kazü zen shüo

³Npugü ahigü le zobin letse shülo: Ale hagun kenrhinyu. Ale azhethon gü sütho-o hagun kegwa lo gwakemvu nyu metse aphu dushvu lati.

⁴Ale tesoki gü tesin keti azhethon gü sen-o nmeme tse nren ti.

⁵Temi aphu Npugü ahigü le azhethon sütho loso lope bin la loho letse shati.

⁶“Silakehü temi gü, n shekese nyu nnyun le kobin kela hontse nralo. Temi aphu no n hyulo kegwa bin nyu nyunkenjün thyüo nralo.

⁷Anyugun le nle nyugenyu nra bin yotse shünlo, jolo ryükejü gü genyu letse zoshü. Tsü le ryülo kenshvu le anyugun nyun sü lati, anyugun ben le nshela, kepeche ndila, lo anyugun kho le kvumvu lati. Gwünkho gü le ryü laso; tsü le hinyu bin.” Aphu sokekvu Npugü le zo laso.

⁸Npugü le aka zo,

⁹“Silakehü temi gü, sidyüjo zolo. Npugü ahigü le zokebin pe temi dan ka zolo: Zhethon nme, zhethon nme yi thyü lo shon nshwen laso.

¹⁰Tsüle me dushvu nrün genyu a-yi thyü lola, tsangkechwü hontse kerü nrün genyu shon nshwen la. Nkenyü loho, atemi dan le ketsun keshü lo shaja aphu sümvu kela genyu.

¹¹Zhethon shon nshwen bin, tsü senlo kegwa thyü nrün genyu. Tsü le a-yi thyüo shon nshwen laso, pe me dukeshvu nyu ben nyu shüla nrün genyu.

¹²Silakehü temi gü, nyunkenjün thyüo chülo; zhethon higü le atemi dan genyu lo Israel sharhi aphu genyu. Anyugun dushvu gü jü laso atemi a-sen aphu kesin-o. N shese-o nnyun jenlo!

¹³Ale atemi dan kegwakeshvu shwi bin nyo, lo anyugun le nyunkelu nyü mvu yatselo, hidan aphu anyugun ge thyüti.

¹⁴“Tsügenyu silakehü temi gü, sidyüjo zolo. Nben kekhülo, tsonlo zhethon gü le du lo du niti. Tsü le dushvu kehü zhethon gü, me kerüla kehü lo dushvukehü zhethon.

¹⁵Tsü le atemi dan thyü pe kepeche ndi lo pha nsüla hü. Ale zhethon nme tsangkechwü hontse kerülo me dushvu titse nda bin kehü lope anyugun nyida gü kedün bin.

¹⁶Zhethon yi kegwa gü, tegwa lo tejü du lo! Nle lihizin rani güe me du lolo.

¹⁷Ako aben kekhü ti, tson-o anyunkenta le ndi lati. Npugü ahigü le zo laso.”

¹⁸Npugü le aka zo,

¹⁹“Silakehü temi gü, Babilon raja gü le a-zhethon sen-o ryü lo kegwa tson shahvu kejülo. Tsühvu nren tsipwen tsü gü nyu binzen ti. Tsoncho nyu shalo kegwa zensü pe shü.

²⁰N mele raja gü no Amon nyu nyida Rabbah nyu kegü tson tsin shü, lo kecha gü le Juda chwida kenko nyida, Jerusalem ki kegü tson tsin shüti.

²¹Babilon raja gü le tsoncho nyu zensü thyü kenjü khoka bin loti. A-le gü nrün tson gü shalo nrün genyu tsontsin henshwio a-teromen dan ka shün; a-le nyukhu pe rüshvu kela thyüsen nri.

²²A-ben tejüzin penso ‘Jerusalem,’ tsin shü kebin gü tezen lo! Tsü gü le a-no güo chwida vüren nrün dyüshwen penso, teri khwen thyülo, chwida vüren nrün dyüshwen gü tsü pe khinrun dan ka shülo, nnyon khü lo kü tso, tson nrün genyu a-ka zo.

²³Jerusalem temi dan le higü tenyen kemvui, anyugun le gwatho kenjü gü genyu. Ai ryü nrün zo kenjü higü le anyugun no anyugun kemu dan shanilo, lo anyugun lolo la ma kebin shao-petsü binlo nrün genyu.

²⁴Tsügenyu higü hile Aphu sokekvu Npugü ahigü le zokebin gü tsü le. Hagun kemu le ndo laso. Temi aphu hagun le dihontse thyüzü la yo shabin. Hagun tho aphu nyu hagun kemu pe me hi hü. Hagun le nmu kela nyu bin laso, lo ale hagun khipe hagun kenrhinyu tsü lati.

²⁵“Serikemvu gü, Israel sokeda nshünkemvu gü, ngwünkho nshaja jon kenkhin gü le ryüjü so.

²⁶Aphu sokekvu Npugü ahigü le zo laso. N rajaperün lo npekejwe khila lo. Thame ka-e kenme thyüni loho. Lihi kemvu nyu no kekvu senlo! Kekvu senkebin nyu süshela!

²⁷Kenke! Kenke! Ele, ale nyida gü no nke lati. Ai ale kejülo-o shaja pe nyida gü tsü titse kebin gü le ryü kemvu ka tsü thyü loho. A-le ryülo ale pe tsü ti!

²⁸“Silakehü temi gü, sidyüjo zolo. Aphu sokekvu Npugü le Israel nyu nshwen kehü Amon nyu ka zokebin higü pe teshalo. Anyugun ka zolo: ‘Zhethon nme le tha nke titse nda bin; dushvu titse shon nshwen la, tsangkechwü hontse kerü nrün genyu.

²⁹Nle tsemin ki kehyu tsü le ketsin kemvu, lo nle ryü kejü rüla kezo dan tsüe kenku. Hagun le serimvu lo gwamvuri lo hagun jon le ryüjü laso, tsü le shaja kenkhin gü jon, zhethon gü tsü le hagun gunda du gü zhü laso.

³⁰“ ‘Zhethon gü pe bin la! Ale hagun nyhun keshü bin gü, hagun nnyun kelo kazü nyu hagun jünkera ti.

³¹Ale anyunkenta mah kenyü hontse hope hagun ge keshü ka hagun le tsü shati. Lo ale hagun khipe rigwakemvu temi dan lo tha nkesa kehü dan ben nyu shü lati.

³²Mah pe hagun nke lati. Hagun zi le hagun kazü nyu tsun ti, lo temi nme-e hagun rüchün ni loho.’ ” Npugü le zo laso.