Read Southern Rengma Naga EZEKIEL 22 Bible Online

EZEKIEL 22 - Southern Rengma Naga bible

EZEKIEL 22

¹Npugü le aka zo.

²“Silakehü temi gü, nle temi dukeshvu nyu le sükebin nyida gü jünkera nrün genyu nda bin le? Tsügi le thyü kela kentsükenchen tho aphu thyü nshün shü.

³Aphu sokekvu Npugü ahigü le zokebin hi lope nyida gü ka zolo: Nle n npvü ntemi chonritsin dushvula lo teromen rüshvuo nbo nrhu kela genyu ngwünkho le ryüjü.

⁴Nle dukeshvu genyu thyüzü la lo nle teromen kethyü nyu n nrhula, tsügenyu ngwünkho le ryüjü, ngwünkho le pen laso! Tsü hontse kethyü genyu ale senye dan no nshwinyü lo tsipwen aphu no ntsin laso.

⁵Nkhoka lo nithen ki tsipwen dan le nle tejvü zen kemvu genyu ntsin laso.

⁶Israel nyu sharhi aphu anyugun npvü anyugun kekvu tenyen-o temi dukeshvu tho thyü.

⁷Nyida gü nyu temi nme-e a-pepvünyu rühvu hümvu. Hagun le sinrünyi nyu, maginyu, lo tegonyu nshwen.

⁸Hagun le kenshün bin dan rühvu mvu, lo Sabbath zen mvu.

⁹Hagun temi peha le me boshvu nyüo me zo nshvu hü. Anyugun peha le teromen rüshvu kela hon tyü. Temi peha le a-zintse a-kenyü yhüdyü thyüo a-kenyü bin hü.

¹⁰Anyugun peha le anyugun pvü nu zen zhü. Peha le tenunyu dan le tenunyu jvü thyü ketse ka-e anyugun kemvu thyüo zenzhü.

¹¹Peha le keyüla, lo peha le anyugun mo nyu nmvue anyugun lüginyu sü hü.

¹²Hagun temi peha le a-chün khilo nrün genyu me dushvu hü. Peha le tha pe a-pfünyu Israel nyu tepuo kechwi lo, lo anyugun ka hyukelo tsü sen-o nnya lohü. Anyugun le a nmhin laso.” Aphu sokekvu Npugü le zo laso.

¹³“Ale a jenthun sen-o hagun le me hon seükelo lo me dushvu kethyü genyu tsü ryü ti.

¹⁴Hagun le ale hagun ge thathyü keryü ka peche lo nko-o hagun ben süso logwa letse rüchün hü le? Npugü a higü le zo laso lo ale a jo then ti.

¹⁵Ale hagun hü kezen pe tsipwen lo senye aphu ka shüo hagun tho gwakemvu dan tsü no a-keni thyü lati.

¹⁶Tson-o senye kecha dan no hagun rühvu mvu lati, ai hagun le ale Npugü le tse sha ti.”

¹⁷Npugü le aka zo,

¹⁸“Silakehü temi gü, Israel nyu le amhundyü ka thakon mvuso. Anyugun le tegi gwakemvu -tamagi, tin, tegi lo rakagi pe mah nyu rokenshün kethyü vü hontse.

¹⁹Tsügenyu Aphu sokekvu Npugü ahigü le anyugun le tsü hontse thakon kendi letse zobin nyo. Ale anyugun aphu zen ryüo Jerusalem ka kequen lati

²⁰rakagi ketegi, tamagi, tegi, lo gin, lo tin lo pe ro kenshün kehü mah nyu shüla kehü hontse. Mah le rakagi lo tegi ro zunla kehü hontse anyunkenta le anyugun rozun lati.

²¹Ele, ale anyugun zenryüo Jerusalem nyu kequen shü, mah thyü pe anyugun hensin shü, lo anyunkenta pe anyugun rozun lati.

²²Rakagi le mah keyün nyu zunla kehü hontse anyugun le Jerusalem nyu zun lati, tsüselo anyugun le Npugü nyunkenta kesülo bin nle tse shati.”

²³Npugü le aka zoni,

²⁴“Silakehü temi gü, Israel nyu ka anyugun kazü le nshün mvu laso, tsügenyu ale anyunkenta nyu shaja pe anyugun tsü bin nle tse zoshülo.

²⁵Anyugun sharhi dan le shünyho le nyukhu tenlo-o nho kebin hontse. Anyugun le temi dan boshvula, pisa lo kenya aphu anyugun le khilo kegwathen khilo, lo anyugun le me dukeshvu nyu temi kechon no magi la.

²⁶Püshükedanyu dan le atejvü gwünrho lo kenshün rühvu mvu. Anyugun le nyu le nshün lo nyu le nshün mvu yo shakekho mvu. Anyugun le kenshün lo nshünkemvu le dihontse kecha thyü yo pe senthyü hümvu, lo anyugun Sabbath rüchün mvu. Tsü dan genyu Israel temi le akerühvu ndi.

²⁷Sorkari kipon kedanyu le teken le nyukhu tenkelo sürhen kela hontse. Anyugun le nnyalo nrün genyu me boshvu hü.

²⁸Sidyükeshanyu dan le me le kechon pe kabon nyen kela hontse kemu hidan kebu hü nyo. Anyugun le ketsin kemvu tsemin hyu lo ryü kezhü kenrun zohü. Anyugun le Aphu sokekvu Npugü jo letse zobin hü, ai Npugü a higü le anyugun ka zoshü mvu.

²⁹Kenyanyu le me sa lo rühu hü. Anyugun le kendinyu nshwen lo sinrünyi nyu dan ge kechwi fü hü.

³⁰Ale temi peha no chwida khwen, lo chwida nla kela bin dan ka so-o anyunkenta le tsü nkela titse keso ka kazü gü rikhun kelo min fü, ai ale nme-e hyulo mvu.

³¹Tsügenyu ale anyunkenta hoshü, tson-o anyugun tho genyu anyugun nke lati.” Aphu sokekvu Npugü le zo laso.