Read Southern Rengma Naga EZEKIEL 23 Bible Online

EZEKIEL 23 - Southern Rengma Naga bible

EZEKIEL 23

²“Silakehü temi gü, gwüngwa tenunyu tsasikezen mihvu le bin hü.

³Au le lübwenyu thyüo Ijipt nyu yhun kehü ka yhun nshün mvu, keyüla chün ketyü nyu thyü tinla.

⁴Peshügi zan le Oholah (tsügi le Samaria sunka), lo nchegi le Oholibah (tsügi le Jerusalem sunka.) Ale au lolo, lo au le nyu zen pe atsü.

⁵Oholah le ahon, ai a-le keyüla chünketyü nyu thyü tinla, lo Assiria kipon a-sonyu dan zen thyümi kenyü thyünyü sahü.

⁶Tsü dan le phinya kemeren keben shüpahü nyu, kemeren keben kegwanyu lo kedanyu, tsü dan aphu zegwasa sa lo keru kezen nyu.

⁷Tsügi le Assiria kedanyu aphu zenkeso hü, lo a-kenyü yhüdyü dan le a-zen-o Assiria nyu teromen kezü rüshvuo a-nrhu la.

⁸A-le Ijipt nyu keyüla chünketyü nyu thyüso kela tho gü khemvu. A-le lü soryü ntsin pechenyu le a-zenzhü lo a-lope keyülachünketyü nyu nme hontse hü.

⁹Tsügenyu ale a-khipe Assiria nyu a-sonyu, a-le nnyüsa kehü dan tsüla.

¹⁰Tsü dan le a-phinya rholao a-nyu peche lo tenue tenlo-o zhethon lope a-dushvula. Tenunyu le lihikie a-rüla kerabin hü.

¹¹“A-sikezengi Oholibah le tsü hyue Oholah nyeki gwamvu lo keyüla tho thyü kvu.

¹²A-ko Assiria nyu kegwanyu lo kedanyu nnyüri tsin- tsü dan le ben kethyü phinya kenme kepvünyu, kedanyu, keru kezen nyu, tsü dan aphu selo zegwasa kethyü nti.

¹³A-le serimvusa kela ale hyu, a-zikezengi-e a-tsa gwakemvu hontse.

¹⁴“Ale a-serikemvu nyu ntsun ketsintsin yüla. A-le Babilon kedanyu, phi pe anyugun senphin lo anyugun perün thyüo pvü kehü dan me pe kabon ge hen-o thazü nhonben kethyü pe nyen kenjü tsü a-kenyü sala.

¹⁵

¹⁶A-le tsü hyushü ntsin nnyü ritsin lao lilonyu nipe Babilon nyu tsü dan kishü.

¹⁷Babilon le a-zenzhü titse ryüla. Anyugun le a-zengwa lo a-nrhu salao kenkhin ki we a-le anyugun shwintsü lola.

¹⁸A-le a-khipe temi mhundyünyu ndo-o aphu no a-le keyüla chünketyü nyu letse shalo. Ale a-tsagi shwintsü kela hontse a-ko a-ntsüla.

¹⁹A-le lünyu ka Ijipt nyu keyüla kethyü hontse keyüla chünketyü tho thyüketsin sola.

²⁰A-le serimvu pe gada nmvue keru cho hontse kethyü nnyü ritsin lola.”

²¹(Oholibah, nle nlü ka Ijipt nyu pechenyu no nnyüsü lo nphusen keyhun nrhu lao mu kehü tho tsü thyüni nyü hü nyo.)

²²“Tsügenyu, Oholibah, higi hile Aphu sokekvu Npugü ahigü la nka zobin nle. Nle nsonyu genyu nnyun tsemin laso, ai ale anyugun thyü pe nge nyunta lo tsü dan zenryüo nhun loti.

²³Ale Babilon nyu, Chaldeanyu, Pekod, Shoa, Koa lo Assiria kipon temi aphu zenryü ti. Ale selo kezegwa, kegwa nyu lo kedanyu, keda zen kechwi dan lo keru kezen shüpahü kedanyu aphu kequen loti.

²⁴Anyugun le teso kipon rihü danda, kerugari lo kanyü kepvü gari tse zenryüo nwhen ti. Anyugun le gida lo perün pvüo nhun ti. Ale nkhipe tsü dan ben nyu shü lati lo anyugun le anyugun tejvü nyu njo kerati.

²⁵Ale nge anyunta kebin genyu, ale anyugun no nyunkenta pe hagun ge shüti. Tsü dan le nhikon lo nnyetin rülao nnyenyu boshvu ti. E, anyugun le nnyu peche lo tenu tenlo-o anyugun kerhün roti.

²⁶Tsü dan le nphinya sürhen lo kontyü minketsen khilo lati.

²⁷Ale nno nkenyü yhüdyü lo Ijipt ki nshün kemvu thyü gun keryü gü thyü mvu lati. Lo teromen kezü nrimvu nmvue Ijipt rüchün nimvu lati.”

²⁸Higü hile Aphu sokekvu Npugü le zo, “Ale nkhipe ntsü lo shwi nyuntsemin kela nyu ben nyushü lati.

²⁹Lo anyugun le n ntsü kehü genyu nle thyü kenjü aphu sentin lao n kenyhün khi pe keyüla chünketyü nyu hontse ndo lati. N yhüdyükenyü lo nkeyüla chünketyü

³⁰higü hi senryüo n ge shü laso. Nle senye dan genyu keyüla chünketyü nyu thyü lo anyugun teromen kezü pe nthyü nrhu laso.

³¹Nle ntsagi phanyu then gü laso, tsügenyu ale shaja honpen kenme kethyü pe hai no tsüti.”

³²Aphu sokekvu Npugü le zo, “Nle ntsagi honpen ka tsüti; tsü le gon lo tetso. Temi aphu nshwinyüo nnshwen ti; honpen gü le sü laso.

³³Tsü le nthyü pe nyungwamvu lo nyun kenjün kethyü nyu shüti, kenshvu lo kenke honpen gü tsü le tsü le ntsagi Samaria honpen.

³⁴Nle tsü tsü lo keyhü nsin lati, lo honpen gü bokekho dan tsü le n nyü hvu rhen lati. Aphu sokekvu Npugü a higü le zo laso.”

³⁵Hile Aphu sokekvu Npugü le zobin nyo: “Nle a nmhinlao akipon rani tinkela genyu, nle nkenyü yhüdyü lo nkeyüla chünketyü genyu kenjün thyüti.”

³⁶Npugü le aka zo, “Silakehü temi gü, nle Oholah lo Oholibah au jünkera nrün nda bin le? Au le kentsükenchen tho kethyü genyu nkhin shülo.

³⁷Au le keyüla lo dukeshvu tho thyü laso- teromen kezü tho zen-o keyüla lo au le nnyu pe aketsü pechenyu dan dukeshvu genyu. Au le anyu dan lope au teromen kezü rüshvula.

³⁸Au tho aphu le tsü nti mvu. Au le a Kershvuka nrhu lo ale binzen keshü Sabbath tsüe gwünrhola.

³⁹Au le anyenyu boshvu pe teromen kezü rüshvu kethyü nyü tsü a Kershvuka nyu ryü lo tsü nrhula!

⁴⁰“Au le nithen ki temi no ryü lotse jolo nipe tsüni ni, lo temi le ryü. Tsasikezengi hvu le züluo yhütyü kenyen-i pe nyen lo ronye thyü.

⁴¹Au le no gwasa kethyü ge dun, lo au mhundyü ka miz pe shüo phi kegwa pe la, lo pe tharünkenyi lo oliv terzü ale pe au tsü keshüe pe sin.

⁴²Nyunkhi kemvu temi dan me khwen nyü logwa, tsü dan le kazükesi kipon zenryü. Tsü dan le benkhin pe tenugi hvu npvü lo rajaperün gwasa kethyü pe au pe ge shü.

⁴³Lo a npvü a nthon-o anyugun le tenu nme keyüla genyu a-boren kela lope keyüla chünketyünyu hontse zenbin letse bin.

⁴⁴Anyugun le keyüla chünketyü hvu ka kegü si günini. Anyugun le tenunyu serikemvu hvu Oholah lo Oholibah ki nigü.

⁴⁵Kentsen nyu we au le keyüla tho thyü lo me bokeshvu genyu au nmu lati, kechamvule au le keyüla tho thyü lo au ben le tezi pe nyen pvü bin.”

⁴⁶Hile Aphu sokekvu Npugü le zo, “Temi dan me zenryüo au thyü kecha lo nke lalo.

⁴⁷Danda gü no tso lope au jon lo zhethon sen-o au when, au nyenyu boshvu lo au ka ro lalo.

⁴⁸Ale kazü tsü gü aphu nyu temi jvü gwakemvu dan khin lati tenunyu aphu no a-keyüla tha hontse thyü mvula nrün genyu.

⁴⁹Lo tsasikezengi hvu- ale hai jvü gwakemvu lo teromen kezü rüshvu kela kemu dan genyu shaja pe hai tsü ti. Tsüsiki hai le ale Aphu sokekvu Npugü le tse sha loti.”