Read Southern Rengma Naga EZEKIEL 24 Bible Online

EZEKIEL 24 - Southern Rengma Naga bible

EZEKIEL 24

¹Agun le me kazü ki bin tinkela chen tekü gü shye tseryü gü jonryü nyü Npugü le aka zo,

²“Silakehü temi gü, nthu jon higü thulo, kechamvule nthu hile Babilon raja le Jerusalem hunlo titse binzen bin.

³Atemi me ntsun kehü dan ka Aphu sokekvu Npugü ahigü le anyugun genyu jokejvü sen kehü higü pe zoshülo: La gü lope mah sa su shü tson-o zü pe tsü sülo.

⁴Thyüsi kegwatsin, a-pha a-bu lo pe shü a-ru kegwa thyüsi pe sülo.

⁵Tanyü phu kegwatsin thyü senlo; tesen pe la gü hensin khwenlo. Zü no njwa lo; a-ru lo a-tsi dan bülo.”

⁶Higü hile Aphu sokekvu Npugü le zobin: “Temi dushvukehü dan nyida gü we thyülo tiso! Tsü le kesü hü kemvu la hontse le. Thyüsi nmeme tse khitholo laso, lo nme-e nsen mvu.

⁷Nyida gü nyu me dukeshvu le bin hü, ai tezi lope kazü ge tsun shüo kemphü no henlo kegwa thyü mvuo tsonye ge shü.

⁸Kebulo keho nyunkenta khünlo nrün genyu ale tezi pe tsünyu khe njü nyo.”

⁹Higü hile Aphu sokekvu Npugü le zobin: “Temi dushvukehü dan nyida gü we thyülo tiso! Ale kezeü sen pe khwen shüti.

¹⁰tesen pvüni ryülo! Whün nnyü shü! Thyü tsü nilo! A-kenjwa dan tsüno chwila! A-ru dan no keküla!

¹¹Tson-o lazo pe kethyü la gü lope mah gi ge su shüo no ro nhon lo.Tsüsika mvukegwün ro nne lalo la gü le nshün ni loti,

¹²Mvukegwün aphu la tsü gü nyu mah kenyü ka chwila loha yatse-e.

¹³Jerusalem, nserikemvu jvü nshün kemvu le nthyü nrhu laso. ale nthyü kenshün la nyüe nle rhubin gwünzin. Nle anyunkenta kekvu aphu shala kemvuka we nshün ni loho.

¹⁴Aphu sokekvu Npugü ahi le zo laso. Ale thathyü nrün gwünkho le ryü laso. Ale nkemu rüchün mvula nmvue n njün nmvue nshwi njün shülo kemvui so. NLe thyükeshü tho gü genyu shaja thyü ti.” Aphu sokekvu Npugü le zo laso.

¹⁵Npugü le aka zo,

¹⁶“Silakehü temi gü, ale gwüngwa thyü nle sotsin kehü temi gü vüo sentin lati. NLe kenya, chü, nmvue nyhüphu che nya.

¹⁷Nkenso khwen me no nyü nya. Nle chekechü kenjün kethyü zensü npe hen mvu nmvue npha nchon gü nya. Nle nmhun sun nmvue kesi chekechü nyu chvü tyü nya.”

¹⁸Ale tsü lonyü temi dan zen-o kenthon bin. Tsüje anu le sila, lo tsü sinyü a-le aka zokeshü hontse thyü.

¹⁹Temi dan le aka shün, “Nle nyuthyüo tson bin la?”

²⁰Tsügenyu ale anyugun ka zo, “Npugü le a nthon-o ano,

²¹jolo higü pe hagun Israel nyu tsü lotse zo: Hagun le Kershvuka gü genyu ketekho hü. Hagun le tsü nri lo tsü ki gü nyü hü, ai Npugü le tsü nrhu lati. Lo hagun kami dan nyu nchenyu khepe Jerusalem nyu bin kenjü dan teri le ga lati.

²²Tsüsiki hagun le ale thyü kela tsü thyü ti. Hagun le hagun mhun sun nmvue kesi chekechü nyu le tyü kehü chvü tyü mvu lati.

²³Hagun le pe henpvü, phaje pvü lo chechü nmvue nra mvuo gü lati. Hagun kemu genyu hagun nke lati, lo khinyunyu ka nyun kenjün thyü ti.

²⁴Lo ale hagun genyu zensü nme thyü ti; hagun ale thyükeshü aphu thyü ti. Npugü ale kezo le tha higü kethyü ka hagun le a-le Kekvutsin Npugü le tse sha loti.”

²⁵Npugü le zo, “Silakehü temi gü, ale anyugun le ketekho lo kenyü kehü Kershvuka kenko gü, anyugun le nri lo günyü kehü gü tsü sentin lati. Lo ale anyugun nyenyu peche lo tenu zentin lati.

²⁶Ale tsü thyü keshü nyü kenke tsü gü nrhikelo nyu peha le ryüo tsü rüla pe hagun ka zoti.

²⁷Tsü jon nyü hagun le jo kekvu nmhenkela gü hyuni loti, lo hagun le a-zen-o kenthon ti. Hihontse hagun le temi dan genyu zensü thyüti, lo anyugun le ale Npugü le tse sha loti.”