Read Southern Rengma Naga EZEKIEL 25 Bible Online

EZEKIEL 25 - Southern Rengma Naga bible

EZEKIEL 25

¹Npugü le a nthon.

²“Silakehü temi gü, Ammon nyunkhin shülo.

³Ale Kekvutsin Npugü, ale zokebin hi lope anyugun ka zolo: Hagun le a Kershvuka bo nrhu kela, Israel kazü nkekela lo Juda temi le me kazü ki tinkela nri nyü hü.

⁴Hagun le hagun kenyü kela genyu npho kipon kazü kesi ki tsipwen dan no hagun sokvulo lati. Tsü dan le hagun kazü nyu kensenbin thyüo tsü nyu bin ti. Anyugun le hagun hon thyü nrün terasha tyü lo nyüzü tsü ti.

⁵Ale Rabbah nyida lope Ut kenkin bin thyü, lo Ammon kazü apentha lope tanyü kenkin bin thyüla, tson-o hagun no ale Npugü letse sha loti.

⁶“Aphu sokekvu Npugü le zobin nyo: Hagun le sherhün-o ben kekhü lo nchwü. Hagun le Israel kazü ntsü la.

⁷Hagun le tson kethyü genyu ale hagun lope hagun so kekvu senye dan, hagun hon seü nmvue nkela nrün nyu tsü lati. Ale hagun nke shü lao hagun no senye nme thyüsin mvu nmvue hagun npvü hagun kazü ndi lati. Tsüsiki hagun le ale Aphu sokekvu Npugü le tse sha loti.”

⁸Aphu sokekvu Npugü le zo, “Moab le Juda hile senye kecha aphu zen-o kenme letse kezo genyu,

⁹ale Moab tehun-o no kebin nyida dan, lo nyida kezegwatsin dan Beth Jeshimoth, Baal Meon, lo Kiriathaim hidan sin-o me no when ti.

¹⁰Ale npho kazü kesi kipon tsipwen dan no Moab lo Ammon lolo lati, Moab no senye letse kosin mvula nrün genyu.

¹¹Ale shaja pe Moab tsü ti, tson-o anyugun no ale Npugü le tse sha loti.”

¹²Aphu sokekvu Npugü ale zo, “Edom temi le Juda ge anyugun khün losa laso, lo khün kelo tsü gü le Edom ge kethonthen thyü zükela nme senryü la.

¹³Tsügenyu ale shaja pe Ammon tsüo tsü nyu temi lo nyukhu aphu boshvula ti. Ale tsü pe kenke nme thyü lati, Teman nyida ka gü Dedan nyida keti, terinyu temi aphu ga lati.

¹⁴A temi Israel le Edom ge akhün loti, lo anyugun le Edom thyü pe anyunkenthün shati. Edom le ale khünkelo tsü le nyu yo tsekethyü sha loti.” Aphu sokekvu Npugü le zo laso.

¹⁵Aphu sokekvu Npugü le zo, “Filistian nyu le kethon ki anyugun rinyu thyü hü kela gü ge khün losa, lo tsü dan nrhio nkela.

¹⁶Tsügenyu ale Filistian when-o anyugun shola titse zobin nyo. Ale Filistian temi a-sen kazü ketejon nyu yhun kebin aphu nke lati.

¹⁷Ale shaja pe anyugun tsü sati lo anyugun ge khün aphu loti. Anyugun le anyunkenta shati. Tsüsiki anyugun le ale Npugü letse shati.”