Read Southern Rengma Naga EZEKIEL 26 Bible Online

EZEKIEL 26 - Southern Rengma Naga bible

EZEKIEL 26

¹Agun le me kazü ki gü kethyü chen tseryü nme gü shye keri gü jonkeri nyü, Npugü le a nthon.

²“Silakehü temi gü, higü hile Tur nyida nyu temi dan le sherhün kebin kon. Anyugun le sen-o, ‘Jerusalem le kara laso! Tsügi hakethyü tson gü le ndi so! A-le ngun nren lo hoso!’

³“Tsügenyu Aphu sokekvu Npugü ale zobin: Ale hagun kenrhi gü le, Tur nyida gü. Ale senye kechon zenryüo n when ti, lo anyugun le zida kentyü hontse ryüti.

⁴Anyugun le hagun nyida kehun dan nkela lo hagun tsokhwen dan boketo lati. Tsüsika ale kemphü sho sentin lao tsonye nti lati.

⁵Zida nyu tsü tsehü keten nyu le anyugun joh pe tsü ge pho ti. Aphu sokekvu Npugü ale zo laso. Senye dan le Tur kenya sentin la,

⁶lo anyugun zhethon lope kazü tsünyu rünyi dan ka yhun kebin nyu dushvu lati. Tsüsiki Tur le ale Npugü le tse sha loti.”

⁷Aphu sokekvu Npugü le zo, “Ale raja aphu so Kedagü, Babilon raja Nebuchadnezzar senryüo Tur when ti. A-le tesoki rihü danda no keru lo kerugari lo kerukezen nyu zenryü ti.

⁸Kazü tsügü nyu rünyi nyu yhun kebin nyu le kega kethyü nyu si lati. Kenrhinyu le kü tso lo rikhunbin khwen ti, lo chwida khwen nko-o nzen kenren ti.

⁹Anyugun le chwida vüren nrün dyüshwe cha pe hagun chwida vü lo tegi khincha lo hagun tsokhwen vüshe lati.

¹⁰Anyugun keru le cho kephu keshü tsü le hagun sun ti. Anyugun le nkekela nyida khinrun nyu yü kethyü ka anyugun keru kanyü kepvü gari lo teri kerugari ketin khwen le hagun chwida-e pvü keni ti.

¹¹Anyugun keru kezen nyu le hagun tsonda nyu kenrin thyü pvüthüo anyugun zhethon pe hagun temi dan dushvu ti. Hagun kachon kenko dan phen pe kazü nyu shü lati.

¹²Hagun kenrhinyu le hagun kenya jwe pe anyugun keche loti, tsü dan le hagun chwida lala lo ka kegwa dan borenla. Anyugun le tso lo tesen lo tha kechakela dan aphu pe zida nyu shwen shü lati.

¹³Ale hagun lü aphu no a-keni thyüla, lo hagun harp khwen aphu khin lati.

¹⁴Ale tsehü keten nyu no joh pe pho lo kegwa tsonye nti khela ti. Nyida gü thyüni lo mvu lati. Aphu sokekvu Npugü ale zo laso.”

¹⁵Aphu sokekvu Npugü le hi lope Tur nyida gü ka zo nrün le bin: “Mele n nkhen kelo ka ntehun kebin nyu le kerüshvu pe mele dushvu kebin nyu kenra khwen hontse ti.

¹⁶Tsüselo zida nyu nsin nshe kehü senye raja dan aphu anyugun rajakhün ge tsenryü ti. Anyugun le mirün ketseyho lo tejvü kekhi phi yhola lo ndün-o kazü nyu thun tsüti. Anyugun le n rüla sha pe kerüsa lao ndün kethyü khinlo mvuti.

¹⁷Anyugun le kesun lü higü ron ti: Nyida kentsen gü le nke laso! Zida nyu a-zürun dan sen tin laso. Nyida hinyu temi le zida dan ketsen Lo a-tekehun ka bin kehü aphu ketsun hü.

¹⁸Ntsoka we, a-le chekela nyü, Zükehun kazü dan le ndün bin, Lo anyugun temi le kenke tsü gü nripe nshvusa laso!”

¹⁹Aphu sokekvu Npugü le zo; “Ale hagun thyü pe nkekela nyida mele yhun mvukela hontse shüti. ale züda kentsun zü lope hagun kemin lati.

²⁰Ale hagun nipe tesinki kesinyu kazü ki nduka keyhun nyu kerhün lati. ale hagun thyü pe kazü hensin kethonthen kenke dan nyu kesinyu zen-o bin ti. Tson kela genyu hagun le kerhün nyu kazü nyu hagun bin thyüo yhunlo mvu lati.

²¹Ale hagun lope me kerükeshvu tsinhi nme thyü, lo tsü le hagun genyu keni thyü lati. Temi le hagun füe hyulo mvu lati.” Aphu sokekvu Npugü le zo laso.