Read Southern Rengma Naga EZEKIEL 27 Bible Online

EZEKIEL 27 - Southern Rengma Naga bible

EZEKIEL 27

¹Npugü le aka zo,

²“Silakehü temi gü, Tur ge kesun lü ronlo,

³nyida tsü gü le zida seki bin-o zida kehun ka kebin temi dan zen-o hathyü hü. Aphu sokekvu Npugü le zokebin jo pe a-ka zolo: Tur, nle zegwasa kethyü genyu nsü thyü hü.

⁴N ka le zida. N thyükeshü nyu le nthyü pe zürun kezegwa hontse shü;

⁵Anyugun le Hermon kazüthun ki fir senbin lope anyugun zürun thyü. Lo Lebanon kipon sedar sen lope zürun ge kedun bin dan thyü.

⁶Anyugun le Bashan ki teshosen lo pe kejenvü thyü; Anyugun le Sepra ki sahümane pe nkela thyü Lo chunhü lope a-nyuki la.

⁷Linen pe ntsangkenbu kenophi thyü, Ijipt ki linen pe kedo, Nithen kie sha whülo kegwa hon, Nkesun le linen kegwatsin, Lo Sepra zükehun kazü ki phi kemeren pe thyü.

⁸Zürun kejen nyu le Sidon lo Arvad nyida dan ka temi. Nge kebin thathyü keshanyu le zürun kejen nyu.

⁹Zürun kechanyu le Biblos kipon senthyü salo kelanyu. Zida nyu gü kehü zürun aphu ge njwen kehü nyu aphu N tha kejwe bin nyu hathyü.

¹⁰“Persia, Lidia lo Libia kipon shüpahü le hagun rihü nyu thyü. Tsü dan le anyugun gida lo perün dan pe hagun kanyu bin hü. Tsü dan le zan kegwa chün pe hagun tsü hü.

¹¹Arvad kipon shüpahü le nchwida rikhun, lo Gamad kipon temi le ntsokhwen dan rikhun hü. Tsü dan le anyugun gida pe nchwida ge hü lahü. Anyugun le nthyü kezegwa shü kehü dan.

¹²“Nle Spain nyu hathyü lo nkanyü kechon dan sunka rakagi, tegi, tin lo tegivü khilo.

¹³Nle Greece, Tubal, lo Meshek nyu hathyü lo nkanyü dan pe donyu lo lazo pe kethyü kanyü dan kelu.

¹⁴Nle nkanyü dan pe Beth Togarmah nyu hon kanyü kepvü keru, terikethyü keru lo gada dan hei.

¹⁵Rhodes temi dan le nzen-o hathyü; züje ki kebin nyu kechon le tsunhü lo ebony sen pe nkanyü kelü.

¹⁶Siria temi le n ha lo nle thyü kelo kechon heilo. Tsü dan le tso kenjvü, Phikemeren, tejvü kekhi phi, linen kegwa, coral, lo rubi dan pe n ha kelu.

¹⁷Juda lo Israel le tho, khuzü, oliv ter lo rünkegwa pe n ha hei.

¹⁸Damaska temi le Helbon ki zu lo Sahar ki thyühü pe n ha lo nle thyükelo kelu. Anyugun le tegi pe kecha kanyü lo rünkegwa lope nkanyü hei.

²⁰Dedan temi le nyukhu ge lao kedunbin thyülo kegwa phi pe nkanyü kelu.

²¹Arab nyu lo Kedar kazü soge kehü nyu le tanyü nyu, tanyü, lo tenyü pe n ha thyü.

²²Nkanyü genyu Sheba lo Raamah ki hada kethyü nyu le kontyü lo suna, lo rün kegwatsin dan pe n ha kelu.

²³Haran, Canneh lo Eden, nyida dan, Sheba nyu hada kethyü nyu, Asshur lo Khilmad nyida, tsü dan aphu nzen-o hathyü.

²⁴Anyugun le phinya kegwa, phikemeren, lo tejvü kekhi phi, kelaphi rhi kechacha kethyü, nitsü kenko lo nikenlü pe dosa kela phi dan pe nka jwe shü.

²⁵Kanyü kepvü zürun kedatsin dan no n ha kethyü kanyü pvüo kethen. Nle Zida nyu zürun hontse kanyü kensu pvü hü.

²⁶Zürun kejen nyu le npvü ryüo zida nyu shükelo ka Nphoki tsangkenbu le nwhün sen-o zü kentsun ki güla.

²⁷N ha kanyü aphu, Zürun nyu thatho thyüo kenjwen nyu aphu Zürun kechanyu lo hada kethyü nyu, Zürun nyu kehü shüpahü aphu- Aphu, aphu zida nyu nmhenla.

²⁸Kenjwen nyu zü nyu si gü kejü dan kenra le pere ki-e gwün kebon la.

²⁹“Zürun aphu ntsoka we nrunla, Tsünyu kehü nyu aphu zida seki chwiryü laso.

³⁰Anyugun aphu nchechüsa bin, Kemphü pe anyugun pe ge shülo jonbü nyu yhon.

³¹Anyugun le ngenyu anyugun pe thu la Lo ronphi ben. Anyugun nyun kenjün thyürio chü.

³²Anyugun le n ge kesun lü ron: `Segü lope Tur zenkendyü lomon, Tur le ntsoka we zida nyu ma tsela ti sele?

³³N hakethyü le zida nkenkelo ka, Nle senye aphu sen mvulo keshvu pe sülo. Raja le nnya lo Nkanyü kenya genyu.

³⁴Ntsoka we nle zida nyu nke laso; Nle züda kentsun nyu che laso. Nkanyü lo ngenyu tha thyü kehü nyu aphu Nzen-o zida nyu nmhen laso.'

³⁵“Züje ki yhun kehü nyu aphu nkenke rüla sha pe kekerü thyü laso. Anyugun rajadan-e nshvuri laso, lo anyun mhun ge kenshvu hyu laso.

³⁶Nle ndi laso, kethonthen ndi laso, lo kazü aphu nyu hada kethyü nyu le kerüshvu laso, anyugun le nkenke hontse kela nshvu bin nyo.”