Read Southern Rengma Naga EZEKIEL 28 Bible Online

EZEKIEL 28 - Southern Rengma Naga bible

EZEKIEL 28

¹Npugü le aka zo,

²“Silakehü temi gü, ale Kekvutsin Npugü, ale zokebin hi lope Tur kekvugü ka zoshü: Nle tero nme letse nrüchün ngon-o ketekho hü nyo. Nle teronyu nme hontse rajakhün ge dun-o zida no n hun bin letse zohü. Nle tero ro thyü hü, ai nmvu, nle sikelai, teronyu kemvu.

³Nle Daniel nyeki nsüo thame pe nmhundyü ki kebu loho letse rüchün hü.

⁴Nthakesha lo thathyü kesha le nno suna lo rakagi nnya lo.

⁵Nle kelekeluo hathyü pe chwilo hü. Nle n kenya genyu ditsüki thyü ketekho bin yo!

⁶“Tsügenyu, Kekvutsin Npugü ale zobin: Nle tero nyu hontse nsü letse kehü genyu,

⁷ale shwikenjün kendi rinyu zenryüo nwhe ti. Tsüdan le nle thakesha lo thathyükesha sen-o hyukelo kezegwa dan aphu nke lati.

⁸Tsü dan le n boshvu pe zü le kebin sika nyu shü lati.

⁹Anyugun le nboshvula titse keryü ka-e nle tero letse zo tile? Nle ndushvula nrün nyu teno kelo ka we nle temi a-me teronyu thyü loho lati.

¹⁰Nle Sunggigü shakemvu sinrünyi kecha ben nyu tehi hontse si lati. Ale Kekvutsin Npugü, ale johoshü laso.”

¹¹Npugü le aka zoni,

¹²“Silakehü temi gü, kenke le Tur rajagü khwen kebin genyu nyungwamvu lo. Ale Aphu sokekvu Npugü ale zokebin hi lope a-ka zolo; Nle gwüngwa ka we gwapen kethyü tsinhi thyü hü. Nle dihontse nsü lo zegwa hü yo!

¹³Nle Sunggigü chwi Eden nyu yhun, lo tso minketsen hidan pe nronye thyü hü: Rubi lo diamond; topaz, beril, karnelian, lo jasper, safir, emerald, lo garnet. Nle suna ronye le bin. Tsü dan tsü le n nyhun keshü nyü ngenyu thyü keshü.

¹⁴Ale kenrin kethyü jolonyu nme nipe nrikhun shü. Nle a kazüthun kenshün ge yhun-o tso minketsen nshwen kehü dan nyu hohü.

¹⁵N nyhun keshü ka ryüo nle gwakemvu thyüso kela keti we njvü le gwapen.

¹⁶Nle rao thahei lo jwe, tsontseo tsü le nthyü pe gwamvu sa lo la. Tsügenyu ale nno a kazüthun kenshün khela lotse shü, lo nrikhun kehü jolo gü le tso minketsen kenshwen dan nyu nhüshwi la.

¹⁷Nle n kezegwa genyu ketekho hü, lo nzan kechwi le nthyü pe kepin nyu hontse la. Higü genyu ale nsü pe kazü nyu shüo nno raja kechanyu no petsü mvulo keshvu genyu tsinhi nme thyü.

¹⁸Nle tha hei lo jwe kethyü nyu gwamvu pe tsü hontse lao n kershvubin dan-e nrhula. Tsügenyu ale mah lope nyida gü rope kemphü thyüla. N nrikehü nyu aphu ntsoka we nle mahchu thyükela hyu laso.

¹⁹Nle ndi laso, kethonthen ndi laso, lo n nkekela rüla kesha senye aphu kerüshvula lo nkenjün kethyü hontse kela nshvu bin laso.”

²⁰Npugü le aka zo,

²¹“Silakehü temi gü, Sidon nyida nkhin shülo.

²²Ale Aphu sokekvu Npugü, ale anyu rüla zokebin hi lope tsünyu temi dan ka zolo: Sidon, ale nkenrhi gü le; temi dan le ale nge thyükeshü tho genyu a shwen ti. Ale shaja pe nge keyhun nyu tsüo ale dihontse nshün yo tse kethyü pe anyugun hi keshü ka anyugun le ale Npugü letse sha loti.

²³Ale keho nipe nge shüo tezi no ntsonda nyu tsun ti. Lizin hizin mele nwhe ti, tson-o ntemi ga lati. Tsüselo ale Npugü le tse nle shati.”

²⁴Npugü le zo, “Israel kehun senye dan a-shwinyü kehü nme-e tsehü lo nchonra hontse Israel nthyü loho so. Lo anyugun le ale Aphu sokekvu Npugü le tse shati.”

²⁵Aphu sokekvu Npugü le zo, “Ale Israel nyu hükezen pe senye dan ki shükela aphu zen niryü lati. Lo senye aphu ale nshün letse shati. Israel temi le anyugun kazü, ale pe a gogü Jakob ketsü kazü nyu yhun loti.

²⁶Anyugun le tsünyu kenshvu ndio yhunti. Anyugun le ka thyü lo vain low tsüti. Ale a-kazon nyu, a-shwinyü kehü dan aphu shaja pe tsü lati, tson-o Israel le nshvu mvu lati. Tsüsiki anyugun le ale anyugun Npugü Sunggigü letse sha loti.”