Read Southern Rengma Naga EZEKIEL 29 Bible Online

EZEKIEL 29 - Southern Rengma Naga bible

EZEKIEL 29

¹Agun le me kazü ki dothyü tinkethyü chen tseryü gü shye tseryü gü jon tseryükenyhun nyü, Npugü le aka zo.

²“Silakehü temi gü, Ijipt rajagü nkhin shülo. A-le lo Ijipt kazü aphu dihontse shaja thyüla tiyo a-ka zoshülo.

³Higü hile Aphu sokekvu Npugü le pe Ijipt raja gü ka zobin letse shü: Ale nkenrhi gü le, nle zürin gü rah, züri nyu kehü gü. Nle Nile thyüshü lo tsü le nhon letse zohü.

⁴Ale hükhuvü pe nmün nyu shüo n züri nyu nle lo n nku kebin tsehü dan süshwi lati.

⁵Ale nle lo tsehü tsü dan pe kazü kesi nyu shwen shü lati. Nmin le kazü nyu chetsü lo sun mvu bin ti. Ale tsü lope tegü lo tehenthyü chvü thyü lati.

⁶Tsüselo Ijipt temi aphu ale Npugü letse shati.” Npugü le zo, “Israel nyu le hagun Ijipt nyu no anyugun cheo hagun tenyen hü, ai nle then nko kemvu nyeki gwakvu mvu laso.

⁷Anyugun le n ngü kehü ka nle anyugun buthun boren lo jen, lo anyugun sen chweren la.

⁸Tsügenyu Aphu sokekvu Npugü ale nka zobin, ale temi no zhethon sen-o nwhe-o ntemi lo nsenru ga lati.

⁹Ijipt le kenrunkenryü thyü ti. Tsüsiki ale Npugü letse nle shati. “Nle Nile tsü le n hon, nle tsü thyüshü letse kezo genyu,

¹⁰ale nkenrhinyu lo Nile kenrhi gü le. Ale tesoki Migdol nyida ka gü tesinzin Aswan nyida keti lo Sudanese terhi ki kegü tson keti Ijipt aphu pe kenrunkenryü thyü lati.

¹¹Temi lo nyukhu no tsünyu gü loho. Chen henzi thame tsünyu yhun loho.

¹²Ale Ijipt thyü pe kazü nyu mele yhun kemvu bin nme thyü lati. Ale Ijipt nyida dan thyü pe chen henzi kho tsü nke pe nyida kecha dan nyeki shvu lati. Ale Ijipt nyu no me kazü ki kezen lati. Anyugun le tin-o senye kecha dan ki güo temi kecha dan nyu yhun ti.”

¹³Aphu sokekvu Npugü le zo, “Chen henzi siki ale Ijipt hükezen pe shükela bin senye dan ki anyugun zen niryü ti,

¹⁴tson-o ale anyugun no anyugun bin ketsin gü, Ijipt tesin kipon tsü yhun loti.. Tsünyu anyugun le kvukemvu rajaphen nme thyü ti,

¹⁵rajaphen dan nyu kvu kemvutsin nme thyü ti, anyugun le tsipwen kecha so kekvu sen niloho so. Ale anyugun no mele shahü kemvu nme thyü lao no senye kecha ketsen pe a-hensin a-kenda nyu shülo mvu lati.

¹⁶Israel le anyugun keche tenyen-o yhun mvu lati. Israel le Ijipt rüla shakelo ka anyugun le Ijipt tenyen ryü kela tsüle ditsüki thyüzü layo tse kethyü sha loti. Tson-o Israel le ale Aphu sokekvu Npugü letse sha loti.”

¹⁷Agun le me kazü ki gü kethyü chen nkio tsenyü shye kerigü jonkeri nyü, Npugü le aka zo,

¹⁸“Silakehü temi gü, Babilon raja gü Nebuchadnezzar le Tur when nrün genyu tsonchü laso. A-le shüpahü nyu no khvü kensu pvüo anyugun pe-e ndo lo anyugun bue nyho lo hokeli ai a-le lo a-rihü dan-e kenjün kethyü chün hyu lomvu.

¹⁹Tsügenyu higü hile ale Aphu sokekvu Npugü, ale zobin nyo: Ale Ijipt kazü lope raja Nebuchadnezzar tsü bin. A-le Ijipt kenya aphu la pvü gü a-rihü dan chün thyü nrün genyu pvü tin lati.

²⁰Ale Ijipt lope a-thochün thyü pe a-tsü bin nyo, kechamvule a-rihü le atho thyü ryü. Ale aphu sokekvu Npugü, tsü zo laso.

²¹“Tsonkela ka, ale Israel thyü nkoshü lo Ezekiel, nno temi aphu le n khwen shalo kegwa bin nyu sen ti, anyugun no ale Npugü letse shalo nrün genyu.”