Read Southern Rengma Naga EZEKIEL 3 Bible Online

EZEKIEL 3 - Southern Rengma Naga bible

EZEKIEL 3

¹Sunggigü le zo, “Silakehü temi gü, kethusü higü tyülo-o; gü Israel temi danka zoshülo.”

²Tsügenyu ale amün kvushü lo a-le kethusü pe ano tyülo.

³A-le zo, “Silakehü temi gü, ale pe nketsü kethusü gü tsü tyülo; tsü tyü pe ngin nyülo.” Ale tsü tyü, lo tsü le nnyü pe khuzü hontse.

⁴Tsüselo Sunggigü le zo, “Silakehü temi gü, Israel temi dan ka güo ale nno zolotse keshü zoshü lo.

⁵Ale nnipe sin rünyi khwen ketsen zo kehü senye ki shübin mvu, ai Israel temi ki shübin.

⁶Ale nnipe sin rünyi khwen ketsen nle shakemvu zokehü senye kecha dan ki shü yatselo, anyugun le nkhwe nyüti.

⁷Ai Israel temi nme-e nyü nyü kemvui; anyugun le akhwen-e nyü loho. Anyugun phu nyun rü lo tsen kethyü genyu.

⁸Ale nthyü pe anyugun hontse nyun tsen lo rü shü ti.

⁹Ale nthyü pe tsonye hontse tsü lo diamond hontse nko shüti; me nren kehü dan tsü nshvu nya.”

¹⁰Sunggigü le zo, “Silakehü temi gü, ale nka zokebin hi aphu nyü tsentsü lo-o rüchün lo.

¹¹Tson-o ntemi dothyü kebin nyu ki güo Aphu sokekvu Npugü a higü le anyugun ka zokeshü jo tsü anyugun le nyüe nmvue pe anyugun ka zoshü lo.”

¹²Tsüselo Sunggigü kapu gü le apen solo, lo a siki thakhwen tetso sa tse zokeshü nyülo, “Tsang tesoki kebin Npugü zan kechwi gü tsü shwenlo!”

¹³Tsangneki nyukhu dan sekin kekhün kebin khwen, kerüpha khwen le tetso pe kazü kenu hontse shü.

¹⁴Npugü kekvu gü le kvusa tse age ryü, lo a-kapu le apvüo tin kethyü ka, anyunta lo anyunkhü lola.

¹⁵Tsügenyu ale Khebar züri khoka Tel Abib ki donyu le kebin bin ka ryü, lo ale kehyu lo kenyü dan genyu tsüka jon tsenyü bin tinla.

¹⁶Jon tsenyü penkela siki Npugü le a nthon.

¹⁷“Silakehü temi gü, ale nkhipe Israel senye genyu rikhun thyü bin. Petsü mvulo keshvu ale pe nketsü tsü pe anyugun ka zolo.

¹⁸Sigü jüla sele tse zoshüo nle a-no a-tho kelulo-o kenilo kegwa zoshü mvu, lo a-le kemunyu sila yatselo a-kesi khvu gü tsü nno pvüti.

¹⁹Nle temi gwakemvu gü ka zoshüe a-le kemu thyüsin yatse lo a-le siti ai n we n nrho shüti.

²⁰“Kegwa nyu nme le gwakemvu thyü solo ale a-lope gwün keshvu nyu shüla, lo nle a-ka zoshü kemvu we a-le si lati. A-le a-kemu genyu siti- a-tho kegwa dan tsü ale rüchün kemvui- ale a-kesi khvu gü tsü nno pvüti.

²¹Nle kegwa nyu zen shüo a-le nkhwen nyülo yatselo, a-le yhun bin ti, lo n keyhun ko nrho shüti.”

²²Ale Npugü le kehü kekvu shalo lo a-le aka kezo nyülo, “Solo-o ketejon ki gülo. Ale tsünyu n nthon ti.”

²³Tsügenyu ale ketejon ki gü, lo ale tsünyu Khebar züri khoka kehyu hontse Npugü zan kechwi hyu, lo ale kazü nyu nkhün rün tinla,

²⁴ai Sunggigü kapu gü le age bin lo-o asü soshü. Npugü le aka zo, “Kaki gun-o ka khinpvülo.

²⁵Ron pe nphin lati, sila kehü temi gü, lo nle me dan nyu chwilo mvu lati.

²⁶Ale n yi no nko lao me nren kehü temi hidan no petsülo lo tse nno zolo mvu lati.

²⁷Tsüsiki ale n nthon nishü lo jo zolo kegwa kekvu pe ntsü yatselo nle Aphu sokekvu Npugü a higü le zokeshü jo dan pe anyugun ka zolo ti. Anyu peha le nyü ti, ai peha le nyü mvu ti,anyugun le me nren kehü senye genyu.”