Read Southern Rengma Naga EZEKIEL 30 Bible Online

EZEKIEL 30 - Southern Rengma Naga bible

EZEKIEL 30

¹Npugü le aka zoni.

²“Silakehü temi gü, Aphu sokekvu Npugü ale zokebin hi lope sidyü zo-o tesha shülo. Nle jo hidan pe sen shü: Ketetsin kethyü jon le ryüti!

³Jon gü le khonni laso, Npugü le thathyü nrün jon gü le, Senye dan genyu khelukesü lo kenjün kethyü jon.

⁴Ijipt nyu teri le bin ti Shekese keda le Sudan nyu ryüti. Ijipt nyu kechon boshvu lati; Anyugun kenya lapvü tin la Lo Kazü-e nke lati.

⁵“Teri tsü gü nyu Sudan, Lidia, Libia, Arabia, Kub, dan ka a-jonshe zen kehü shüpahü lo a-temi dan ko boshvu lati.”

⁶Aphu sokekvu Npugü le zo, “Tesozin Migdol ka tsü gü tesinzin Aswan keti Ijipt nopen kehü nyu aphu terinyu si lati. Ijipt rihü ketekho kehü dan nke lati. Aphu sokekvu Npugü ale zo laso.

⁷Kazü tsü gü le kazünyu kenke tsin gü thyü ti, lo a-nyida dan nke shü lati.

⁸Ale mah pe Ijipt ge shü lo a-nokepen nyu aphu boshvu kela ka, anyugun le ale Npugü letse sha loti.

⁹“Jon tsü gü le ryüo Ijipt nke kela nyü, ale zürun jolonyu nipe rüchün nshvukemvu Sudan temi dan thukeyhun shüti, tsüka anyugun le kerüshvu ti. Tsü jon le ryüjü laso!”

¹⁰Aphu sokekvu Npugü le zo, “Ale Babilon raja gü Nebuchadnezzar sen-o Ijipt kenya no kenithyü lati.

¹¹A-le lo me njünkemvu a-rihü dan le ryüo kazü tsü gü nkeshü lati. Anyugun le zhethon pen-o Ijipt whe-o, kazü tsü gü ka simin le sü lati.

¹²Ale Nile züri thyü nsin lao Ijipt lope temi gwakemvu nyu hensin shü lati. Sinrünyi le tsipwen tsü gü apentha nke lati. Ale Npugü, tsü zo laso.”

¹³Aphu sokekvu Npugü le zo, “Ale Memfi nyu teromen lo tero kenku aphu nke lati. Ijipt kekvu kesen nme-e ndila, lo temi aphu no kerüshvu ti.

¹⁴Ale Ijipt tesinzin no nkela, lo mah lope tesozin Zoan nyida ge shüti. Ale Thebes nyida gü tsü shaja pe tsü ti.

¹⁵Ale Pelusiun nyida, Ijipt chwida kenko gü no anyun kenthün shati. Ale Thebes kenya nke lati.

¹⁶Ale mah lope Ijipt roshü, lo Pelusiun le nyun kenjün thyü loti. Thebes chwida le nren lati, lo nyida gü le nke lati.

¹⁷Heliopolis lo Bubastis nyida hvu ka selo dan le terinyu siti, lo kecha dan tenzen-o dothyü tin lati.

¹⁸Kezün le Tahpanhes ge ryü lati, ale Ijipt kekvu borho lo anyugun süthyü kehü kenko no a-kenithyü kela siki. Nmha le Ijipt sun lati, lo a-nyida dan temi aphu tenzen-o dothyü tin lati.

¹⁹Ale hihontse shaja pe Ijipt tsü kethyü ka, anyugun le ale Npugü letse sha loti.”

²⁰Agun le me kazü ki tinkela chen tseryü nme gü shyekerigü jon tsenyü nyü Npugü le aka zo.

²¹“Silakehü temi gü, ale Ijipt rajagü ben bose laso. Temi nme-e tsü phinshü mvu, tsüno gwalo-o zhethon tezenlo nrün genyu phinketsüe mvu.

²²Tsügenyu ale Aphu sokekvu Npugü, ale hi zobin nyo: Ale Ijipt rajagü kenrhi gü. Ale a-ben kegwa gü lo bosekela gü tse kenyhun nren bose lati-tson-o zhethon gü le a-ben nyu che lati.

²³Ale Ijipt nyu hükezen pe kazü aphu nyu shü lati.

²⁴Tsüsiki ale Babilon kekvu thyü nkoshü lo a zhethon pe a-ben ka shüti. Ai ale Ijipt raja gü kekvu borho lati, tson-o a-le a-kenrhinyu mhundyü nyu nho-o siti.

²⁵Ele, ale a-no kvumvula lo Babilon raja gü thyü nkoshü ti. Ale azhethon pe a-tsüo a-le pe Ijipt ge shü lo temi aphu ale Npugü letse shati.

²⁶Ale Ijipt nyu hükezen pe kazü aphu nyu shüti. Tsonlo anyugun le ale Npugü letse sha loti.”