Read Southern Rengma Naga EZEKIEL 31 Bible Online

EZEKIEL 31 - Southern Rengma Naga bible

EZEKIEL 31

¹Agun le me kazü ki yhun tinkela chen tseryü nme gü shye shen ka jon keri nyü Npugü le aka zo.

²“Silakehü temi gü, Ijipt rajagü lo a-temi aphu ka zolo: Hagun le ditsüki kvula! Ano hagun lope nyu zenkendyü mon?

³Hagun le Lebanon ki sedar bin nme hontse, A-ro gwasa, lo a-kengü le bin, Thon pe nmha-e tihü,

⁴Tsüno minlo nrün genyu züe bin hü, Lo kazü hensin ki züri le bin-o tsü leyi hü. Tsü dan le senbin le sen kebin bin nyu ntsen shü Lo rinyu dan no chün nyu sen bin aphu ntsen shü.

⁵Tsü le zü pe nekegwa thyükeshü genyu, Min-o senbin kecha dan nyeki thonlo. A-ro le sen pe sü lo thonlo.

⁶Tegü kechacha kethyü aphu a-ro dan ka anyugun seü thyü; Tehenthyü dan le a-kengü ka anyugun nyu nche; Kazü senye dan le a-hensin ryüyü lo.

⁷Senbin tsü gü le ditsüki zegwa la- Thonsa, lo a-ro-e kethonthon. A-men le sen ntsun yügü zü kebin bin ti.

⁸Sunggigü chwinyu Sedar nme-e tsü kendyü lomvu. Fir bin nme-e a-ro tsükho ndi, Lo chonkhübin kecha nme-e a-ro tsükho bin mvu. Sunggigü chwinyu senbin nme-e tsü hontse zegwa mvu.

⁹Ale a-ro sen kenjen pe zegwasa shü. Sunggigü chwi Eden nyu kebin aphu tsü tepen hü.

¹⁰“Tsügenyu, ale Aphu sokekvu Npugü, ale senbin min kü gü mmha tikemvuthen min kü kethyü tsü ge nyuthyüla tiyo ale nka zoshüti. Tsü le min tetso lo ketekho kvu hü;

¹¹tsügenyu ale tsü kenilao sinrünyi kecha kekvu nyu no tsü lo lati. A-le senbin tsü gü serikemvu genyu nyu hyulo züyo pe tsü ti.

¹²Me njün hü kemvu sinrünyi kecha nyu le tsüphen pe kazüthun lo kazüketejon aphu ge chetsü lati. A-shye hensin yhun kehüsenye aphu tin lati.

¹³Tegü dan le ryüo senbin pen kela ge sun, lo tehenthyü dan le a-ro so nsin nshe ti.

¹⁴Tsügenyu ntsoka gerho, zü le ntsensa hü metse senbin nme-e thon pe tsü gü hontse thyüni loho nmvue a-ra no mmha tio tsükho tetso loho. anyugun aphu temi hontse sila tiso, kesinyu kazü ki güla kehü nyu kerhünla tiso.”

¹⁵Higü hile Aphu sokekvu Npugü le zo: “Senbin tsü gü le kesinyu kazü nyu gü kela nyü, ale kazü hensin zü no nyungwakemvu zansü chwiryü kazü so ndan lati. Ale züri dan süni lola lo rinyu kechon no tsunchwiryü mvu lati. Senbin gü le sikela genyu, ale kezün zenryüo Lebanon kazüthun ge shü la lo chün nyu senbin aphu no rügu lati.

¹⁶Ale tsügü nipe kesinyu kazü ki shü kethyü ka, a-keche khwen le senye dan pvü kenu ti. Eden nyu sen dan aphu lo kegwatsin aphu, Lebanon nyu senbin zü ntsen kegwa thyü hüo kazü hensin ki gü kela nyu aphu a-le chekela genyu sherhün ti.

¹⁷Anyugun le chekela nyu zen kerhün la nrün genyu tsü gü zen-o kesinyu kazü nyu gü lati. Lo a-she hensin yhun kehü nyu le senye dan nyu nren nru tin kü lati.

¹⁸“Senbin gü tsü le Ijipt raja lo a-temi aphu. Eden chwi nyu-e senbin nme thonsa nmvue nkenyüsa kethyündi. Ai ntsoka we Eden nyu senbin dan hontse tsü le kesinyu kazü nyu güo temi nshünkemvu lo terinyu ga kela nyu zen-o kerhün lati. Ale zo laso.” Aphu sokekvu Npugü le.