Read Southern Rengma Naga EZEKIEL 34 Bible Online

EZEKIEL 34 - Southern Rengma Naga bible

EZEKIEL 34

¹Npugü le aka zo.

²“Silakehü temi gü, Israel kekvu kesen nyu nkhin shülo. anyugun ka sidyüjo zo-o Aphu sokekvu Npugü, ale pe anyugun ka zokebin jo pe zoshü: Israel kekhwenyu, hagun we thyülo tiso! Hagun le hagun npvü hagun nucha hü, ai tanyü leyi hü mvu.

³Hagun le nyüzü tsü, thyühü phi ben, lo tanyü phu kegwa boshvu tyü hü. ai hagun le tanyü dan we leyi mvu.

⁴Hagun le kvukemvu dan nucha mvu, keho thyü ngwa shümvu, jünkela nyu phinketsü mvu, nmhon tinkelanyu zen niryü mvu, nmvue nmhen kelanyu fü mvu. Tson kethyü gü mvu le hagun le tsü dan ge hagun jvü gwamvu.

⁵Tanyü dan le kekhwen kendi genyu kezen lao, tehenthyü le tentyü.

⁶Tsügenyu a tanyü le rincho lo kazüthun ki tinla. Anyugun le kazü lizü hizin kezenla, lo nme-e tsü dan nri nmvue fü mvu laso.

⁷“Tsügenyu tanyü kekhwen dan, Npugü, ale hagun ka zo kebin hi nyülo.

⁸Ale rhün kehü ketsin Sunggigü genyu, hagun le a khwen nyülo gwakvu nrün. Tehenthyü le a tanyü dan whe-o tentyü, kekhwen min ndi kela genyu. A tanyü kekhwenyu le tanyü fülo titse mvula. Anyugun le tanyü mvule anyugun npvü anyugun nucha hü.

⁹Tsügenyu a khwen nyülo, hagun tanyü kekhwen dan.

¹⁰Ale Aphu sokekvu Npugü, ale hagun kenrhi gü le tse zobin nyo. Ale hagun dan nyu atanyü zentin lao hagun no tsü dan kekhwen thyüsin mvu lati, ale hagun no hagun npvü hagun phin rüchün nucha sinmvu lati. Ale hagun ka a tanyü dan kenishwilo lao hagun no anyugun thyü tyü mvu lati.

¹¹“Ale Aphu sokekvu Npugü, ale a tanyü dan fülo-o anyugun nucha lola ti

¹²tanyü kekhwen nyu nme le a-tanyü tsenchvü kela kho kequen nilo-o nuchalo kela hontse lola ti tse hagun ka zo bin. Kezün kenke jon tsünyü ale bin aphu nyu anyugun le tsenchvü kebin dan zen niryü lati.

¹³Ale sinrünyi dan ki anyugun kequen lo-o zen niryüo anyugun npvü anyugun kazü nyu shü lati. Ale anyugun tsonri zen-o Israel nyu kazüthun lo rinyu bin ki gü tson-o shai kegwa pe anyugun leyi ti.

¹⁴Ale anyugun no Israel kazü nyu kazüthun ki shaipfü lo kazü ketejon lo tehen kenjvü aphu ki nyunkhi mvuo anyugun chvü lotyü ti.

¹⁵Ale a npvü a tanyü kekhwen gü thyü ti, lo anyugun le kerüyü bin hyu loti. aphu sokekvu Npugü, ale zo laso.

¹⁶“Ale nmhenkela dan fü ti, nmhon tinkela nyu zen niryü ti, jünpvü kehü nyu phinshü, lo hokebin nyu thyü ngwa shüti; ai aphu gwa lo kvu kebin nyu nke lati, kechamvule ale kenjü tho thyü kehü tanyü kekhwen gü genyu.

¹⁷“Tsügenyu tanyü dan, aphu sokekvu Npugü, ale hagun nmeme kegwa keshvu nrio kegwa lo keshvu, tanyü lo tenyü au khikho lati.

¹⁸Hagun peha le jonyü kegwatsin-e tyü ketegvü lomvu; lo tyükemvu dan-e kedüla hü nyo! Hagun le zü kenshün tsüo tsü kemvu dan chonrhu lahü!

¹⁹A tanyü kecha dan le hagun le kedü kela tehen tyü lo hagun le cho nrhukela zü tsü hü.

²⁰“Tsügenyu aphu sokekvu Npugü, ale tanyü kekvu lo kvukemvu jün kerati tse hagun ka zobin.

²¹Hagun le kehonyu takejala lo tsü dan sen pe shwen la hü.

²²Ai ale atanyü dan kenishwilo lao meno anyugun nshweni mvulati. Ale a tanyü nmeme tse nrio kegwa lo keshvu khoka lati.

²³Ale agogü raja David hontse kethyü pe anyugun tsüo no anyugun kekhwen nme thyü ti, lo a-le anyugun nucha loti.

²⁴Ale Npugü, ale anyugun Sunggigü thyü ti, lo agogü David hontse raja nme no anyugun ketsen ti. Ale zo laso.

²⁵Ale anyugun zen-o kejozen loti lo tsüle anyugun no nshvu mvula lo kegwa thyü ti. Ale kazü tsü gü nyu nyukhu rigwakemvu dan hü lati, tson-o a tanyü dan no kenshvu ndio tehen nyu ho lo chün nyu jü ti.

²⁶“Ale jochü pe anyugun tsüo no a rincho kenshün gü hun-o yhun ti. Ale tsü nyu anyugun le sen mvulo keshvu ka tsangri pe tsü ti.

²⁷Senbin le a-sha nsha lo low gvüsa loti, tson-o temi aphu kenshvu ndio a-kazü nyu yhun ti. ale a temi pe dothyü kela nyu ben nyu anyugun kephin shwü lo hoshü lalo anyugun le ale Npugü letse shati.

²⁸Sunggigü shakemvu senye le anyugun hon seü niloho so, lo tehenthyü le anyugun tentyü loho. Anyugun le kenshvu ndio yhun ti, lo nme-e anyugun ketsun loho.

²⁹Ale kazü kebwe pe anyugun tsüti lo kazü nyu kekhün no ndi lati. Senye kecha le anyugun shwinyü sin loho.

³⁰Temi aphu ale Israel nopen lo anyugun le a temi letse sha loti. Aphu sokekvu Npugü, ale zo laso.

³¹“Hagun le a tanyü, ale leyi kehü a temi dan, lo ale hagun Sunggigü,” Aphu sokekvu Npugü le zo.