Read Southern Rengma Naga EZEKIEL 35 Bible Online

EZEKIEL 35 - Southern Rengma Naga bible

EZEKIEL 35

¹Npugü le aka zo.

²“Silakehü temi gü, Edom kazü nkhin shülo.

³Temi dan ka Aphu sokekvu Npugü ale zokebin hi lope zoshülo: Ale nkenrhinyu le, Edom kazüthun dan! Ale n nkeshü lati.

⁴Ale nnyida dan no nke pe khela Lo n kazü no nrun lati; Tsüsiki nyu nle ale Npugü letse sha loti.

⁵“Nle Israel nyu nrhizin hü lo a-kemu genyu shaja kenkhin gü a-kenke gwünkho ka me no a-temi dushvu.

⁶Tsügenyu Aphu sokekvu Npugü ale rhün kehü Sunggigü, kesi tsü le njün, lo nle tsü nrhi loho. Nle me dukeshvu genyu thyüzü laso, lo dukeshvu tsü le nthen ti.

⁷Ale Edom kazü rincho dan tsü no nke lati lo lihigüe tsünyu njwen kehü gü boshvu lati.

⁸Ale simin lope kazüthun kesü thyü lati, tson-o kega kethyü nyu sikela nyu le rincho dan lo ketejon sü ti.

⁹Ale nthyü pe kethonthen kenke thyü lati, lo nme-e nnyida nyu yhunni loho. Tsü ka nle ale Npugü letse sha loti.

¹⁰“NLe Juda lo Israel senye lo au kazü tsü le nhon lo nle tsü pe nhon thyü ti tse hü nyo, ale Npugü, au Sunggigü thyü kehü kae.

¹¹Tsügenyu ale Aphu sokekvu Npugü, ale rhün kehü Sunggigü ketsin genyu ale nnyunkenthün, nnyunketegi, lo a temi ntsü kethyü chün pe ntsü ti. Anyugun le nle anyugun ka thyü keshü tho genyu ale shaja pe ntsü bin nle tse sha loti.

¹²Tsüsika nle, Israel nyu kazüthun dan le nke laso, lo nle tsü lola titse nkhin-o zokeshü tsü Npugü ale nyülo la letse shati.

¹³Nle rigwamvu lo kemakin-o a zenkentsun a nkhin kethyü jo ale nyülo.”

¹⁴Aphu sokekvu Npugü le zo, “Ale n nkesa shüo kazü apentha nle chekela genyu sherhün ti,

¹⁵nle a hon, Israel nyu nkekela genyu n sherhün kethyü hontse. Seir kazüthun dan, e. Edom kazü aphu nke lati. Tsonlo temi aphu ale Npugü le tse sha loti.”