Read Southern Rengma Naga EZEKIEL 36 Bible Online

EZEKIEL 36 - Southern Rengma Naga bible

EZEKIEL 36

¹Npugü le zo, “Silakehü temi gü, Israel kazüthun ka zo-o anyugun no ale zokebin jo nyülo.

²Aphu sokekvu Npugü le anyugun genyu zo nrün le bin le: Israel kenrhinyu le anyugun nshwen-o zo, ‘Ntsoka we nduka bin gun keryü rincho dan tsü le agun honso!’

³“Aphu sokekvu Npugü ale zokebin hi pe sidyü zo-o tesha shülo. Israel kazon nyu senye dan le anyugun kazüthun nkhen-o nke kethyü ka, anyugun aphu Israel kemeni.

⁴Tsügenyu ntsoka we ale Aphu sokekvu Npugü le hagun ka zokebin hi nyülo.hagun kazüthun lo rincho dan, rinyu lo ketejon dan, nkekela bin dan, hagun kehun senye dan le nke pe shwikenyü thyüo khekela nyida dan.

⁵“Aphu sokekvu Npugü ale anyuntasa tse hagun hun kebin senye dan ntsun bin, lo Edom gü ntsun kvu bin nyo. Anyugun dyükentsü thyü lo shwinyüo a kazü lo pe anyugun hon thyülo.

⁶“Tsügenyu Israel nyu ka sidyü zolo: Kazüthun, rincho, rinyu, lo ketejon ka zolo, Aphu sokekvu Npugü ale senye dan ale anyugun nshwen lo sümvu kethyü genyu anyunketegi zobin nle.

⁷Aphu sokekvu Npugü ale hunpvü kebin senye dan kemeni la titse zoketsin thyü bin nle.

⁸Ai Israel nyu kazüthun ki we senbin le a-nyüsen-o a-sha nsha pe hagun a temi Israel tsü ti. Hagun le whütse kaki ryü la tiso.

⁹Ale hagun denzin hü, lo ale hagun no low tsü-o ntsi pe shüni lola tsentsü ti.

¹⁰Ale hagun no chvü kenye ti. Hagun le nyida nyu yhun-o nke kela aphu thyüni loti.

¹¹Ale temi lo senru no chonkenye loti. Hagun no himhundyü nyeki chon loti, tson-o ntsenyu kechon bin loti. Ale hagun no yhun kenyü hontse yhun loti, lo ale hagun no keri ka nyeki gwakenye loti. Tsüka hagun le ale Npugü letse shati.

¹²Ale hagun a temi Israel dan zenni ryüo kazü gü nyu yhunti. Tsü le hagun npvü hagun kazü thyü ti, lo hagun nyenyu no khün nyon ni loho so.

¹³“Aphu sokekvu Npugü ale zo: Temi dan le kazü higü lope temi tenketyü nyu letse ko kehü, lo anyugun le kezo le kazü tsü gü le ntsenyu rühu hü tse zo kehü tsü le ketsin.

¹⁴Ai ntsoka gerho tsü le temi tenketyü nyu thyüo hagun nyenyu rühu loho so. Ale Aphu sokekvu Npugü, ale zo laso.

¹⁵Kazü tsü gü le thame ka-e senye dan le a-kenkhin khwenyü nmvue mele a-shwikenyü hyu loho. A-le a-senye nyenyu rühu sin loho so. Aphu sokekvu Npugü le zo laso.”

¹⁶Npugü le aka zo.

¹⁷“Silakehü temi gü, Israel nyu le anyugun kazü nyu yhun kehü ka anyugun keyhun jvü lo anyugun tho genyu tsü nrhula. Ale anyugun jvü tsü rüchün pe tenunyu le shye tsen tenunyu jvü thyüo nyünyü jvü nyu nshün mvukela tsü hontsela sele.

¹⁸Anyugun le kazünyu me dukeshvu kemu thyükela lo teromen pe tsü nrhu kela genyu anyugun no anyunkenta kekvu shalo.

¹⁹Ale anyugun keyhun thojvü genyu anyugun nkhin la,lo ale anyugun kenjün pe sinrünyi kazü ki shüla.

²⁰Anyugun kegü bin aphu nyu kejokepvü khipe a zan kenshün nrhu, kechamvu temi dan le zo, ‘Temi hidan le anyugun Npugü Sunggigü le khipe anyugun ketsü kazü khela ti.’

²¹Tsügenyu ale a zan kenshün gü genyu anyun nkhila, kechamvule Israel nyu le anyugun kegü bin aphu nyu a zan nrhula.

²²“Tsügenyu Israel nyu ka Aphu sokekvu Npugü ale anyugun genyu jolo le kebin pe zolo: Ale thyü titse kebin hile hagun Israel nyu genyu mvu, ai a zan kenshün gü hagun le kegü kazü aphu nyu kejokepvü pe shükela gü genyu le.

²³Hagun le kejokepvü pe shükela a zan kegon gü kenshün khipe senye dan hikeshü ka anyugun le ale Npugü letse sha loti. Aphu sokekvu Npugü ale zo laso. Ale hagun sen-o senye dan mhundyü ale nshün letse hishü ti.

²⁴Ale senye lo kazü aphu ka hagun zen niryüo hagun kazü nyu shü lati.

²⁵Ale zü kenshün pe hagun ge kezen shüo teromen kerüshvu lo hagun nrhu kela aphu nyu hagun sükenshün shüti.

²⁶Ale nyun keshün lo kerüchün keshün pe hagun tsüti. Ale hagun nyunkerü kenko khila-o jokezen nyun pe tsü lati.

²⁷Ale a kapu pe hagun ge shüo hagun no ale johokeshü pe hagun ketsü tejvü aphu then loti.

²⁸Tsonlo hagun le ale khipe hagun pvübon nyu ketsü kazü gü nyu yhun loti. Hagun le a temi thyü loti, lo ale hagun Sunggigü thyü ti.

²⁹Ale hagun nrhu kehü aphu nyu hagun kenilo lati. Ale shyeni no chonlo lotse joho shüti, hagun no chenda thyüni mvu nrün genyu.

³⁰Ale hagun terashapenro no nsha chonkenye loti, tson-o hagun no senye dan nyu chenda thyü pe kejopvü mvu nrün genyu.

³¹Hagun le hagun jvü gwakemvu lo thyüzü kela dan rüchün ni loti, lo hagun le hagun kemu lo thyüzü kela dan genyu ntsü lati.

³²Israel, ale hagun no ale thyü kebin dan hile hagun genyu kemvu letse shanyü. Ale hagun no hagun le thyü kebin tho dan genyu kejo lo kemeni kethyü shalo nyü bin nle. Aphu sokekvu Npugü ale zo laso.”

³³Aphu sokekvu Npugü le zo, “Ale hagun kemu aphu nyu hagun sükenshün la lo ale hagun no hagun nyida dan ka yhun nilo lo hagun no nkekela dan thyüni loti.

³⁴Hagun lojvü pvüthü kehü nyu aphu tehen le zün lo rükela hyu kü laso, ai ale hagun no tsü dan tsüni loti.

³⁵Temi aphu, kazü higü le tehen thyü kela le dihontseo Eden chwi hontsela, lo nyida dan nke lo lapvü tinkela dan le temi le yhun lo chwida khwenilolayo tse zoti.

³⁶Tsüsika kazon nyu senye dan rhün kelo nyu le Npugü a higü ale nkekela nyida thyüni lo low tsümvukela nyu tsünilo hü letse sha loti. Npugü a higü le higü thyü titse zoshwila lo ale thyü ti.”

³⁷Aphu sokekvu Npugü le zo, “Ale Israel no gwüngwa aka keche hiti, lo ale anyugun no chon pe tanyü dan hontse loti.

³⁸Nyida ntsoka nkekela dan tsü le tsüki we temi le sü pe Jerusalem le gwüngwa tanyü le chonsa pe nga ka rora khishü kelo hontse ti. Tsüsiki anyugun le ale Npugü le tse shati.”