Read Southern Rengma Naga EZEKIEL 37 Bible Online

EZEKIEL 37 - Southern Rengma Naga bible

EZEKIEL 37

¹Ale Npugü le kehü kekvu le age ryü, lo a-kapu gü le a zen-o kazü ketejon nme thyüru le sü kebin bin nyu shü.

²A-le a zen-o kazü ketejon aphu hun shü, lo ale tsünyu thyüru kechon le bin-o hyulo tsü dan le sinteron.

³A-le aka zo, “Silakehü temi gü, thyüru hidan le rhün nilo gwale.” Ale a-kenishü, “Aphu sokekvu Npugü, n npvü tsü zolo gwa le!”

⁴A-le zo, “Thyüru dan ka sidyü zoshü. Thyüru kesin hidan no Npugü jo nyülo tse shülo.

⁵Anyugun ka Aphu sokekvu Npugü, ale anyugun ka zobin letse zolo: Ale teshe hen pe hagun ge shüo hagun no rhünni loti.

⁶Ale yhen lo tsi pe hagun tsüo gi pe je shüti. Ale kehen teshe pe hagun ge shüo hagun no rhün loti. Tsüsiki hagun le ale Npugü letse sha lati.”

⁷Tsügenyu a-le aka zokeshü hontse sidyüjo zoshü. Ale jo zo ketseka, tha khwen tse, tson-o thyüru dan le nnu sen-o keren kü lola.

⁸Ale nribin nsen yhen, tsi le thyüru dan jelo lo tsüsika gi le ryü. Ai min dan ge kehen teshe ndi.

⁹Sunggigü le aka zo, “Silakehü temi gü, Tsangkenbu ka sidyü zoshülo. Tsangkenbu ka Aphu sokekvu Npugü le a-no bin aphu nyu ryü lotse kobin letse shülo, simin hidan ge henshü, tson-o anyugun thyü nrhün nishü lo.”

¹⁰Tsügenyu aka zo keshü hontse sidyü zoshü. Teshe le min dan ge yülo, lo anyugun le rhünlo-o solo.anyugun le chon pe rihü dan thyülo kekü chwiryü.

¹¹Sunggigü le aka zo, “Silakehü temi gü, Israel temi dan le thyüru hidan hontse. Anyugun le kezo le anyugun le sin laso, sidyü kenrin thame ndi letse hü.

¹²Tsügenyu a temi dan ka sidyü zo-o Aphu sokekvu Npugü a higü le anyugun sika khinshe shü titse zolo. Ale anyugun khishwilo-o shwizen gun gü Israel nyu kazü nyu shüti.

¹³Ale a temi pe sun kenjü bin nyu minsun dan khinshe shüo anyugun zenchwi ryülo, anyugun le ale Npugü letse sha loti.

¹⁴Ale a teshe hen pe anyugun ge shüo anyugun thyünrhün nishü ti, tson-o anyugun no anyugun kazü nyu yhun loti. Tsüsiki anyugun le ale Npugü letse sha loti. Ale higü thyü titse zo laso lo ale thyü tsentsü. Ale Npugü ale zo laso.”

¹⁵Npugü le aka zoni:

¹⁶“Silakehü temi gü, thün nme khilo-o tsü ge jo hihontse thulo, ‘Juda rajaphen.’ Lo thünkecha nme khilo-o tsü ge higü thulo, ‘Israel rajaphen.’

¹⁷Tsü hvu tezen kenshwenlo, tson-o tsühvu no nme hontse hyu nrün genyu.

¹⁸Ntemi dan le nka hile a-kon le nyuyo anyu ka zoshülo tse yatselo,

¹⁹anyugun ka Aphu sokekvu Npugü a higü le Israel sunka kebin thün gü khilo-o pe Juda sunka kebin gü kerhün lati tse bin letse zoshü lo. Sha hvu tsü lope thün nme thyüo a ben nyu tezen loti.

²⁰“N ben ka thün shahvu tsü tezen lo-o temi dan no hyulo.

²¹Anyugun ka Aphu sokekvu Npugü a higü le a temi dan senye lihiki gü kelanyu aphu kequen lo, lo anyugun zenryüo anyugun kazü nyu shü lati tse zoshü lo.

²²Ale au kerhün pe kazü tsü gü nyu Israel kazüthun dan ge senye nme thyü lati. Raja nme le anyugun ketsen ti, tson-o au le thame ka-e kenjün nipe senye kenyhun thyü nmvue khikho pe rajaphen kenyhun thyüni loho so.

²³Anyugun kentsükenchen teromen pe anyugun nrhu nmvue muo anyugun kecha sin loho. Ale anyugun le kemu thyü lo a sa kehü tho aphu nyu anyugun hoshü lati. Ale anyugun thyükenshün lati; lo anyugun le a temi thyü; lo ale anyugun Sunggigü thyü ti.

²⁴Raja nme a gogü David hontse kethyü le anyugun raja thyü ti. Anyugun aphu kekvu kesen nme hensin kerhün lati lo joketsin nyu a jvü zen tin lati.

²⁵Anyugun le ale kazü khipe a gogü Jakob ketsü bin, anyugun bon nyu le yhun kehü nyu tsü yhun tin lati. Anyugun le tsü nyu kethonthen yhun ti, anyugun nyenyu lo tsü dan tsipwen aphu Raka nme a gogü David hontse kethyü le kethonthen anyugun so keda thyüti.

²⁶Ale anyugun no kethonthen nyunkhi lo keho thyü nrün anyugun zen-o kejozen loti. Ale anyugun thyü nsoshü lo anyugun temi thyü nchon shüti, lo a Kershvuka lope anyugun kazünyu shü lo tsüle kethonthen bin ti.

²⁷Ale tsünyu anyugun zen-o yhun ti; ale anyugun Sunggigü, lo anyugun le a temi thyü ti.

²⁸Ale a Kershvuka no anyugun dan nyu kethonthen bin nrün thyü keshü ka, senye dan le ale Npugü, lo ale Israel kejü pe a temi thyülo letse sha loti.”