Read Southern Rengma Naga EZEKIEL 38 Bible Online

EZEKIEL 38 - Southern Rengma Naga bible

EZEKIEL 38

¹Npugü le aka zo,

²“Silakehü temi gü, Magog kazü nyu Meshek lo Tubal senye hvu so kekvu kedagü Gog nkhin shülo. A-nkhin shü,

³lo a-ka Aphu sokekvu Npugü a higü le a-kenrhinyu letse zo shülo.

⁴Ale a-sü pe rahun shü, hükhuvü pe a-sapha ka shü, tson-o a-le lo a-shüpahü aphu sü pe shwen lati. A-rihü dan, anyugun keru lo tsü dan ge kedun nyu phinya keme kepvü dan, tsü dan le chonsa, lo gida pvü kehü shüpahü lo zhethon pen kebin aphu.

⁵Persia, sudan lo Libia kipon keryü nyu le a-zen bin, lo aphu gida lo tegi perün pvü hü.

⁶Teso kipon Gomer lo Beth Togarmah kazü kipon terikethyü temi aphu a-zen hü, lo tsü hontse senye kecha kechonka temi-e sin.

⁷A-no gwün ndolo lo a-shüpahü no a-johokeshü zen-o ndo külo lotse zoshü chi.

⁸Chen kethon siki ale a-no senye nme, senye kechon khi ka temi dan zen ni ryüo kequen lo teri kenshvu ndio yhun tin kela nyu whelo tse zoshü ti. A-le Israel kazüthun, chen kethon khela, ai ntsoka temi aphu nyunkhimvuo yhun hükela bin when ti.

⁹A-le lo a-rihü lo a-zen kehü senye kechon dan le tsangkenbu terhi hontse kazü tsü gü when lo khelukesü hontse kazü hen lati.”

¹⁰Higü hile Aphu sokekvu Npugü le Gog ka zobin: “Tsü gwünkho le keryü ka, nle tedo gwakemvu rhi soti.

¹¹Nle temi a-rünyi a-keno lo chwida kendi nyu anyunbwen lo nyunkhimvuo yhun kebin a-kekvu kendi tsü kazü hü titse rhi loti.

¹²Nle temi, gwüngwa nkekela nyida nyu yhun kebin temi dan hon seü lo lapvü loti. Tsü dan le senye dan ki kequen ryülo, lo ntsoka anyugun le senru lo kenya-e hyulo-o kazü lvu nyu yhun bin.

¹³Sheba lo Dadan nyu temi lo Spain rünyi dan hada kethyü nyu le nketso ti, “Nle nrihü dan kequenlo-o me when lo mehon seü lo lati tse ole? Nle rakagi lo suna, senru lo kenya khilo-o tsü dan sen-o tsonchü tiya bin le?”

¹⁴Tsügenyu Aphu sokekvu Npugü le Gog ka zokebin gü pe a-ka zolo tse anishü: “Atemi Israel nyu le nyunkhimvuo yhun ketse ka nle tsonchü shüti

¹⁵teso nithen ki senye kechon ka rihü kvusa kethyü danda aphu no keru ge bin-o zen ryüti.

¹⁶Nle tsangkenbu terhi hontse kazü kesü thyü a temi Israel when ryü ti. Gwünkho le keryü ka ale nnipe a kazü hüti, ale segü yo pe senye dan tesha lo ale hagun zen-o thakethyü nyu a kenshün pe senye dan teshashü nrün genyu.

¹⁷Nduka ale zokehü gü tsü, ale a gonyu, Israel nyu sidyükeshanyu ge bin-o zokeshü le, ale ryükejü jon ki temi peha zenryüo Israel nyu when ti tse shü.” Aphu sokekvu Npugü le zo laso.

¹⁸Aphu sokekvu Npugü le zo, “Gog le Israel hü kethyü nyü, ale nthün sati.

¹⁹Ale anyuntao kezo le, tsünyü Israel nyu kazü le nnu sati.

²⁰Tsehü lo tegü, nyukhu keda keshen, lo kazü so kebin temi aphu a kenshvu genyu ndün ti. Kazüthun le che tsokhin le nren lo kabon le nla ti.

²¹Ale kenke kemhü aphu pe Gog kedün ti. Aphu sokekvu Npugü le zo laso. A-temi le zhethon pe khinyunyu du ti.

²²Ale keho kenyü lo tezi ketsun pe a-shaja thyü shüti. Tsangri sa, tegwün che pe mah lo mah tso kesin rope age, a-rihü dan lo a denzin kehü senye kechon dan ge shüti.

²³Hi hontse kethyü nyu ale gon lo nshün letse pe senye aphu tesha ti. Tsüsiki anyugun le ale Npugü letse sha ti.”