Read Southern Rengma Naga EZEKIEL 39 Bible Online

EZEKIEL 39 - Southern Rengma Naga bible

EZEKIEL 39

¹Aphu sokekvu Npugü le zo, “Silakehü temi gü, Meshek lo Tubal hvu so kekvu gü Gog nkhin-o ale a-kenrhi gü letse zoshü lo.

²Ale a-tson tsin pe tson keshün ki shüo a-le Israel kazüthun dan ka ryülo kemvuthen teso kipon nithen ki a-zen ryüti.

³Tsüsiki ale a-ben njüzin thotsi lo ngwazin tholevü tse kekhüshe lati.

⁴Gog, a-rihü lo a-logwa dan le Israel kazüthun ge si lati, tson-o ale anyugun simin pe tegü lo nyukhu aphu chvü thyü lati.

⁵Anyugun le kendo nyu siti. Aphu sokekvu Npugü le zo laso.

⁶Ale mah pe Magog kazü lo a-tekehun zü se nyu temi le kevükeben ndio yhun kebin bin aphu nyu ro shüti, lo temi aphu ale Npugü letse shati.

⁷Ale a temi Israel no a zan kenshün sha tsentsü lo, lo a zan no kejopvü nila loho. Tsonlo senye dan ale ale Npugü Israel kenshün Sunggigü letse sha loti.”

⁸Aphu sokekvu Npugü le zo, “Ale zokeshü jon gü tsü le ryü tsentsü.

⁹Israel nyu nyida nyu keyhun nyu le chwio mah thyü nrün genyu terikanyü khekela dan kequen loti. Anyugun le gida, tholevü, tsotsi, mi, benkejeü dan pe mah thyü lo anyugun le chen tseryü zeü lo kegwa le bin ti.

¹⁰Anyugun le low ki kejeü sen lü nmvue tehen ki tesen phün mvue gwa lati, kechamvule terikanyü dan pe zeü lo kegwa kechon le bin lati. anyugun le mele anyugun hon seü lo lapvü tinkela nyu hon seü lo nilo lati.” Aphu sokekvu Npugü le zo laso.

¹¹Npugü le zo, “Hidan aphu thyü ryülo ale Israel nyu kenjwen nyu kazü ketejon gü nyu Gog sun nrün kazü pe a-tsü ti, tsü le kesi zida nphozin. Gog lo a-rihü aphu pe tsünyu sun ti, lo ketejon tsü gü lope ‘Gog rihü kazü ketejon letse ko lati.’

¹²Israel nyu le simin dan aphu sun lao kazü thyü kenshün niti.

¹³Kazü tsügü nyu temi aphu anyugun kecheo tsü dan sun ti, lo anyugun le ale kvukelo jon higenyu kerühvu pvü loti. Aphu sokekvu Npugü le zo laso.

¹⁴Shye tsenyü penkela siki, temi kejülo-o anyugun no kazü aphu ka ho-o simin sun ti mvu kebin dan fü pe sun lati. Tson-o anyugun le kazü gü thyü kenshün lati.

¹⁵Anyugun le kazü tsünyu nsin nsheo temi ru hyukelo bin ka tha zensü thyü pe bin njüo minsun ketso nyu le ryüo tsüdan pe Gog rihü dan kazüketejon ki sunla kegwa thyü ti.

¹⁶(Tsükho ka rihü dan zen ka tho kethyü rünyi nme le bin ti.) Tson-o kazü gü thyü kenshün ni lati.”

¹⁷Aphu sokekvu Npugü le aka zo, “Silakehü temi gü, lihizin tegü lo nyukhu aphu no ryüo ale anyugun genyu rora nda kebin gü tyü lotse koshülo. Tsü le Israel kazüthun dan ge keho keda thyüo tsünyu anyugun le thyü tyü lo tezi tsü loti.

¹⁸Anyugun le shüpahü nyu simin tyü lo kazü nyu kekvu kesen nyu zi tsü ti, anyugun aphu tenyü tse, tanyü nyu, tanyü nmvue thu tse kegwa hontseo ga kü lati.

¹⁹Ale kerüshvu tho kethyü hontse temi hidan boshvu shülo, tegü lo nyukhu dan le thyü a-keshvu anyugun le tyülo kegwathen tyü lo tezi tsü nzeülo kemvuthen tsüti.

²⁰A miz nyu keru kezen nyu tsü ge kedun nyu, shüpahü lo teri temi zen-o tyütsü pe kesü thyü loti. Aphu sokekvu Npugü ale zo laso.”

²¹Npugü le zo, “Ale senye dan no a zan kechwi hyu ale dihontse a kekvu sen-o kenjü nyu rhikelo dan thyülo yo, pe anyugun hishü ti.

²²Israel nyu le tsü gerho ale Npugü anyugun Sunggigü letse shalo lati.

²³Lo senye dan le Israel nyu le mu pe a ntsun kela genyu me kazü ki tinla letse sha loti. Ale rani tin lao anyugun kenrhinyu no anyugun so kvulo-o teri nyu anyugun boshvula.

²⁴Ale anyugun le nshün kemvu lo serikemvu genyu hyulo kezü pe anyugun tsüla, lo ale anyugun kipon ranila.”

²⁵Aphu sokekvu Npugü le zo, “Ntsoka we ale Jakob tsipwen, Israel temi dan shwi njün shüo anyugun no gwakenye ni loti. Ale a zan kenshün gü ntsen loti.

²⁶Anyugun le gwüngwa anyugun kazünyu kenshvu ndi lo nme-e anyugun kedün mvuo yhun nikelo ka, anyugun le dihontse a sa kela genyu kejo pvükela tsü nmhin lati.

²⁷Senye kechon ka ale nshün tse kethyü pe hishü nrün genyu, ale a temi anyugun kenrhinyu kazü aphu ka yhun kebin dan zenni ryü lati.

²⁸Tsüka atemi dan le ale Npugü, anyugun Sunggigü letse sha loti. Anyugun le tsü sha loti, kechamvule ale anyugun nipe dothyü tinlao ntsoka anyugun nme-e khela mvu tse zen niryü anyugun kazü nyu kequenlo kela genyu.

²⁹Ale a kapu run pe Israel temi ge shüti, lo anyugun kheo rani tinla loho so. Aphu sokekvu Npugü ale zo laso.”