Read Southern Rengma Naga EZEKIEL 4 Bible Online

EZEKIEL 4 - Southern Rengma Naga bible

EZEKIEL 4

¹Sunggigü le zo, “Silakehü temi gü, ginpon nme pe nmhundyü ka shülo, lo tsü ge Jerusalem me rhilo.

²Tson-o tsü hunlo kela kendyü ka kazü kü tso, chwida khwe, kensenbin thyü lo rikhun bin thyülo, lo chwida vüshwen nrün me zü pe hunlo.

³Tegi nme khilo-o tsü lope nyida gü hai jaka chwida hontse lo. Nyida gü ntsunlo. Me le tsü hunlo laso, lo hunkebin gü tsü le nle. Hilo pe Israel nyu senye genyu zensü thyüti.

⁴“Lo nle n ngwazin jülo lo ale Israel senye thyükezü pe nge shüti. Jon 390 nle anyugun thyükezü genyu tsünyu bin-o kenjün thyü ti. Ale anyugun shaja jon le pen nrün zensü ngenyu khenyüme lope anyugun chen nme thyüti.

⁶Nle tsü penlo lo n njüzin rani güo Juda thyükezü genyu jon henzi kenjün thyü lo khenyüme le anyugun shaja chen me thyü ti.

⁷“Jerusalem hunkelo ge tsü nyhütyü pe nriryülo. N jenthün thyü pe nyida gü ntsun-o sidyüjo zolo.

⁸Ale nphin lao tsü hun lola kemvuthen nle lihizin khendon loho.

⁹“Tho, barley, rhütsi, rhüchü, nsü lo nyerhi peha khilo. Tsü dan aphu kerhün pe tensü thyülo. Tsü lope nle n ngwazin jon 390 khendon ketseka tyü ti.

¹⁰Khenyüme nno tensü gram 230 tyü ti, lo tsü le gun gü tsü sigü nyü titi.

¹¹Ketsüzü ko a-kho thyüo khenyüme honpen kenyhun tsüti.

¹²Nle temi vü kenko pe mah thyüo tensü tsen, lo temi aphu hyulo kegwa bin nyu tyü ti.”

¹³Npugü le zo, “Tsü le Israel temi no ale anyugun hü kezen pe sin rünyi tsipwen dan ka shükela ka anyugun le tejvü nyu khin kehü ketyüketsü tyü kethyü zensü thyüti.”

¹⁴Ai ale zoni, “Nmvule, Aphu sokekvu Npugü! Ale athyü nrhu mvu zun le. A nche kanyu nyukhu a-npvü kesi nmvue ntün thyü tyü hü mvule. Ale nshünmvu letse kehü ketyüketsü lihie sen mvu zun le.”

¹⁵Tsügenyu Sunggigü le zo, “Gwasa. Ale nno tsü sunka methu vü sen ti, lo nle tsüge tensü tsen ti.”

¹⁶A-le zoni, “Silakehü temi gü, ale ketyüketsü nipe Jerusalem ketsü khinla tiso. Tsünyu temi dan le anyugun chvü lo ketsüzü ndo-o anyugun shese lo nyun nkhi soti.

¹⁷Ketyüketsü rho lati; anyugun le nyun ketsemi thyü, lo anyugun kemu chün genyu nke lati.”