Read Southern Rengma Naga EZEKIEL 41 Bible Online

EZEKIEL 41 - Southern Rengma Naga bible

EZEKIEL 41

¹Tsüsika temi gü le a zen-o katsen lvu gü kenshünbin gü ka yü. A-le tsünyu keyü tson ndolo; tsü le meter kenshen ntsun,

²meter pvün nmhun tsü le a-te lihizin hükethyü a-kesü meter kenyhun-o peha le bin. A-le katsen tsü gü ndolo: tsü le meter nki thon, lo meter tseryü nmhun.

³Tsüsika a-le kanyutsen kentsun tsin gü ka yü. A-le tsünyu keyütson gü ndolo: tsü le meter nme ntsun lo meter kenshen nmhun. a-te lihizin hü kethyü a-kesü le meter kenshen-o peha.

⁴A-le katsen tsü gü ndolo, a-kethon keda le meter tseryü ketun. Tson-o a-le aka zo, “Higü le KENSHÜNTSIN BIN.”

⁵Temi gü le Kershvuka gü nyuzin ndolo, tsü le meter kenshen. Kershvuka kabon kensü katsen kenshen shen a-kemhun le meter kenyhun thyü pe bin njü.

⁶Ka hidan le hie shen shen, lo he nme ka katsen shenryü. Kershvuka kehun ngwenzin kabon gü tsü le kahe tesingü nyeki rüpvü kvu, tson-o katsen dan tsü no Kershvuka kehü gü minren mvuo sunlo nrün genyu.

⁷Tson-o Kershvuka kabon tsü le tegwen ki bin-o hyulo a-pe keti a-kesü le akenme la nrün genyu. Kershvuka ngwen ki kabon, denzin, katsen dan ngwenzin, tesoki kekü tson kamhun kenyhun thyü njü, tson-o ketsenyo ki bin-o a-lvu gü lo tesogü ki külo nrün genyu.

⁸Katsen hidan kehü ngwen gü, le meter kenyhun-o peha; khenpvü nme le Kershvuka tesozin katsen dan ki yü, lo nme le tesinzin keyü tson. Ale tesoki ketejon meter kenyhun-o peha le Kershvuka hun kebin hyu; tsü le kazü soki meter kenshen. Lo tsü le Kershvuka kabon nsüo katsen dan binkezen zen-o kentsin. Ketejon gü lo Püshükeda dan ale bin kehü ka dan jaka bin kenrun meter tseryü le kehun ka rhon bin.

¹²Bin kenrun gü keniki Kershvuka nkhünzin ka nme a-kethon le meter henzipvün a-keda meter shenryü pvün le bin; a-kehü kesü le meter kenyhun-o peha le hun keti bin.

¹³Temi gü le Kershvuka ngwenzin ndolo, a-kethon le meter henpvün. Lo Kershvuka sikipon, bin kenrun ka gü nkhünzin keti meter henpvün,

¹⁴Kershvuka mhundyüzin bin kenrun gü lihizin kesin-o a-kethon le meter henpvün.

¹⁵A-le nkhünzin ka kethon lope lihizin tson tse ndo kesinlo, tsü le meter henpvün. Kershvuka nyu keyü tson katsen, Kenshün Bin gü, lo Kenshüntsin Bin gü

¹⁶aphu kela ka tsü kafüphe keti tesen pe thyüzegwa kübin. Kafüphe hidan le khinlo hü.

¹⁷Kershvuka nyuki kabon ge khenpvü so keti

¹⁸kvubin lo cherubim nyukhu men yhen njü. Kvubin nmeme lope cherubim kenyhun jaka shü njü, tsü le kabon gü kehun aphu. Cherubim nme le a-mhun kenyhun yhun;

¹⁹nmezin le temi mhun hontse kvubin ntsun, lo kecha zin le shünyho mhun hontse pe senbin kecha gü ntsun. Tsü hontse pe kabon aphu hun njü,

²⁰kazü ka kü khenpvü so keti.

²¹Kenshünbin gü khenpvü kekho kethon keda kenme. Kenshüntsin gü Bin nyu keyü tson mhundyü tha nme nri pe

²²tesen pe kethyü kershvubin hontse. Tsü le meter nme-o peha tetso lo meter nme nmhun. A-qün ka ketun, a-sin, lo a-kehü aphu tesen pe thyü. Temi gü le aka zo, “Miz higü le Npugü le kehü bin nyu shükehü gü tsü le.”

²³Kenshün Bin nyu keyü tson keni ki kakhin nme, lo Kenshüntsin Bin nyu keyü tson keni ki ko nme tse bin.

²⁴Kakhin tsü hvu tsü le ponhvu thyüo a-lvu nyu khinshe hü.

²⁵Kenshün Bin kakhin tsühvu ge ko kabon ge kebin hontse kvubin lo cherubim men yhen njü. Keyü tson katsen ngwenzin tesen pe sunnjü.

²⁶Katsen tezin kafüphe le bin, lo kabon dan ge kvubin dan zü pe nthyü njü.