Read Southern Rengma Naga EZEKIEL 42 Bible Online

EZEKIEL 42 - Southern Rengma Naga bible

EZEKIEL 42

¹Tsüsiki temi gü le azen-o kamhun ngwen gü ki gü, lo a tsonri sen-o Kershvuka tesozin ka nme nyu gü, tsü le Kershvuka nkhünzin ka le kebin gü zen-o nithen sarimvu.

²Ka higü le meter henpvün thon lo meter nkipvün nmhun.

³Ka tsü gü nme zin le bin kenrun meter tseryü tsü le Kershvuka gü kejvü kebin gü ntsun bin. Tsü le heshen thyü njü, tesogü le a-hensin gü nyeki tsekhin kvu kvu tse thyü njü.

⁴Ka tesozin kipon tson nme a-keda le meter pvün lo a-kethon le meter henpvün tse bin, tsü denzin keyü tson le bin.

⁵Tesoki katsen dan le tesin hvu nyeki she, kechamvu tesoki katsen dan le tesen kü kela genyu.

⁶Ka he kenshen ka katsen aphu abon ketejon ge senbin, tsü le kamhun ka ka dan hontse kachon no rhun mvu.

⁷Tesin gü ka ka kehü ngwen gü le meter nkipvün keti hü kethü ndi, tsü le a-kethon peha kho; lo meter nkipvün le kebin ka tsü katsen dan le bin. Tesotsin gü ka ka kethon aphu katsen le bin.

⁹Katsen tsühvu hensin ka gü nphozin keni ki ka kehü le binzen kebin bin nyu kamhun ngwen ki kegü tson nme le bin. Kershvuka tesinzin kipon, nkhünzin teki ka gü zen-o nithensa kemvu ki ka tsü hontse kethyü nme le bin.

¹¹Tesozin kipon hontse katsen dan mhundyü keyü tson le bin. Tsü aphu kethonkeda ketun, a-kethyü jvü, keyü tson aphu kenme.

¹²Nphozin keni ki ka kehü binkezen bin ki ka gü tesinzin katsen dan hensin kakhin nme le bin.

¹³Temi gü le aka zo, “Ka hihvu nren nshün. Tsünyu Püshükedanyu Npugü le kehü bin nyu yü kehü dan le tha hokeshü kenshüntsin kanyü dan tyü hü. Katsen dan le nshün, tsügenyu, Püshükedanyu le tha hokeshü kenshüntsin dan pe tsünyu shü hü: tsü dan le shyeni pe kerüshvu tho kethyü, lo kemu genyu kerüshvu tho thyü keshü nmvue thoni kethyü kerüshvu hon dan.

¹⁴Püshükedanyu le Kershvuka nyu bin ntseo kamhun ngwen gü ki chwinyü yatselo anyugun le Npugü rüshvu ketse ka ben kehü phinya dan pe katsen hidan ka shüla mvu loshvu. Anyugun le tegwen ki temi dan le kebin bin nyu chwikemvu ka phinya kecha ben lola mu loshvu.”

¹⁵Temi gü le Kershvuka nyuzin nda penkelo siki a zen-o npho chonrha nyu chwio tegwen zin ndolo.

¹⁶A-le kendovü khilo-o nphozin ndolo, tsü le meter 250.

¹⁷Tsüsiki a-le tesozin, tesinzin lo nkhünzin ndolo, aphu kethon kenme, tsü le meter 250,

²⁰tsügenyu ka kehun tsü aphu meter 250 ketun kü. Ka kehü tsü le Kenshün lo nshün kemvu hükho kecha cha thyü bin.