Read Southern Rengma Naga EZEKIEL 43 Bible Online

EZEKIEL 43 - Southern Rengma Naga bible

EZEKIEL 43

¹Temi gü le a zen-o Chonrha nphozin ntsun kebin gü nyu gü,

²lo tsü ki ale nphozin Npugü Israel Sunggigü le kehü keben le ryü kejü hyu. Sunggigü khwen le zükeda khwen hontse chwiryü, lo keben gü le kazü gwen nben la.

³Tsemin higü hile Sunggigü le Jerusalem nke titse keryü ka ale kehyu tsü hontse, lo Khebar züri nyu ale kehyu gü hontse. Tsüselo ale kazü nyu nkhün rün tsüla.

⁴Keben tsü gü le npho chonrha nken ryüo Kershvuka nyu yüla.

⁵Npugü kapu gü le a sü solo-o a zen kamhun nyuzin gü ki yüla, tsünyu Npugü zan kechwi le Kershvuka sü kebin hyu.

⁶Temi gü le a khoka sobin, lo ale Npugü le Kershvuka nyu bin-o a nthon kebin nyülo:

⁷“Silakehü temi gü, hile a rajakhün le. Ale hinyu hi Israel temi dan nyu yhun-o kethonthen anyugun so keda thyü ti. Israel temi nmvue anyugun raja nme-e hinyu tero rüshvu nmvue anyugun raja nyu simin sun-o azan thyü nrhu loho so.

⁸Raja nyu le shyekenyuh bin thyüo anyugun kedabin khenpvü kachon lope shyekenyuh bin lo a Kershvuka khenpvü kachon ntsun, tson-o agun jaka ka kehü nme nti. Tson-o anyugun le kentsükenchen tho dan thyüo kejokepvü pe azan ge shü, tsügenyu ale anyunkenta ka anyugun nkela.

⁹Ntsoka we anyugun le tero kecha rüshvu kethyü khela lo anyugun rajadan simin khila mvu loshvu so. Anyugun le tsonlo yatselo ale kethonthen anyugun dan nyu hüti.”

¹⁰Npugü le zonio, “Silakehü temi gü, Israel temi dan ka Kershvuka rüla pe zoshü, lo anyugun no tsü rüchün-o anyugun kemu thodan genyu kejolo.

¹¹Tson-o anyugun le thyükela dan genyu kejala lo, Kershvuka thyükelo do zokho pe anyugun zen shü: tsünyu keyü lo kechwi tson dan, a-joja, keren kethyü aphu, lo tsügenyu then mvulo keshvu tejvü dan aphu. Anyugun genyu hidan aphu thulo tson-o anyugun no dihontse tha hidan aphu nda kenjü shalo-o tejvü dan aphu thyü chwiryülo nrün genyu.

¹²Higü hile Kershvuka gü genyu tejvü: A-kehun aphu gun gü kazüthun gü keti nshün lo rhu mvu.”

¹³Hidan hile Kershvuka gü kendo ka ndo kelo jvü hontse kershvubin ndokelo. Kershvubin kejwe te kehun zü tson le centimeter henpvü ntsun lo centimeter henpvün nmhun, ngwenzin a-te ketetso le centimeter nkipvün.

¹⁴Kershvubin a-pesun ka tsü gü tesintsin gü keti le meter nme tetso. Tsüsigü le centimeter henpvün nyeki kethon-kegon aphu shenkvu, lo a-ketetso le meter kenyhun. Tsüsigü ko a-te kehun aphu ka centimeter henpvün shen kvu.

¹⁵Tesotsin gü, kerüshvu tho pe ro kehü bin higü ko meter kenyhun tetso. A-qün pezi dan le kecha nyeki tetso.

¹⁶Kershvubin tesogü hile nme zin meter tseroro kethun kü.

¹⁷A-lvu gü ko ketun, a-te nme zin meter tsenyü, lo a-te kehun le centimeter nkipvün tetso. (Ketsun tson le centimeter henpvün nmhun.) Kershvubin ki kü nrün nphozin phalvu le kü bin.

¹⁸Aphu sokekvu Npugü le aka zo, “Silakehü temi gü, ale nka zokebin hi nyülo. Kershvubin gü tsü thyülo lo, nle tsü ge kerüshvu hon dan ro lo nyukhu pe kerüshvu tho thyü kela dan zi kezen pe tsü ge shüo thyükenshün ti.

¹⁹Levi tsipwen nyu Püshükeda thyü kebin dan, Zadok ge tsü keryü dan nti le ale kehü bin nyu ryüo alothyü ti. Aphu sokekvu Npugü ahigü le jo higü hoshü. Nle methutse bwe nme pe anyugun tsüo anyugun le pe kemu rothyü ti.

²⁰Nle tsü gü zi peha khilo-o pe kershvubin tesotsin gü a-qün ka kentun dan nye, lo alvu gü qün dan ge shü, lo a-te kehun aphu ka shüti. Hihontseo kershvubin gü thyü kenshün lo khikho ti.

²¹Nle kemu rothyü nrün genyu khikeshü methutse gü khilo-o pe Kershvuka tegwen ki bin kentsen nme ka roti.

²²Tsüsinyü nle tenyütse tetsin kendi nme khilo-o pe kemu genyu kerüshvu thyü ti. Nle methutse pe thyü keshü hontse tsü gü zi lope kershvubin gü thyü kenshün ti.

²³Nle tsü penla lo tetsin kendi methutse bwen nme lo tenyübwen nme tse khilo,

²⁴tson-o tsühvu zenryü a tsülo. Püshükedanyu le tsi lope tsühvu ge kezen shü lo rope a rüshvu ti.

²⁵Jon tsenyü tsü khenyüme le tenyü nme, methutse nme, lo tanyütse nme pe kemu rothyü ti. Tsü dan aphu tetsin nme-e kendi mvuloshvu.

²⁶Jon tsenyü püshükedanyu le kershvubin gü thyü kenshün pe senlo kegwa thyü ti.

²⁷Jon tsenyü penla lo, Püshükedanyu le kershvubin gü ge rope kerüshvu tho, temi dan kepvüshe kethyü kerüshvu pe tsü ge rüshvu so lati. Tsonlo ale hagun aphu zen-o akenyü loti. Aphu sokekvu Npugü a higü le zo laso.”