Read Southern Rengma Naga EZEKIEL 44 Bible Online

EZEKIEL 44 - Southern Rengma Naga bible

EZEKIEL 44

¹Temi gü le a zen-o Kershvuka npho kipon chonrha ngwen kipon gü. Chonrha gü khinla,

²lo Npugü le aka zo, “Chonrha higü le khin bin ti lo khinshe loho. Temi nme-e no tsü sen loho, kechamvule Npugü Israel Sunggigü ale tsünyu yüla. Tsüle khin bin ti.

³Ai kekvu sen kebin rajagü we tsünyu yüo ale kehübin nyu kenshün ketyüketsü tyülo gwa. A-le chonrha tson ka güo katsen nyuzin keni kipon chwi lati.”

⁴Tsüsika temi gü le a zen-o chonrha tesogü nyu yüo Kershvuka mhundyü nyu gü. Ale nrishü ntsin Npugü keben benchvü tse kethyü le Kershvuka sü kebin hyu. Tson-o ale kazü nyu nkhün tsüla,

⁵Npugü le aka zo, “Silakehütemi gü, nle kehyu lo nyükelo aphu nyuyhünsa shülo. Ale Kershvuka gü genyu then nrün tejvü dan pe nka zo tiya bin nyo. Senyu le Kershvuka nyu yü lo chwi logwa, lo senyu le nmvu yo petsüsa tse thulo.

⁶“Me nyhen kehü Israel temi dan ka Aphu sokekvu Npugü a higü le anyugun le kentsükenchen thothyü hükela dan tsü nyhen loho sele tse zoshü lo.

⁷Anyugun le senru pe kerüshvu kethyü keshvu lo tezi pe arüshvu ketse ka girükemvu rünyi kechanyu, ajo zen hü kemvu nyu no Kershvuka nyu yüryüo a Kershvuka nrhu laso. Tsügenyu atemi dan le kentsükenchen tho dan aphu thyüo ale kejozenkelo gü borho laso.

⁸Anyugun le a Kershvuka nyu kenshün jvü dan ketsenlo mvuo rünyi kechanyu no tsü ketsen.

⁹“Aphu sokekvu Npugü ale zobin, a-girükemvu rünyi kechanyu, akhwen nyü hükemvunyu nme-e no a Kershvuka nyu yü loho, rünyi kecha Israel temi dan nyu yhun kebin nyu nme-e no yü loho.”

¹⁰Npugü le aka zo, “Ale Levinyu Israel nyu kecha sin-o akhela lo teromen kezü rüshvu tinkela nyu shaja pe tsü bin nyo.

¹¹Anyugun le chonrha kentsen nyu thyü lo Kershvuka nyu tha tho thyülo gwa. Anyugun le mele rope rüshvu nrün senru sen keryü lo kerüshvu tho genyu sen keryü dan dushvu logwa, lo anyugun le temi dan lothyü bin ti.

¹²Ai anyugun le Israel nyu genyu teromen kezü kerüshvu ketsen lo tson-o temi dan no mu kela genyu, Aphu sokekvu Npugü ahigü le swe ketsin thyü bin, anyugun shaja hyulo la mvulo shvu.

¹³Anyugun no püshükedanyu hontse alothyü kemvui, nmvue thalihie amhundyü ka kenshün khonni loho, nmvue aKenshüntsin Bin nyu yü loho. Hile anyugun nyun nyu kentsükechen thyükela shaja.

¹⁴Ale anyugun no Kershvuka nyu tha keshekeren thyü lotse shü bin nyo.”

¹⁵Aphu sokekvu Npugü le zo, “Levi tsipwen Zadok ge tsü keryü püshükeda dan we Israel temi kecha le akhela-e joketsin sen-o Kershvuka nyu lothyü. Tsügenyu tsü dan le a lothyü lo a kehü bin nyu ryüo senru pe kerüshvu dan keshvu lo tezi pe a tsüti.

¹⁶Anyugun npvü a Kershvuka nyu yüryü, kershvubin lo Kershvuka nyu kerüshvu tho dan ketsen ti.

¹⁷Anyugun le Kershvuka kamhun nyuzin gü nyu keyü chonrha nyu yü lolo anyugun le linen phi ben loti. Anyugun le kamhun nyuzin gü nmvue Kershvuka nyu ra ketse ka we thyühü phi nme-e ben kemvui.

¹⁸Anyugun no tseyhün mvu lo nrün genyu, anyugun le linen pekeje lo linen nya nya ti, ai senkephin pvü kemvui.

¹⁹Anyugun le temi dan le kebin kamhun ngwenzin chwikemvu ka anyugun le Kershvuka nyu lothyü ketseka sen kehü phinya dan khipe kenshün katsen dan ka shüla rimvu loshvu. Anyugun le temi dan thyü nshvula mvu nrün genyu phinya kecha pvülo la mvu loshvu.

²⁰“Püshükedanyu le anyugun pe when nmvue anyugun shün kethon pvü loho. Ai anyugun le a-kho thyüpvü mvu loshvu.

²¹Püshükedanyu le kamhun nyuzin gü ki yükemvu ka zu lihie tsü loshvu.

²²Püshükedanyu le mele khekela nyu lo loshvu; a-le Israel lünyu phusen nmvue püshükedanyu le sikela nyu nu loti.

²³“Püshükedanyu le kenshün lo nshün kemvu, lo tejvü nyu nshün lo nshünkemvu zo kekho pe a temi senthyü ti.

²⁴Tejvü nyu kenya kenyü kethyü le soryü lo, Püshükedanyu le a tejvü nyu hontse pen shüti. Anyugun le ajvü lo then mvulo keshvu thu kenjü hontse nyünyü nga dan then ti, lo anyugun le Sabbath zen kenshün ti.

²⁵“Püshükedanyu nmele a pvüjvü, a-nyenyu, a-tsasikezenyu nmvue a-lügi kalvu kemvu nyu kemvu we a-le simin kecha kesüo tejvü nyu nshün mvukela thyü loshvu.

²⁶A-le nshün nila lo, jon tsenyü khwen niti

²⁷lo tsüsiki a-le Kershvuka nyu kerüshvu thyüni lo nrün genyu Kershvuka kamhun nyuzin yüo a-thyükenshün kethyü kerüshvu thyüti. Aphu sokekvu Npugü ahigü le zo laso.

²⁸“Püshükedanyu le ale pe Israel nyu ketsü hontse anyugun Püshükeda kela pe anyugun nyenyu-nyenyu tsüti. Anyugun le Israel dan nyu anyugun jün thyü kemvui; anyugun sen mvulo keshvu aphu age bin.

²⁹Shyeni pe kerüshvu, kemu genyu kerüshvu lo kethun nikethyü kerüshvu dan tsü le püshükedanyu chvü, lo anyugun le Israel temi dan le agenyu khikho keshü lihie lo loti.

³⁰Püshükedanyu le tha hyulo keri aphu ka kegwatsin lope azan nyu keshü lihie lo loti. Temi dan le tensü ketsen aphu ka tsenlo keri gü pe tha hokeshü hontse pe püshükedanyu tsüti, lo a jochü le anyugun ka nyu bin hüti.

³¹Püshükedanyu le tegü nmvue nyukhu a npvü kesi nmvue nyukhu kecha le ten kela tyü loshvu.”