Read Southern Rengma Naga EZEKIEL 46 Bible Online

EZEKIEL 46 - Southern Rengma Naga bible

EZEKIEL 46

¹Aphu sokekvu Npugü le zo, “Npho chonrha tson kamhun nyu zin keyü gü tsü tha kethyü jon tsero tsü khinla mvulo shvu, ai tsü le Sabbath lo shye Keshün Nga jon nyü khinshe ti.

²Raja thyü kebin gü le kamhun ngwen gü ki nyu bin-o chonrha tson nyu katsen kedagü ki yüo püshükedagü le kerüshvu apentha ro lo kepvüshe kerüshvu thyü ketse ka chonrha kachon khoka sobin ti. A-le chonrha tsünyu rüshvuo nichwi lati. Chonrha gü le ngwün gü thyü kemvu then khin loho.

³Sabbath lo shye Keshün Nga tsen temi aphu chonrha mhundyü nyu nkhün-o Npugü rüshvuti.

⁴“Sabbath jon nyü rajagü le apentha rope kerüshvu thyü nrün tetsin kendi tanyü nyu tsero lo tenyütse nme sen-o Npugü ki ryüti.

⁵Tenyütse nme genyu shenpvürhütsi epha nme, lo tanyü nyu nme genyu a-le nyu pe shünyü bin yo sen ryü ti. Shyeni pe kerüshvu tsühontse kethyü nme genyu a-le oliv ter liter kenshen senryü ti.

⁶Shye Keshün Nga nyü a-le methutse bwe nme, tanyü nyu tsero lo tenyütse nme, aphu tetsin kendi pe rüshvuti.

⁷Methutse nme lo tenyütse nme kesin kedasha epha nme. shyeni pe kerüshvu tsühontse kethyü nme genyu oliv ter liter kenshen pe shüti.

⁸Rajagü le chonrha tson nyu katsen gü nyu yüo a-le yükeryü tson nyu nichwi lati.

⁹“Nga gwünkho lihikae temi dan le Npugü rüshvu titse keryü ka, chonrha tesogü ka keyü nyu no rüshvukelo siki chonrha tesin gü ka chwila, lo senyu le chonrha tesin gü ka yüyo tsünyu no chonrha tesogü ki chwila mvu loshvu. Temi nme-e a-le yükeryü tson nyu chwi loho, ai chonrha tsü gü kentsun gü nyu chwila mvu loshvu.

¹⁰Rajagü le temi dan le yükeryü ka yüryü lo anyugun le kechwi ka chwila tse mvu loshvu.

¹¹Keho jon lo nga jon dan ka shyeni pe kerüshvu le epha nme pe methutse nmvue tenyütse sin, lo rüshvu kebin gü le tanyünyu nme genyu nyu pe shünyü yo shüti. Oliv ter liter kenshen pe shyeni pe kerüshvu tsü hontse kethyü ka shüti.”

¹²“Raja thyü kebin gü le a-kenyü ka kerüshvu thyü pe Npugü tsünyü lo, apentha rope kerüshvu metse nmvue kepvüshe kerüshvu thyü titse ai, npho chonrha kamhun nyuzin ki yü kehü gü tsü khinshe pe a-tsü mvu loshvu. A-le Sabbath jon nyü thyü kehü jvü hontse kerüshvu thyü ti, lo a-le nichwi kela siki chonrha gü khinnila mvu loshvu.”

¹³Npugü le zo, “Tanyü chen me nyu tetsin kendi apentha rope Npugü kerüshvu thyüti. Kerüshvu higü hile Khenyütsen thyü mvu loshvu.

¹⁴Lo lonyütsen tho kilogram kenyhun lope oliv ter kerhün kethyü pe rüshvu ti. Ker"shvu thyü pe Npugü ketsü jvü higü hile kethonthen thyü ti.

¹⁵Tanyünyu, tho lo oliv ter hidan pe Npugü kerüshvu hile lonyütsen lo kethonthen thyü ti.”

¹⁶Aphu sokekvu Npugü le johoshü: “Raja thyü kebin gü le a-kazü lihie pe jwe thyü pe a-nyu nme tsü yatselo tsü le nyu tsü gü kaminyu hon thyüti.

¹⁷Ai raja thyü kebin gü le a-kazü lihie pe a-lokethyü nyu lihigüe tsü yatselo ranikelo chen le keryü ka tsü le raja gü hon thyüni lati. Tsü le a-hon thyüo a-nyudan nti no a-zin tsü pe anyugun hon thyü loti.

¹⁸Raja thyü kebin gü le temi dan hon nme-e sen tinlo nrün ndi. A-le kazü lihika pe anyu dan tsü-e tsü no pe a-ketsü kazü ka mvu loshvu, tson-o a-no atemi nme-e kazü khilo-o anyugun nshwe mvulo nrün genyu.”

¹⁹Tsüsika temi gü le azen-o kamhun nyuzin tesinzin chonrha khoka katsen dan ki keyü tson tesokipon ntsun kebin gü nyu yü. Hile Püshükedanyu genyu katsen kenshün dan. A-le npho katsen dan kipon bin nme tsin-o

²⁰zo, “Bin higü nyu Püshükedanyu le kemu genyu nmvue thoni kethyü kerüshvu thyü khi keshü ni nrün bin le, lo tho pe kerüshvu tsen hü, tson-o kenshün kanyü nme-e sen kamhun ngwen ki chwio temi dan kechala lo keshvu genyu.”

²¹Tsüsika a-le azen-o kamhun ngwen gü ki chwio a-qün pezi dan aphu ka kamhun kesheshe le bin kü kethyü pe ahishü, a-kethon le meter nki lo a-kegon le meter tseryü pvün.

²³Aphu tso lope chwida thyüo mahphun kethyü bin pe a-kehü nsü kü bin.

²⁴Temi gü le aka zo, “Kebonkeni ka hidan hile Kershvuka nyu lokethyü nyu le temi dan le kerüshvu khikeshü ni nrün ka le.”