Read Southern Rengma Naga EZEKIEL 48 Bible Online

EZEKIEL 48 - Southern Rengma Naga bible

EZEKIEL 48

¹Tesozin terhi le nphozin Mediterranean zida ka nyu binzen-o Hethlon nyida ki, Hamath Pass ki, Enon nyida ki, gü Damaska lo Hamath rajaphen au jaka terhi keti. Tsipwen nmeme le npho terhi nkhün zin ka gü Mediterranean zida keti anyugun jün hyu loti, tesoki gü tesin keti honti: Dan Asher Naftali Manasseh Efraim Reuben Juda

⁸Tsüsi gü ka kazü kekenjün gü lope nmvulo keshvu tsin genyu senkho ti. Tsü le tesozin gü tesin keti kilometer tseryü kenyhun-o ponha nmhun, lo kenjün pe tsipwen dan ketsü hontse npho ka gü nkhün keti ko a-kethon le kenme. Kershvuka le kekenjün hinyu ti.

⁹Kazü kekenjün higü lvu nyu, bin kegwatsin kilometer tseryü kenyhun-o ponha thon lo kilometer tseryü gon kethyü senkho pe Npugü tsü ti.

¹⁰Püshükedanyu le bin kenshün hinyu anyugun jün hyu loti. Nkhünzin gü npho keti anyugun jün kilometer tseryü kenyhun-o ponha ndo ti, lo tesozin gü tesin keti kilometer pvün. Npugü Kershvuka lope bin higü lvu nyu thyü ti.

¹¹Bin kenshün higü lope Zadok nyenyu püshükeda thyü kebin dan tsüti. Anyugun le Levi tsipwen nyu kecha dan hontseo gwakemvu kethyü nyu Israel tsipwen kecha zen kerhünla mvuo joketsin nyu alothyü.

¹²Tsügenyu Levi tsipwen kazü nye ka kazü kecha kethyü hyu loti, lo tsü le aphu dan nyu kenshüntsin thyüti.

¹³Levinyu dan ko püshükedanyu hon nyeka tesinzin hyu loti. Tsü ko npho ka gü nkhün keti kilometer tseryü kenyhun-o ponha, tesozin gü tesin keti kilometer pvün.

¹⁴Bin khikho pe Npugü ketsü gü tsü le kegwatsin, lo nme-e kazü kecha pe tsü kelu nmvue sen-o kecha ki tinlo nrün ndi. Tsü le nshün lo Npugü hon.

¹⁵A-sen bin kecha nme kilometer tseryü kenyhun thon lo kilometer kenyhun-o ponha gon, kethyü gü tsü le nshün mvu, ai tsü le temi süda gü no sen nrün genyu. Anyugun le tsünyu yhun-o tsü senlo gwa. Nyida gü le tsü lvu nyu ti,

¹⁶lo tsü le qünzi nren ketun küo a-qwün nme zin meter 2,250 thyü ti.

¹⁷Nyida gü kehun aphu ka bin kenrun meter 125 le bin ti.

¹⁸Kenshün bin gü nyu nyida thyü lo-o kazü nsen kebin tesinzin npho kipon a-kethon le kilometer pvün lo keda le kenyhun-o ponha, tsü lope nyida gü nyukeyhun nyu no low tsü tyü ti.

¹⁹Tsipwen lihika ryü metse, nyida gü nyu yhun kebin nyu le kazü tsü tsü tyü logwa.

²⁰Tsü hontseo kazü senkho keshü aphu le a-qün nme zin kilometer tseryü kenyhun-o ponha, lo tsü le nyida thyükela bin ko kesin.

²¹Npho ka gü nkhün keti, Kershvuka, püshükedanyu kazü, Levinyu kazü, lo nyida le kebin nye a-sen tsü le raja gü hon. Tsü le nphozin gü nkhün terhi ti lo nkhünzin gü mediterranean zida ti, tesozin le Juda kazü lo tesinzin Benjamin kazü keti.

²³Kazü higü tesinzin tsipwen a-sen dan le npho terhi ka gü nkhünzin Mediterranean zida keti, tesozin gü tesin keti hihontseo anyugun jün kazü hyu loti: Benjamin Simeon Issachar Zebulun Gad

²⁸Pe Gad tsipwen tsükela kazü tesinzin, terhi le Tamar ka gü nkhün tesinzin Kadesh zü kepen keti, lo tesozin nkhünzin teso kipon Ijipt nyu terhi nzen-o Mediterranean zida keti.

²⁹Aphu sokekvu Npugü le zo, “Tsü hontseo Israel tsipwen no kazü tsü lope kenjün kho sen ti.”

³⁰Jerusalem nyida gü nyu keyü tson tseryü kenyhun le bin. Chwida nme le meter 2,250, lo khinrun kenshen shen le bin, nme le tsipwen nme zen thu kü. Tesozin chwida khinrun dan gen Reuben, Juda lo Levi; Nphozin chwida khinrun dan ka Josef, Benjamin, lo Dan dan zan; Chwida tesinzin khinrun dan ge, Simeon, Issachar, lo Zebulun lo nkhünzin khinrun dan ge Gad, Asher, lo Naftali dan zan thu njü.

³⁵Nyida gü chwida khwün zi kehun aphu le meter yie tekü. Nyida gü zan le ntsoka gerho, “Npugü le Hinyu Bin!” tse lati.