Read Southern Rengma Naga EZEKIEL 5 Bible Online

EZEKIEL 5 - Southern Rengma Naga bible

EZEKIEL 5

¹Npugü le zo, “Silakehü temi gü, zhethon yi kegwa khilo-o nmünhü lo npe thula. Tson-o nhü dan lope kesükü ka süo kenjün pe kenshen thyülo.

²Mele Nyida gü hun penkelo ka jün nme pe tsünyu rola. Lo jün kenyhun gü sen-o nle nyida hunlo zhethon lope tsü du. Lo kenshen gü lope tsangkenbu ki shwen shü, lo ale azhethon sen-o tsü hüti.

³Keshanyu pe nphishwen ka jwen lo.

⁴Lo tsü peha khikho nilo-o pe mah nyu shwen shü, lo tsü no rola. Tsü nyu mah le kezen sen-o Israel senye apentha nyu güti.”

⁵Aphu sokekvu Npugü le zo, “Jerusalem nrishü lo. Ale tsipwen kecha no a-hun-o a-lope a-lvu nyu shü.

⁶Ai Jerusalem le a johokeshü ntsun lo senye kecha da nyeki gwamvukvu, a-hunpvü kebin tsipwen dan nyeki ajo zenmvu kvu letse tesha laso. Jerusalem le a johokeshü khela lo a tejvü dan zen mvula.

⁷Tsügenyu nyülo, Jerusalem, Kekvutsin Npugü a hile nyu zobin yo. Hagun le ajvü zenmvu nmvue a johokeshü then kemvu genyu nhun kebin senye dan nyeki kevü kvu laso. Nle senye kecha dan jvü then tinla so.

⁸Tsügenyu, Aphu sokekvu Npugü a higü le nkenrhinyu letse nka zobin le. Ale senye aphu hyulo kegwa bin nyu njün kera ti.

⁹Nle ale ntsü kehü aphu thyü kehü genyu ale himhundyü thyü kemvu nmvue hisikie thyüni kemvui shaja pe Jerusalem tsüti.

¹⁰Tsühontse kethyü nyu Jerusalem nyu a-pepvünyu le a-nyenyu tyü, lo me nyenyu le a-pepvünyu tyüti. Ale shaja pe hagun tsüti, lo yhun kebin dan-e liki hiki nren nru lati.

¹¹“Ale rhünkehü Sunggigü genyu- higü le Aphu sokekvu Npugü jo- nle gwakemvu lo kentsükenchen tha aphu thyü pe a Kershvuka nrhu kela genyu, ale nshwinjün mvu tse n nke lati.

¹²N temi jün shen thyüo nme no nyida nyu kehokenyü lo khün kethyü nyu siti, jün kecha gü no nyida ngwenki zhethon pe dushvu ti; lo jün kenkhin gü hükezen pe luki hiki shüo zhethon pe anyugun hü ti.

¹³“Ale rünyun la kemvuthen nno anyunkenta kenthün shati. Hidan aphu thyü keryü ka nle Npugü a higü le nle joketsin sen kemvu genyu anyun nthün-o nka zo letse sha loti.

¹⁴Nhun kebin senye n nken kegü nyu aphu nshwinyüo nzen-o nithen lati.

¹⁵“Ale anyunta lo nthün-o shaja pe ntsü kethyü ka, nhun kebin senye aphu kerü ti. Anyugun le n nrio ntsü lo nshwinyü ti.

¹⁶Ale nketyüketsü pe ntsü mvulao nno khün ti. N kenyon le thotsei nipe n nkela nrün hontse ti.

¹⁷Ale kenyon lo tehen thyü nipe nnyenyu nke, lo keho lo thyü teri nipe n nke lati. Npugü a higü le zo laso.”