Read Southern Rengma Naga EZEKIEL 7 Bible Online

EZEKIEL 7 - Southern Rengma Naga bible

EZEKIEL 7

¹Npugü le aka zo,

²“Silakehü temi gü, Aphu sokekvu Npugü a higü le johi zope Israel kazü ki shü: Hile kazü gü apentha genyu keni so!

³“Israel, kenkhin gü le ryü laso. Ale nle thyükeshü dan ge jokera kebin genyu nle anyunkenta sha loti. Nle kentsükenchen tha thyü kela aphu genyu ale npu kethun ti.

⁴Ale n nrhoshü nmvue shwikenjün lope nhishü loho. Nle kentsükenchen tho thyü keshü genyu ale shaja pe ntsüti, tson-o nno ale Npugü le tse shalo nrün genyu.”

⁵Hile Aphu sokekvu Npugü le zobin nyo, “Kenke kebinbin kethyü le nge ryü hü.

⁶Tsü le lihikae. Hile kenkhin gü so. Nle ndi so.

⁷Kenkhin gü le hagun kazü tsügü nyu kebin aphu genyu ryü jüso. Gwünkho nni laso tsünyü kazüthun ki kenshünbin nme nyue shekerhün khwen ndi lao kevükeben nti lati.

⁸“Hagun le whütse anyunkenta aphu sha tiso. Ale hagun tho thyükeshü ge jokerabin, lo nle ketsükenchen tho thyü kela aphu genyu ale kethun nishü ti.

⁹Ale nrhoshü nmvue shwikenjün pe nhishü loho. Nle kentsükenchen tho thyü keshü genyu ale shaja pe ntsü ti, tson-o nno ale Npugü, shaja pe ntsü kehü gü tsü le tse shati.”

¹⁰Kenke jon le Israel nyu genyu ryü jüso. Kevükeben le ryü bin so. Kemakin le chonri laso.

¹¹Kevükeben le gwakemvu chon kvu nsüshü bin. Anyugun kenya, teshwen nmvue zan kechwi thame bin loho.

¹²Gwünkho gü le ryüjü, tha kehei lo kejwe le a-min ndila nrün jon le khonni laso, kechamvule Sunggigü shaja le aphu ge ryü lati.

¹³Ha kethyü nyue yhun tho-o a-le nke kela sun hyu loho, kechamvule Sunggigü nyunkenta le aphu ge bin laso. Gwamvu kehü nyu nme-e rhün loho.

¹⁴Shukhun shülo aphu ndo lohü. Ai nme-e terinyu gümvu, kechamvule Sunggigü nyunkenta le aphu ge ryü lati.

¹⁵Tsonda nyu kega bin, kehokenyü lo kenyon le ka nyu bin laso. Lihigüe tegwenki kehü nyu le kega kethyü nyu si, lo lihigüe nyida nyu kebin nyu le kehokenyü lo kenyon nyu si lati.

¹⁶Temi peha le nsu le kazü ketejon nyu a-kerükeshü hontse tin sen-o kazüthun ki gü ti. Anyugun aphu anyu kemu genyu chüti.

¹⁷Temi aphu ben le kvumvu lo anyu kho le ndün ti.

¹⁸Tsü dan le ronphi ben lo ndün küti. Anyugun pe thula, lo anyugun aphu kemeni lati.

¹⁹Anyugun rakagi lo suna lope khekela kanyü hontseo pe tsonda nyu shwen ti, kechamvule Npugü le anyunkekhü jakeshü ka suna lo rakagi le anyugun kenilo mvula. Anyugun le tsü dan lope anyugun kenyü thyü lomvu, nmvue anyu ginnyülo mvula. Suna lo rakagi genyu anyugun le mula.

²⁰Gwüngwa we anyugun le tso minketsen kezegwa dan genyu anyu sü thyü hü, ai anyugun le tsü lope kentsükenchen teromen thyüla. Tsügenyu Npugü le anyugun kenya lope anyugun le shwinyü kemvu nme thyü la.

²¹Npugü le zo, “Ale sinrünyi nyu no anyugun hon seülo, lo tejvü gwünkerho nyu no anyugun kenya aphu khilo-o nrhu lati.

²²Kerühu nyu le a Kershvuka minketsen gü nrhu, lo tsü rhen yüo bonrhu bin-e ale nrimvu lati.

²³“Tha aphu kevükeben bin laso-kazü gü nyu temi dukeshvu le sü- lo thagwakemvu le nyida dan sü laso.

²⁴Ale senye gwamvu ritsin kethyü dan zenryüo anyugun no hagun ka dan nkhenlo lati. Ale senye dan no hagun kershvubin da nrhu keryü ka hagun dan nyu kenkotsin nyue anyun kun lati.

²⁵Shekesi le ryüjü nyo. Hagun le gwaketha füe hyu loho.

²⁶Kenke le kethen then ti, jolo gwakemvu le züri ketsun thyü yüryü ti. Hagun le sidyükezonyu no nyu sha loyo pe tesha lotse hiti. Püshükeda ju le thame pe temi senthyü lo nrün ndi, lo Peshünyu le thame pe me tsontsinlo nrün ndi lati.

²⁷Raja gü le chüti, lo rajanyu gü le sidyü kenrin ndila, lo temi dan le nshvu pe ndün lati. Ale hagun le thyükeshü aphu genyu shaja pe tsüti, lo hagun le me jünkera keshü hontse pe hagun jün kera shüti. Tsü le ale Npugü letse kethyü pe hagun tesha ti.”