Read Southern Rengma Naga EZEKIEL 8 Bible Online

EZEKIEL 8 - Southern Rengma Naga bible

EZEKIEL 8

¹Agun le me kazü nyu yhun gü kela chen tsero gü shye tsero gü ka jon pvün nyü Juda temi dothyü kebin dan nyu sharhi dan le aka nyu azen-o dun bin ketseka whütse Aphu sokekvu Npugü kekvu le age ryü.

²Ale nyiso keshü ka temi joja mah hontse kethyü hyu. A-senkhü le nripe mah hontse, lo a-sen gerho teso ki le lazo shon nshwen kela hontse.

³A-le ben nme hontse ketoshüo apehü cholo la. Tsemin hinyu Sunggigü kapu gü le apen tetso pe tsangneki apvü gun gü Jerusalem ki shü. A-le azen gü Kershvuka nyu keyü khinrun tesogü ka teromen nme genyu Sunggigü le a-nyunta kehü bin nyu shü.

⁴Tsünyu ale Israel nyu Sunggigü le kehü zensü benchvü tse kethyü gü ale Khebar züri nyu kehü ka kehyu gü hontse hyu.

⁵Sunggigü le aka zo, “Silakehü temi gü, tesokipon nrishü lo.” Ale nrishü laryü khinrun nyu keyü tson kershvubin khoka teromen Sunggigü nyun gwünkekhün kehü gü tsü hyu.

⁶Sunggigü le aka zo, “Silakehü temi gü, nyuthyü bin yo nle hyu bin mon? Israel temi le hinyu kentsükenchen tho thyü kebin hi nrishü lo, anyugun le ahü pe a kenshünbin zen nithen ketsin tsin bin nle. Nle hi nyeki-e kejokepvü tho hyu ti.”

⁷A-le azen-o kamhun ngwen gü tson nyu keyü tson ka güo kabon ge a-kü kepe pe ahishü.

⁸A-le zo, “Silakehü temi gü, hinyu kabon durhen yülo.” Ale tsü durhen yü laryü kakhin nme hyu.

⁹A-le aka zo, “A-nyuki yü gü gwakemvu tho nri shüta, tsünyu anyugun le kentsükenchen tho thyübin nle.”

¹⁰Tsügenyu ale yüo nrishü. Kabon ge peri lo nyukhu nshünkemvu men zü pe kesü thyü bin, lo Israel temi le rüshvu kehü kecha dan-e bin.

¹¹Israel nyu sharhi hentsenyü lope Jaazaniah, Shaphan nyugü sin-o tsünyu bin. Anyugun nmeme tse rünkenyü ro pen bin, lo tsü le khu bin.

¹²Sunggigü le aka shün, “Silakehü temi gü, Israel sharhi dan le kekebu ki nyuthyü bin yo nle hyula semon? Anyugun aphu teromen zü pe kesü thyü kenjü tsen nyu rüshvubin. Anyugun kenjü gü yatselo: ‘Npugü le ngun hyubin mvu! A-le kazü higü khe laso’ ”

¹³Tsüsika Npugü le aka zo, “Nle anyugun le higü nyeki nyun ketsemi tho thyü kenbin hyu ti.”

¹⁴Tsügenyu a-le azen-o Kershvuka khinrun teso gü ki güo tenunyu dan le tero Tammuz kesi chechü kebin pe ahi.

¹⁵A-le shün, “Silakehü temi gü, nle tsü hyu mon? Nle kentsükenchen nyun ketsemi tho hyu niti.”

¹⁶Lo a-le azen-o Kershvuka kanyuzin ki yü. Tsünyu kenshün bin nyu keyü tson khoka kershvubin lo tson au jaka temi nki pvün kho le bin. Anyugun le anyugun seren pe kenshünbin ntsun lo nphozin nkhün tsenyo-o yhüko chwi keryü rüshvubin.

¹⁷Npugü le zo, “Silakehü temi gü, nle tsü hyu mon? Juda temi hidan le kentsükenchen tho thyü kebin nle kehyu dan lo gwakemvu thyü pe kazü aphu nyu shü gwünzin kethyü le anyunkerünyun thyü lomvu. Nmvu, anyugun le Kershvuka hinyu ryüo tsü dan thyü pe anyunkenta nsüni tsentsü ti. Anyugun le akenyükemvu thyülo kegwathen thyü pe a nshwen kehü hi nrishü ta!

¹⁸Anyugun le anyunkenta kekvu aphu shati. Ale anyugun rhoshü nmvue shwikenjün pe anyugun hi loho. Anyugun le nra tetso lo kegwathen nrao aka hiti, ai ale anyugun khwenyü loho.”