Read Southern Rengma Naga EZEKIEL 9 Bible Online

EZEKIEL 9 - Southern Rengma Naga bible

EZEKIEL 9

¹Tsüselo ale Sunggigü le nra keshü khwenyü, “Hika ryülo, shaja pe nyida gü tsü ti tse kebin dan. Hagun teri kanyü sen-o ryülo.”

²Whü tse mi tsero le Kershvuka tesozin khinrun ngwen gü kipon ryü, aphu teri kanyü pvü hü. Temi anyugun zen kehü gü le linen phinya sen, lo thu nrün peha pvü hü. Anyugun aphu ryüo lazo pe kethyü kershvubin ka solo.

³Tsüselo Israel nyu Sunggigü kehü keben gü tsü le Cherub dan le kebin bin nyu soryü, lo ketu sen-o Kershvuka keyü tson nyu güla. Npugü le linen phinya sen kehü temi güko-o,

⁴“Jerusalem nyida apentha rhi güo temi lihigüe nyida gü nyu kentsükenchen tho thyükela aphu genyu anyungwamvu lo kenjün thyü kebin gü senpvü ge zensü pe shülo.”

⁵Lo ale Npugü le temi kecha dan ka zokebin nyülo, “A-sithen nyida nyu pvüthü güo dushvulo. Nme-e nsen nya; nme-e shwi njün nya.

⁶Püshünyu, ponyu, lünyu, nyeginyu lo ntsenyue dushvulo. Ai temi lihigüe a-senpvü ge zansü le kebin nyu kesü nya. A Kershvuka hinyu bin zenlo.” Tsügenyu anyugun le Kershvuka nyu kebin sharhinyu ge thyüo binzenlo.

⁷Sunggigü le anyugun ka zo, “Kershvuka gü nrhu lalo. A-tsen ka simin pe süshü. Tha thyülo!” Tsügenyu anyugun le nyida gü nyu temi dushvu so.

⁸Dushvubin nsen, tsünyu a npvüla. Ale kazü nyu nkhün rün tsüo nra sen-o zo, “Aphu sokekvu Npugü, nle Jerusalem ge nyunta sao Israel nyu khekela aphu dushvula titse bin ole?

⁹Sunggigü le zo, “Israel lo Juda temi le kemu kenrin kethyü nyu thyüzü laso. Anyugun le kazü higü aphu nyu temi dushvula, tson-o thyüzü pe Jerusalem sü laso. Anyugun le kezo le Npugü a higü le tsipwen gü khela, tsügenyu ale anyugun hyumvu letse hü nyo.

¹⁰Ai ale anyugun njün shü loho, anyugun le me ge thyü keshü hontse ale anyugun ge thyü shüti.”

¹¹Tsüselo temi linen phi ben kehü gü tsü le rani ryüo Npugü ka zoshü, “Ale nle zokeshü thyü laso.”