Read Southern Rengma Naga DANIEL 1 Bible Online

DANIEL 1 - Southern Rengma Naga bible

DANIEL 1

¹Jehoiakim le Juda raja thyü kelo chen shen gü ka, Nebuchadnezzar, Babilon raja gü le Jerusalem when lo nyida gü hunlo la.

²Npugü le a-no Raja Jehoiakim tenlo lo Kershvuka nyu kenya peha khilo la. A-le donyu peha zen-o Babilon ki a-tero Kershvuka nyu rani gunla, tson-o kenya khikelo dan pe kerüshvuka kenyatsen nyu shüla.

³Raja gü a-hensin kedatsin gü, Ashpenaz no Israel nyu dothyü kebin dan nyu raja kami lo teshwe kepvü kami nyu selo peha kejülo lotse ahza hoshü.

⁴Tsüdan no kezegwa, kensü, senthyükegwa thyükenjü nyu, tha sha whülo kehünyu, lo a-rhenrhyü kegwa nyu mvuloshvu, anyugun lope raja bin nyu lothyülo kekü thyü nrün genyu. Ashpenaz no anyugun senthyü pe Babilon nyu khwen swü lo thushalo nrün thyü.

⁵Raja gü le khenyütsen rajabin nyu kebin nyu chvü lo zu hontse pe tsüdan tsü lotse ahza ko hoshü. Chenshen tsonkela siki anyugun le raja gü mhundyü nyu ryüti.

⁶Kejükelo dan nyu Daniel, Hananiah, Mishael, lo Azariah, tsüdan aphu Juda tsipwen.

⁷Raja hensin kedagü le zan keshün pe anyugun tsü: Belteshazzar, Shadrach, Meshach, lo Abednego.

⁸Daniel le raja nyu chvu tyü lo zu tsüo a-gwen nrhula mvu titse kemvulo la, tsühontse a-le Ashpenaz no a-che shü lotse hi,

⁹lo Sunggigü le Ashpenaz no Daniel njünlo la.

¹⁰Ai Ashpenaz le rajagü nshvu, tsügenyu a-le Daniel ka zo, “Raja gü le nno nyu tyülo tsüti yo rhilo laso; lo nle selo kecha dan hontse shwi gwalo mvulalo, a-le aboshvula-e logwa.”

¹¹Tsügenyu Daniel le, a-le lo a-pvünyu mishen dan nucha lotse kejü keshü Ashpenaz ki gü.

¹²A-le tsügü ka zoshü, “Jon tseryü jaka henkenjvu pe agun no tyü lo zü pe agun lao nrishwilo.

¹³Tson-o agun lope raja chvü tyü kebin selo dan zenkendyüo agun nri pe dihontsela tiyo shwilo.”

¹⁴A-le anyugun no jon tseryü tson-o shwiti tse a-kendola.

¹⁵Gwenkho kepen ki anyugun nripe raja chvu sen kehü nyu nyeki phu gwa lo nko kvula.

¹⁶Tsügenyu tsügenrho rikhun gü le raja gü le khikeshüdan sunka anyugun no henkenjvu tyüsun tinla.

¹⁷Sunggigü le thakesha, lesükesha lo kekakepe pe anyugun tsüla. Tsü nyekie a-le tsemi lo nmin kon zolo kegwa pe Daniel tsüla.

¹⁸Raja gü le gwünkho tho keshü chenshen pen gü kejü ka Ashpenaz le ponyudan aphu zen-o Nebuchadnezzar ki gü.

¹⁹Raja gü le anyugun aphu zenkenthon, lo Daniel, Hananiah, Mishael lo Azariah dan le kecha aphu nyeki a-kenyüla. Tsü genyu anyugun le rajabin nyu kebin nyu thyüla.

²⁰Raja gü le tha lihi shün nmvue ketekhi lihi-e ketso keshü ka mizi dan hile a-rajaphen hensin temvunyu lo jadunyu apentha nyeki gwen tseryü shakvu la.

²¹Daniel le Persia nyu raja Sairus le Babilon lola kemvuthen rajabin nyu bin.