Read Southern Rengma Naga DANIEL 10 Bible Online

DANIEL 10 - Southern Rengma Naga bible

DANIEL 10

¹(Sairus le Persia Raja thyükelo chenshen ka jolo nme le Belteshazzar letse kehü Daniel ka teshashü. Jo gü le ketsin ai shalo tsen sala. Tsemin ki tsügü kon zope a-zan shü.)

²Tsü gwünkho ka ale hapta kenshen chübin.

³Ale ketyüketsü kegwa nmvue thyü-e tyümvu, zue tsümvu, lo hapta kenshen penla kemvu ka a-pe-e whenmvü.

⁴Tsü chen shye kerigü jon nki pezi nyü, ale Tigris züri kedagü seka sobin.

⁵Ale ngiso shü ntsin temi nme le linen phi ben lo suna kenshüntsin senkephin pvü kehü hyu.

⁶A-min le tsomin ketsen hontse ben. A-mhun le tsangkekechwü hontse ben, lo a-yhütyü le mah kenyü hontse, a-ben lo a-pha le lazo gi shon nshwü kela hontse, lo a-khwen le gin pe temi danda kenra hontse.

⁷Tsemin tsügü kehyu le a nti. A zenkehü dan le thame hyumvu, ai anyugun kerü lao tin gü kebu tinla.

⁸Ale tsünyu a npvü bin-o ndun kethyü tsemin gü nribin. Akekvu ndila, lo a-joja kelushü lao nme-e a shakeloi thyü mvula.

⁹Ale a-khwen nyükelo ka, kazünyu chetsügü thame shamvuo amhun lope kazü rün tinla.

¹⁰Tsüselo temi ben nme le asüso shüla; ai ale ndün bin.

¹¹Tsanggelo gü le aka zo, “Daniel, Sunggigü le nsohü nyo. Solo njüo ale nka zo titse kebin gü nyü petsü shülo. A nipe nki shü bin nle.” A-le tsü zoshü ntsin, ale solo, ai ndün bin zun.

¹²Tson-o a-le zoshü, “Daniel, nshvunya. Nle tha shakekho lo titseo nthyü ketsenyo-o kehi thyü keso nyü nyu Sunggigü le nkehi khwen nyü laso. Nkehi kenikeshü nyu ale ryübin nle.

¹³Persia nyu rajaphen kekhwen jolo gü le jon nkinme akhinla. Tsüselo Tsanggelonyu so kedanyu nme, Michael le acheshü ti tse ryü, kechamvule Persia nyu a-npvü kela genyu.

¹⁴Hisiki ntemi dan ka nyu thyüla tiyo nno shalo nrün genyu ale ryüle. Hile hisiki genyu tsemin kehyu.”

¹⁵A-le tsü zokeshü ka, ale kazü nyu nrio thame zolomvula.

¹⁶Tsüka tsanggelogü, temi hontse kethyü gü tsüle a-ben ketape amüntse kesüshü. Ale a-ka zo, “Kedagü, tsemin higü genyu ale kvumvurilao ndün bin gwenzinla sele.

¹⁷Ale gonyu le a-kedanyu mhundyü sokebin hontsela sele. Ale dihontse n nthon lo semon? Kekvu nmvue keheteshe le agen ndi sele.”

¹⁸Gwengwa a-le a-kesünishüo ale kvuketsinlo.

¹⁹A-le zoshü, “Sunggigü le nsohünyo, tsügenyu tha nme-e no n thyü pe nyunkenjün thyü nmvue n kerüla nya.” A-le tsü zokeshüka, ale kvuketsinlo-o a-ka zo, “Kedagü, nle nyu zo tiyo zoshülo. Nle athyü kesherhün kvu shü laso.”

²⁰A-le zo, “Ale nyugenyu nki ryüyo nle shabin mon? Tsü le ketsin lesü nyu thu kenjü pe nhishü nrün genyu le. Ale rani gü Persia kekhwen zolo gü zen-o kega mvulo shvubin laso. Tsüsika Greece kekhwen jologü le chwiryüti. Israel kekhwen jolo gü Michael nti a-me kecha le akeche ndi.