Read Southern Rengma Naga DANIEL 11 Bible Online

DANIEL 11 - Southern Rengma Naga bible

DANIEL 11

¹A-le akeche lo a nopen kethyüi le bin.

²Lo ale ntsoka nka zo titse kebin hile ketsin.” Tsanggelogü le zo, “Raja kenshen le Persia so gon niti, tsüsika pezigü, a-le kecha aphu nyeki nnyati. A-le a-kekvu lo kenya tsin gwünkho ka Greece rajaphen khen soti.

³“Tsüsika raja kepeche nme le soryüti, a-le kekvu keda nme so keda thyüti, lo a-le nyuthyü nyüyo thyüti.

⁴Ai a-le kvusa kebin günyu a-keda kenjün pe pezi thyü lati. A-gen tsü ryükemvu rajadan le a-sun ka kekvu senti, ai anyugun le a-kekvu hontse loho.

⁵“Ijipt raja le kvuti. A-hensin general peha le kvukvuo rajaphen gonkvu kethyü so kekvu senti.

⁶Chen keshanyu sika Ijipt raja gü le Siria rajagü zen kepvüshen-o a-nyugi lope a-ka kalvu shü lati. Ai kepvüshen tsügü le binthon loho, lo tsügi lo a-nyepvü, a-nyu, lo a-gonyu, a-zen gü kethyü nyu aphu boshvulati.

⁷Thon mvutse tenugi kaminyu nme le raja thyüti. A-le Siria rihü when-o a-chwida nyuki yüo a-so kvu loti.

⁸A-le anyugun terodan menkezü lo suna lo rakagi kanyü thyükenshün pe tero tsüdan tsükeladan pvü-o Ijipt ki nigü lati. Gwatho-o chen peha siki

⁹Siria raja le Ijipt hüti, ai a-kemvu thyüo a-no rani lati.

¹⁰“Siria raja nyudan le teri genyu gwen nda lo rihü danda kequen soti. Anyugun dan nyu nmele zükeda hontse tsüo shwikerüchün nyu nme chwida whenti.

¹¹Ijipt raja gü le a-nyunkenta pvüo Siria raja zen teri thyü lo a-rihü danda khinlo ti.

¹²A-le kvukelo genyu lo shüpahü kechon boshvukelo genyu ketekhoti, ai a-le kvuzin gun loho.

¹³“Siria raja gü le rani gü himhundyü nyeki rihü kechon rhikequen loti. Gwenkhoto le keryüka, a-le a-rihü danda teri kanyü ketsen sa pvü rani ryüti.

¹⁴Tsüka temi kechon le Ijipt raja gü ntsunti. Lo, Daniel, nsenye dan nyu temi gwamvusa kethyü peha le tsemin ki kehyu gü genyu n ntsun soti, ai anyugun le kvulo mvulati.

¹⁵Tsügenyu Siria raja gü le chwida kenko nyida gü hunlo-o tsü lolati. Ijipt nyu shüpahü le teri thyü simvu lati; anyugun dannyu kegwatsin güe kekvu ndi lati.

¹⁶Mehükehü Siria shüpahüdan le nme-e no a-ntsun mvutse Ijipt nyu gen a-kenda thyüti. A-le zokenjü kazü gü nyu kekvu aphu sen loti.

¹⁷“Siria raja gü le a-rihü apentha zen-o whütse chwi kethyü ndoti. Lo a-shwikerüchün nyu rajaphen nke nrün genyu a-le a-zen-o kepvüshen lo a-nyugi pe a-ka kalvuti; ai a-le rhikebin gü le gwa loho.

¹⁸Tsüsika a-le zida sekipon senyedan when-o kechon so kvu loti. Ai sinrünyi sharhi nme le a-so kvulao a-no ketekho nilo mvulati; tson-o a-le Siria rajagü ketekho gü khipe a-gen shülo lati.

¹⁹Rajagü le a-chwida kipon rani ryüti, ai a-le kvulo mvu lati, lo tsüle a-gen nyu kenkhin thyü lati.

²⁰“Raja kecha nme le a-siki soryüti, tsügü le a-rajaphen kenya no chonlo nrün genyu kedanyu nme nipe temidan nshwen-o khajana shvuti. Gwenkho kezü jaka raja tsügü boshvu lati, ai tsüle me yhühyu ka nmvue terinyu loho.”

²¹Tsanggelogü le a-kon zoni gun: “Tsügü sika Siria raja gü le temi gwakemvu nme, raja thyükelo kenjüe ndi, ai a-le rüchün bin kemvu ka ryüo tedo thyüo kekvu seü loti.

²²temi lihigüe a-nren kethyü we, Sunggigü peshükeda thyü kehü nyue chün nmvue shosen tin lati.

²³A-le me zen kepvüshen thyüo senye kechon sa lati, lo a-le senye keshen nme nti so kekvu sen hü yatse-e a-le kvuketsintsin soti.

²⁴A-le me tesha mvutse kenya senye nme hü, lo a-le a-bonnyu nme-e thyülo kemvu thyüti. Tson-o a-le terinyu khinkelo kenya lope a-kethenyu dan nyu kenjün ti. A-le chwida kenko dan when nrün rhiti, ai a-gwünkho le whütse ndi lati.

²⁵“A-le pechesa tse rihü danda zen-o Ijipt raja whenti, lo tsügü ko a-rihü kvusa kethyü danda zen-o a-nren niti. Ai Ijipt rajagü salao no kvulo mvu lati.

²⁶A-tsontsin kehü a-kho kenitsinnyu le a-nke lati. A-shüpahü kechon boshvu lati, lo a-rihü dan nke shüla ti.

²⁷Tsüsiki raja tsühvu le kengü miz nme ka dun-o tyütsü ti, ai au kerüchün gwamvuo, khinyunyu ka nkuti. Au le lonyü kebin gü hyulo kemvui, kechamvule, tsü gwünkho le ryü mvuzun.

²⁸Siria raja gü le a-le lokelo kenya dan sen-o kaki raniti, ai Sunggigü temi nyünyü kemhenla titse rüchünti. A-le nyu le a-kenyüyo thyüti, tson-o a-kazü ki rani gun ti.

²⁹“Tsüsiki a-le Ijipt hü niti, ai tsügwünkho ka we tha le a-kecha thyüshü lati.

³⁰Romnyu le zürun gen ryüo a-nren lo a-le nshvu lati. “Tson-o a-le a-nyuntasa tse ranio Sunggigü temidan nyünyü nkela titse ndoti. A-le nyünyü tsügü khekeladan tsonketsin thenti.

³¹A-shüpahü peha le Kerüshvuka bo nrhuti. Anyugun le khenyütsen rüshvu kehü tho khinti lo kenshvu ketetsin tho thyü ti.

³²Raja gü le nkuo a-nyünyü khekelanyu sape a-keche loti, ai Sunggigü sithen kehünyu we a-nren ti.

³³Sharhidan le anyugun kensü lope temi kechon zen-o zo kezen ti. Ai gwünkho keshanyu ka teri nyu anyugun peha gala nmvue roshvu lati, lo peha rühu pe dothyüti.

³⁴Temi kechon ryüo anyugun zen kerhün kelo dan le anyugun npvü anyugun phin rüchün hü yatse-e temi boshvu kethyü gwünkho ka Sunggigü temidan le keche keshanyu hyulo ti.

³⁵Sharhi kegwa peha boshvuti, ai tsügenyu temi thyükenshün loti. Tsühontse kethyü le bin-o Sunggigü le tho kenjü gwünkho kenigü titi.

³⁶“Siria raja gü le a-le nyu thyünyü yo thyülati. A-le tero kecha nye gon, lo kekvutsin Sunggigü nyekie gwa letseo kemakinti. A-le tsühontse thyülogwa bin-o Sunggigü le shaja pe a-ketsü gwünkho titi. Sunggigü le a-le rhikebin gwenzin tse thyü lati.

³⁷Rajagü le a-bonnyu le rüshvu kehü terogü lo tenunyu le sokehü tero güe sümvu lati. Ketsin thyü a-le tero lihie sümvu lati, kechamvule a-le tero lihie so gonkvu letse rüchün kehü genyu.

³⁸Tsü sunka a-le chwida kenko ntsenkehü terogü rühvuti. A-le suna, rakagi, tsominketsen lo jwen kechon khipe a-pvübonyu le rüshvu hü kemvu tero rühvuti.

³⁹A-chwida kekhwen, khwen nrün genyu sinrünyi tero rüshvu kehü temi zen ti. A-le a-lope kekvu kesennyu letse kehünyu rühvu lo tsünyu lope kedanyu thyü shüti, lo kazü pe anyugun chün thyüti.

⁴⁰“Siria rajagü gwünkho kenkhingü le ryüjü tsin ka, Ijipt raja gü le awhenti, lo Siria rajagü le a-kekvu aphu, kerugari, kerushüpahü, lo zürun kechon sen-o a-zen kenrenti. A-le zü keda hontse tsipwen kechon hüti.

⁴¹A-le zo kenjü kazü güe hüo temi yie yie boshvu lati, ai Edom lo Moab tsipwen dan, lo khekela Ammon nyu dan we tin loti.

⁴²A-le tsipwen tsüdan hü kegü ka we Ijipt kazüe nseshü mvu lati.

⁴³A-le Ijipt le kebukenjü kenya suna, rakagi, lo kenya minketsen dan sen tinlati. A-le Libia lo Sudan lo lati.

⁴⁴Tsüsiki npho lo tesozin jolo dan le keryü ka a-kerü lati, lo a-le a-rikhen thyü nren-o temi kechon boshvuti.

⁴⁵A-le zida lo Kerüshvuka le kebin kazüthun hvu jaka a-raja phika-e pensoti. Ai tsünyu a-keche min nme ndio silati.”