Read Southern Rengma Naga DANIEL 2 Bible Online

DANIEL 2 - Southern Rengma Naga bible

DANIEL 2

¹Nebuchadnezzar le raja thyükelo chenhvu gü ka a-min nme nmin. Tsüle a-thyüpe a-nyun nkhi salao jülo mvula,

²Tsü genyu a-le meno me rüla zo kehünyu, jadunyu, henshwinyu lo temvunyu no ryüo a-min rüla zoshü lotse koshü. Anyugun le ryüo raja gü mhundyü nyu solo,

³lo a-le anyugun ka zo, “Ale amin nme nmin kethyü gü genyu anyun nkhi laso. Tsüle nyu yo ale a-kon shalonyü bin nle.”

⁴Anyugun Aramaik nyu khwen ki raja gü jo kenishü, “Raja gü no kethonthen yhunlo! Nmin pe agun ka zoshüta, lo agun le tsü zokekho pe nzen shüti.”

⁵Raja gü le anyugun ka zo, “Ale hagun no amin pe aka zo lo a-kon le nyuyo zope azenshü mvuloshvu letse rhilo laso. Hagun le tsonlo mvulo, ale hagun süthüsürüla, lo hagun kadan nke lati.

⁶Ai hagun le amin lo a-kon-e pe aka zolo gwa yatselo ale jwen lo kerühvue pe hagun chün thyüti. Tsügenyu amin le nyu lo a-kon le nyu tsethyüyo zoshü lo.”

⁷Anyugun le raja gü ka zoni, “Raja gü le a-min le nyulayo zoshülo agun le tsü zokekho shüti.”

⁸Tsüka raja gü le zo, “Ale rüchün kebin hontse laso! Hagun le gwünkho lothon titse nda bin, kechamvule hagun le ale anyun kemvulo-o

⁹hagun le amin pe aka zo mvulo shaja nme pe hagun aphu tsüti tse kebin shakela genyu. Hagun le aka nkula tiyao kejorhün laso. Kechamvule gwünkho le keryü ka tha le kelula nrün rüchün bin kethyü genyu. Amin le nyuyo aka zolo, tsonlo hagun le a-kon ko zokekho logwa letse ale sha loti.”

¹⁰Tsontsin anyugun le kenishü, “Kazü nyu temi nme-e raja gü le nyu shalo nyü binyo nka zolo kemvui le. Raja, nmvue kedatsin lo kekvutsin güe tha tsü hontse kethyü nme-e pe jadunyu, temvunyu lo henshwinyu ka hishwi mvule.

¹¹Raja gü le shün kebin tsüle tsenritsin-o teronyu mvu yatselo nme-e tsü pe nka zolo kemvui, ai tsüdan le temidan nyu yhun bin mvu.”

¹²Tsügenyu Raja güle nthünsa lola-o Babilon nyu raja gü tsontsin nyu aphu boshvula lotse ahza hoshüla.

¹³Tson-o a-nyugun aphu boshvula nrün ahza khishwishü, lo tsü le Daniel lo a-pvünyu dan ko sin.

¹⁴Tsüselo Daniel le raja rikhun kedagü Arioch, raja jo thyüpen shülo tse ahza pe tsükenjü gü ki gü. A-jo kejü petsüsalo njüo,

¹⁵Arioch ka raja gü le nyuthyüo ahza kenko tsü hontse kethyü hoshü binyo tse ketso shü. Tsügenyu Arioch le dihontselayo pe Daniel ka zoshü.

¹⁶Daniel le raja gü min gü kon zope a-zenlo nrün genyu gü raja ka gwünkho hikethen nilo.

¹⁷Tsüsika Daniel le kaki gun-o a-pvünyudan, Hananiah, Mishael lo Azariah dan ka nyuthyülayo pe zoshü.

¹⁸A-le anyugun ka anyugun no Babilon nyu tsontsinnyu kesin-o boshvula mvu nrün genyu tsangge Sunggigü ka shwi kenjün lo a-no kekebu jokon gü pe anyugun hishü nrün hilo tse shü.

¹⁹Tsüselo tsüje tsemin ki kekebu jokon gü pe Daniel teshashü tson-o a-le tsangge kebin Sunggigü shwenshü:

²⁰“Sunggigü le thasha lo kvusa! kethonthen lo kethonthen a-shwenlo!

²¹A-le gwünkho lo kekun-kenyen gwünkho aphu ketsen hü; a-le rajanyu pensoshü lo khila hü; A-le kensü lo thasha kekhakelo khishü hü.

²²A-le kentsun lo kekebu thodan henshwishü hü; a-le kezen ki kebukebin-e sha, lo a-le keben pe a-hunpvü bin.

²³Abonnyu Sunggigü, ale nshwen lo nrühvu hü nle. Nle kensü lo kenko pe atsü laso; nle akehi kenishü lo nyu pe raja gü ka zo tiyo pe agun hi laso.”

²⁴Tsügenyu Daniel le tsontsinnyu dan boshvula lotse joho pe tsü kenjü gü Arioch ki gü. A-le a-ka zo, “Anyugun boshvu nyalo. Azen-o raja ki gülo, lo ale a-min kon le nyuyo zo pe a-hishü ti.”

²⁵Tsüselo Arioch le whütse Daniel zen-o Nebuchadnezzar mhundyü nyu güo raja gü ka zo, “Ale Juda nyu donyu nme, nmin zope nhilo kegwa hyulola sele.”

²⁶Raja gü le Daniel (Belteshazzar letse kokehü) gü ka zoshü, “Nle ale nyu nmin lo a-kon le nyuyo pe aka zolo gwale?”

²⁷Daniel le Kenishü, “Raja, temvunyu, jadunyu, me rüla zo kehünyu nmvue shyenyü keswünyu nme-e tsüpe nka zokeloi ndi.

²⁸Ai tsangge kekebu jokon pe hishü kehü Sunggigü nmele bin. A-le ryükejü ki nyu thyü tiyo pe ntesha bin nle rajagü. Tsü genyu ale nmin, nle jüketseka tsemin kehyu gü tsü pe nka zoti.

²⁹“Raja gü nle jüketse ka, ryü kejütho genyu nmin; lo Sunggigü, kekebu jokon pe hishü kehü gü le nyu tsethyü tiyo pe n hilaso.

³⁰Lo ale kechanyu nyeki tha shakvu kethyü genyu pe a hishümvu, ai raja gü no a-min shalo lo jokon nka ryükela gü shalo nrün genyu le.

³¹“Raja gü, nle tsemiki thamen kethonkeda, ben lo shwikenrin kethyü nme hyu.

³²A-pe le suna kegwatsin pe thyü; a-nyun lo a-bu le rakagi; a-sen lo a-din le lazo;

³³a-chün le tegi; lo a-pha le tegi lo gin pe kerhün-o thyü

³⁴Nle tsü nrikebin ka tso keda nme, nme-e kesümvu tse tsokhin nme ge ko tsüryüo thamen pha tegi lo gin kerhün pe kethyü tsü jonrenla.

³⁵Whütse tegi, gin, lazo, rakagi lo suna tsü boshwen pe tsangnyen ki shye kera binka kemphü hontsela. Tsangkenbu le tsü aphu whün kü sen tinla. Ai tsogü le minchwiryü kazüthun thyüo kazü aphu henla.

³⁶“Tsüle nmin, lo ale ntsoka tsükon zope raja gü hishüti.

³⁷Raja, nle raja aphu nyeki gon. Tsangge kehü Sunggigü le nno raja thyüo kekvu-kegon lo kerühvu pe ntsü laso.

³⁸A-le nno kazü aphu so kekvugü, lo thyü tegü aphu so kekvugü thyü shü. Nle suna pe gütsü.

³⁹Nsiki raja kecha nmele so ryüti; nhontse gon loho, lo tsü sika kenshen gü, tsüle lazo raja, kazü aphu so raja thyüti.

⁴⁰Lo tsüsika raja pezi gü, tegi kekvu hontseo tha aphu jonkha lo vükha loti. Lo tegi le tha vükhala kehü hontse tsügü le mhundyü ki rajadan aphu boren lati.

⁴¹Nle a-pha lo a-zenkero dan le peha le gin lo peha le tegi tse kethyü hyu. Tsükon le kenjünkho kethyü raja thyü ti. Tsüle tegi kekvu peha binti, kechamvule gin lo tegi kerhün bin.

⁴²Apha zenkero le gin lo tegi kerhün kebin yatselo raja kekenjün peha le kvu lo kecha gü le kvu mvuti.

⁴³Nle tegi le gin kerhün kebin hyu. Raja tsügü kesen dan le kelo-o kami kerhün kela ndoti, ai tsüdan le tegi le gin kerhünlo keho hontse kerhün loho.

⁴⁴Tsüdan le kekvu kesen gwünkho ka tsangge Sunggigü le rajaphen nme penso shüti, lo tsüle a-keni thyüla loho. Tsüle mele a-so kvuloho, ai raja aphu bokemhe lati, tson-o tsüle kethonthen bintin lati.

⁴⁵Nle tso temi ben le kesü kemvu nme le chye tsüryüo dihontse thamen tegi, lazo, gin, rakagi lo suna pe kethyü tsügü jon layo hyu. Kekvu Sunggigü le ryükejü ki nyu thyü tiyo pe raja gü ka zobin nle. Ale nle nmin kethyü hontse nka zo lo a-kon ketsin gü pe ntesha laso.”

⁴⁶Tsüselo Raja Nebuchadnezzar le kazü nyu nkhün tsüo meno kerüshvu rora thyüpe Daniel tsü lotse ahza hoshü.

⁴⁷Raja gü le zo, “N Sunggigü le terodan aphu so kedatsingü, rajadan so Npugü, lo kekebu jokon pe hishü kehügü le. Ale tsü sha laso, kechamvule nle kekebu jokon zokekho lo.”

⁴⁸Tson-o a-le Daniel pe keda nyu nme thyüshü, jwen kegwa kechon pe tsü, a-lo pe Babilon kazü kentsen gü thyüshü, lo a-lope raja tsontsin dan aphu so keda gü thyüshü.

⁴⁹Daniel kehi hontse raja gü le Shadrach, Meshach lo Abednego dan khipe Babilon kazü sakethü nyu keda thyüshü; ai Daniel we rajabin nyu bin.