Read Southern Rengma Naga DANIEL 3 Bible Online

DANIEL 3 - Southern Rengma Naga bible

DANIEL 3

¹Nebuchadnezzar le suna pe thamen nme thyülo, a-ketetso le meter nkio tsenyü lo lo a-kegon le meter kenshen kho, Babilon kazü nyu Dura ketejon ki tsüpe senshü.

²Tson-o rajagü le ahza hoshüo a-hensin raja dan, Ahng dan, Ahng keshendan, Commissionerdan, kenyakentsennyu, kerathünyu, kekvukesen nyu, lo kedanyu aphu no ryüo kequenlo lotse shü. Anyugun le raja Nebuchadnezzar le thamen pe senkeshü khinkeshe nyu binti tse bin.

³Keda aphu tsü khinkeshe genyu kequenlo lo thamen gü mhundyü nyu sokü keloka,

⁴jolo sen tetsosa shü, “Senye, tsipwen lo khwen kechacha aphu!

⁵Hagun le shukekhun khwen, kheli, lyre, Zither lo harp; lo lükhin kechacha aphu kerhün kethyü khwenyü loti. Lü binzenlo ntsin, hagun le nkhün tsügü raja Nebuchadnezzar le suna pe thamen thyüo senkenjü gü rüshvuti.

⁶Lihigüe nkhün tsügü rüshvu kemvu gü whütse shwepe mahmi kenyü nyu shü lati.”

⁷Tsühontse lükhindan khwen tselo ntsin senye, tsipwen lo khwen kechacha aphu nkhün tsügü raja Nebuchadnezzar le suna pe thamen thyü pe sen kenjü gü rüshvu.

⁸Tsüselo Babilon nyu peha le tsü zosen-o Judanyu nkhin sola.

⁹Anyugun le Raja Nebuchadnezzar ka zo, “Raja gü no kethonthen yhun lota.

¹⁰Raja gü le ahza nme hoshüo lü thyü so ntsin temi aphu no nkhün tsügü suna pe kethyü thamen gü rüshvu lotse shü,

¹¹lo temi lihigüe nkhün tsügü tsü rüshvu kemvu gü we shwenpe mahmi nnyükebin nyu shü lati.

¹²Nle Judanyu peha pe Babilon nyu kazü so keda thyü kenjü- Shadrach, Meshach, lo Abednego hidan le rajagü ahza hokeshü nyümvu laso. Tsüdan le nle pe senkeshü nterogü nkhün tsügü rüshvu mvule.”

¹³Tsüka Raja gü le anyunta sa la njü-o mishendan tsü zen-o a-ki ryü lotse ahza hoshü.

¹⁴A-le anyugun ka, “Shadrach, Meshach lo Abednego hagun le a tero rüshvumvu lo nkhün tsügü ale suna pe kethyü thamen sen keshü rüshvu mvu letsela ketsin ole?

¹⁵Tsügenyu ntsoka we hagun le shu, oboes, lyre, zither lo harp, lo lükhin kecha aphu khwen nyülo lo nkhün tsügü thamen gü rüshvulo. Hagun le tsonmvu yatselo, whütse hagun shwen pe mahmi kenyü nyu shü lati. Hagun we hagun kenilo kegwa tero le bin letse rüchün le?”

¹⁶Shadrach, Meshach lo Abednego dan le kenishü, “Rajagü, agun le agun npvü agun no pen nyü mvule.

¹⁷Agun le a-lothyü kehü Sunggigü le mahmi kenyü lo nkekvu nyu agun kenilo gwalo a-le thyüti.

¹⁸Ai a-le tson mvu letse-e agun le ntero rüshvu loho, lo agun le nkhün tsüo nle senkenjü suna pe kethyü thamen gü tsü rüshvu loho.”

¹⁹Tsüselo Nebuchadnezzar le a-nyunta ritsin-o Shadrach, Meshach lo Abednego dan gen a-nyunkenta le a-mhun-e nhonla. Tsügenyu a-le a-temidan no mah thyü pe gwen tsenyü gen nyen shü lotse shü.

²⁰Lo a-le a-rihü dan nyu kenkotsin nyu no anyugun mishen tsü phinlo-o pe mahmi kenyü nyu shwen shü lotse johoshü.

²¹Tsügenyu tsüdan le bola, mirün, perün, phinya aphu pvükebin ka phinlao shwen pe mah gü nyu shüla.

²²Raja gü le ahza ha nkosa shüo mah thyü pe nyensa lotse keshü genyu, mah kenyü le anyugun shwen pe mahmi nyu keshü nyu rola.

²³Lo Shadrach, Meshach lo Abednego dan le anyugun kephin pvüo mah kenyü nyu chela.

²⁴Nebuchadnezzar le a-dun thyüo whütse n chwe soryü. A-le a-hensin keda nyu ka shün, “Ngun le mishen phin pe mahmi kenyü nyu shwen shü mvu ole?” Anyugun le kenio, “Ele, rajagü, ngun le tsonle.”

²⁵A-le shün, “Tsonlo nyuthyüo ale mizi le mah nyu hokebin hyubin nla? Anyugun phinmvu, lo anyugun ro nthyü kethyü thame shamvu lo mizi gü le tsanggelonyu nme hontse le.”

²⁶Tsügenyu Nebuchadnezzar le mahmi nnyü kebin khenpvü ka güo koshü, “Shadrach, Meshach lo Abednego! Ketetsotsin Sunggigü gonyu dan! Chwiryülo!” Tson-o anyugun le gwentse chwi ryülo.

²⁷Raja dan, Ahng dan, Ahng keshen dan, lo raja hensin keda kechadan le mah le ro mvukela mishen dan nri titse ryü. Anyugun pehü kero hyumvu, anyugun phinya romvu, lo anyugun gen mah rün-e nyü mvu.

²⁸Rajagü le zoshü, “Shadrach, Meshach lo Abednego Sunggigü shwenle! A-le a-lilonyu nipe a-lothyü lo a-tenyen kehüdan kenishwilo sele. Anyugun le anyugun Sunggigü a-me tero nme-e rüshvu mvu letseo ale ahza khikeshü-e zen mvulao anyugun keyhun hoshüla le.

²⁹“Tsügenyu senye, tsipwen, lo khwenjo lihigüe Shadrach, Meshach lo Abednego dan Sunggigü rühvu kemvu jo kejo gü süthüsürüla lo a-ka nke la lotse ale johoshü bin nyo. Tero kecha nme-e hihontse me kenishü mvule.”

³⁰Tson-o raja gü le Shadrach, Meshach lo Abednego dan penso nipe Babilon kazü sakethü so keda thyüshü.