Read Southern Rengma Naga DANIEL 4 Bible Online

DANIEL 4 - Southern Rengma Naga bible

DANIEL 4

¹Raja Nebuchadnezzar le jolo nipe kazünyu senye, khwenjo lo temi aphu ka shü: “Kegwagü thyülo!

²Ketetsotsin Sunggigü le zensü lo nduntho pe ahikeshü jodan nyü shülo.

³“Sunggigü le pe ngun hi keshü dan tsüle ditsüki thyü ndun thyüyo! A-le nduntho thyü kehü dan tsüle ditsüki kvuyo! Sunggigü le kethonthen raja thyüti; a-le gwünkho aphu kekvu senti.

⁴“Ale arajabin nyu gwakenye kethyü sen-o akenyü lo ketegvüo yhun hü.

⁵Ai ale jükebin ka kerüshvu kethyü nmin lo tsemi nyu kenrin kethyü hyu.

⁶Ale Babilon nyu raja tsontsinnyu aphu zen aki ryüo amin kon zo shü lotse ahza hoshü.

⁷Tsüselo me rüla kezonyu, jadunyu, temvunyu, lo shyenyü keswünyu zen ryü, tson-o ale amin pe anyugun kazo, ai anyugun le amin kon zolo mvula.

⁸Tsüselo Daniel le yüryü, (a-lope Belteshazzar ko hü tsüle aterogü zan.) Kenshün Sunggigü kapu le a-gen bin, tsügenyu ale nminkelo pe a-ka zo. Ale a-ka zoshü.

⁹Me rüla zokehü kedagü Belteshazzar, ale kenshün terogü kapu le ngen kebin, lo nle jokon kekebu aphu shalo kehü ale nsha. Amin le hihontse le. A-kon le nyuyo pe aka zoshü.

¹⁰“Ale jütsü kethyü ka amin ki kazü lvunyu senbin kethon keda nme hyu.

¹¹Tsüle tsang tio kazünyu temi aphu hyulo kemvu then min kenye bin.

¹²A-nyü le zegwasa, lo a-sha le kazü aphu tyülo kekü nsha-o sükegu bin. Tehenthyüdan le a-kengü ka rüyü, tegü le a-rodan gen a-seü thyü, lo yhunkehü aphu a-sha tyü.

¹³“Ale tseminkon gü rüchün kebin ka, tsanggelonyu petsü lo khwen kehü nme le tsangge tsüryü kejü ale hyu.

¹⁴A-le nra tetso-o zo, ‘Senbin gü phenla, lo a-rodan duthüla; a-nyü dan rhonla, lo a-sha bokezenla lo. A-hensin ki tehenthyü dan lo a-rodan gen tegüdan hüla.

¹⁵Ai tegi lo lazo ron pe a-tun dü pe binla. Tsü khepe tehen nyu binla. “ ‘Tson-o khütso no temi higü gen che tson-o a-no tehenthyü dan zen-o tehen nyu yhunlo.

¹⁶Chen tsenyü a-le temi nyun pvü loho, ai nyukhu nyun pvüti.

¹⁷Higü hile petsü lo khwen kehü tsanggelonyu gü le rhikelo jole. Tsügenyu, lihiki temi aphu no Kekvutsin Sunggigü le temi raja dan gen kekvu le bin, lo a-le tsü lope senyu kejüloyo pe tsüla logwa- pe mele sha hü kemvu nyue tsüla gwa tse kethyü sha lolo.’

¹⁸“Raja Nebuchadnezzar le zo, ‘Higü hile ale nmin kethyü güle,’ tsügenyu Belteshazzar, tsü kon le nyuyo aka zoshü. A tsontsin nyu nme-e aka zolo mvu laso, ai nle zolo gwa, kenshün teronyu kapu le ngen kebin genyu.”

¹⁹Tsüka, Daniel, Belteshazzar letse kokehü gü le a-dunthyüo thame zolo mvula. Raja gü le a-ka zo, “Belteshazzar, amin lo a-kon dan tsügenyu nshvunya.” Belteshazzar le a-jo kenishü, “Raja gü, nmin lo a-kon tsü no n shwikerüchün nyu gen a-me n ge thyü nya nda.

²⁰Senbin thonsa lo tsang tio kazünyu temi aphu hyu logwa bin.

²¹A-nyü le zegwasa, lo a-sha le kazü nyu temi aphu leyilo kekü thyübin. Tehenthyü le a-kengü ka bin, lo tegü le a-rodan gen a-seü thyü hü.

²²“Raja gü, nle senbin tetso lo nko kethyü gü tsü. Nle minsa kügü tsang-e ti, lo n kekvu le kazü apentha ti.

²³Raja gü le nri kebin ka tsanggelonyu nmele tsangge tsüryüo zo, “Senbin gü phen lao nke lalo, ai a-tun we khepe kazü nyu bin la. Tegi lo lazo ron pe dyü pe tehen ki bin lalo, khütso no temi higü gen che, lo a-no chen tsenyü tehen thyüdan zen-o yhun binlo.’

²⁴“Higü hile a-kon le, rajagü, lo higü hile kekvutsin Sunggigü le ngen thyü nrün zoshü le.

²⁵Temi dan nyu nhülati, lo nle tehenthyü zen-o yhunti. Chen tsenyü nle methutse hontse tehen sütyüti, lo kendo nyu jüo khütso no ngen che ti. Tsüka Kekvutsin Sunggigü le temi raja aphu ketsen hü, lo a-le tsüdan pe a-le kejükelo lihigüe tsüla logwa tse nle sha loti.

²⁶Tsanggelonyu gü le a-tun gü pe kazü nyu khela lotse shü. Tsüle nle Sunggigü le kazü aphu so kekvu senkehü gü letse shakelo ka nle raja thyü niti.

²⁷Tsügenyu, rajagü, ajo then shülo. Mu sin nya, kenjü gü thyülo, tson-o kendinyu njünlo. Tsonlo lo nle gwa kenye binti.”

²⁸Hi aphu raja Nebuchadnezzar gen thyüla.

²⁹Shye tseryü kenyhun nti sika, a-le Babilon nyu a-raja ka so gen hokehü ka,

³⁰A-le zo, “Babilon le ditsüki gon yo nrishülo! Ale tsü thyüpe anyida kedagü thyüo akekvu-kegin, azankechwi lo araja pe tesha hü.”

³¹Jodan le a-mün ka chwiryülo kemvu ka khwen nme le tsangge zo tsüryü, “Raja Nebuchadnezzar, Ale kezo khwen nyülo! Ntsoka nraja kekvu sentinla so.

³²Temi dan nyu nhülao, tehenthyü dannyu yhun, lo chen tsenyü methutse hontse tehen sütyüti. Tsüsiki nle kekvutsin Sunggigü le temi rajadan ketsen hü, lo a-le tsü lope lihigüe kejükelo gü tsülagwa letse nle shaloti.”

³³Jo dan le ketsin thyü whütse ryüla. Temi dan nyu Nebuchadnezzar hüla lo methutse hontse tehen sütyütin la. Khütso le a-min gen che, lo a-hü le logi hü hontse thon lo a-tsen le tegü tsen hontse thon chwiryü la.

³⁴“Chen tsenyü penkela ka,” Raja gü le zo, “Ale tsangge penshü, lo akentsen le niryü la. Ale kekvutsin Sunggigü shwen shü, lo kerühvu zankechwi khipe kethonthen yhun kehü gü tsü. “A-le kethonthen kekvu senti, lo a-rajaphen le gwünkho aphu binti.

³⁵A-le kazü temidan nripe lihikemvu thyühü; Tsanggelonyu lo kazü nyu temi dan le a-kekvu hensin. Nme-e a-kenda gü ntsun loho nmvue thyükeshü thodan ketso lo nrün ndi.

³⁶“A kentsen le niryükelo ka, kerühvu, lo araja, lo arajaphen zankechwi aphu pe atsü nila. A hensin keda kekvunyu le azenlo, lo araja kekvu pe atsüni, himhundyü nyekie kerühvu gonkvu kethyü pe atsü.

³⁷“Tsügenyu, ale Nebuchadnezzar, ntsoka ale Tsangge Raja gü Shwen, rühvu lo a-zankechwi thyü bin nle. A-le thyükehü aphu njü lo ketsin, lo a-le lihigüe ketekho kehü gü thyü tsenyo la logwa.”