Read Southern Rengma Naga DANIEL 5 Bible Online

DANIEL 5 - Southern Rengma Naga bible

DANIEL 5

¹Kheje me Raja Belshazzar le kedanyu ye nme kope keho keda thyü, tson-o anyugun le kengüo zu tsü.

²Anyugun le tsüketse ka, Belshazzar le a-pvü Nebuchadnezzar le Jerusalem Kerüshvuka nyu pvükeryü suna lo rakagi honpen lo khun tse senryü lotse ahza khishü. Raja gü le tson-o a-le, lo kedanyu, a-nunyu, lo a-thenudan no honpen tsüdan ka tsü nrün genyu.

³Whütse suna honpen lo khun dan senryü, tson-o anyugun aphu tsüdan ka zu loshü tsü

⁴lo suna, rakagi, lazo, tegi, tesen, lo tso pe kethyü terodan shwen.

⁵Tsontsin temi ben nme le mah le bensa kebin Raja kabon gen tha thu sola. Lo raja gü le temi ben le tha thu kebin tsü hyu.

⁶A-le kerüshvulao a-mhun jvuri lo a-ke nsü sola.

⁷A-le peha no jadunyu, temvunyu lo shyenyü keswünyu koshü lotse nrasen shü. Anyugun le yükeryü ka raja gü le anyugun ka zo, “Lihigü kethu higü swüo a-kon zope azenkelo gü le raja phinya pe nben, kerühvu suna rasü pe nlu, lo rajaphen hinyu kekvu kesen kenshengü thyüti.”

⁸Raja tsontsin nyu le ryü, ai nme-e thakethu gü swü nmvue tsü a-kon zope raja gü hilo mvula.

⁹Raja Belshazzar le sheseo a-mhun le njvu kvula, lo a-hensin kedanyu dan le nyuthyütiyo thame rüchünlo mvula.

¹⁰Raja gü a-jvu le raja lo keda nyudan le nra kebin khwen tseshüo kehobin nyu yüryü. A-le zo, “Raja gü no kethonthen yhunlo! Nkevü lo nmhun no njvu nyata.

¹¹N rajaphen nyu temi nme kenshün teronyu kapu le a-zen kehü le bin nle. Npvü le raja thyüketse ka temi higü le ntsen, thasha, lo teronyu kensü hontse kethyü pe hishü le. Lo npvü raja Nebuchadnezzar le a-no me rüla kezonyu, jadunyu, temvunyu lo shyenyü keswünyu so keda thyüshü.

¹²A-le gwarüchye, nsü min kon zokela, jokon kerü sha, lo kekebu zo kondan shalo kegwa dashasa kethyü le bin; tsügenyu meno gü Daniel, raja gü le thokela pe Belteshazzar letse kela gü koshülo, tsonlo a-le hidan hile nyuyo aphu zope nzen loti.”

¹³Whütse Daniel zen yüryüo raja mhundyü nyu shü, lo raja le a-ka, “Nle apvü raja gü le Juda ki zenkeryü dogü Daniel tsüle?

¹⁴Kenshün teronyu kapu le ngen bin lo nle thakesha lo kensü kegwa le ngen bin letse ale nyülo.

¹⁵Tsontsinnyu lo jadunyu no thakethu swü lo a-kon zoshü lotse koshü, ai anyugun le a-kon shalo mvu laso.

¹⁶Nle kekebu jokon shalo, lo jokentsun dan zolo hü letse ale nyülo laso. Nle tha kethu higü swülo lo a-kon zope ahilo yatselo, nle raja phinya ben, kerühvu suna kerasü lu, lo arajaphen nyu kekvu kenshen gü thyüti.”

¹⁷Daniel le zonishü, “Njwen tsü nle lo nmvulo pe peha tsü lo. Ale swüpe raja gü hi lo a-kon zope nzen tile.

¹⁸“Kekvutsin Sunggigü le npvü Nebuchadnezzar no raja keda thyü lo rühvulo kekü kekvu pe a-tsü.

¹⁹A-le gonsa kethyü genyu senye, tsipwen kechacha, khwen kechacha aphu a-nshvuo ndün. A-le boshvu kenyü nyu boshvula; rhünlo kenyü nyu no rhünlo. A-le senyu rühvu nmvue nshwela nyüyo tsü thyü lahü.

²⁰Ai a-le ketekho, nyunrü, lo rigwamvu kela genyu a-kedakhün gen a-hüla lo a-kerühvu ndila.

²¹Temidanyu a-hüla, lo a-nyun le nyukhu nyun hontsela. A-le tehen gadadan zen-o yhun, methutse hontse tehen sütyü, lo kendo nyu jüo thame a-sun mvuo khüzü no a-gen chye. Kenkhin ki Kekvutsin Sunggigü le temi raja aphu ketsen lo khipe a-le kejükelo nyu tsü la logwa letse shalo.

²²“Ai nle a-nyu thyüo hidan aphu shabin-e nthyü tsenyo lomvu laso.

²³Nle tsangge kebin Npugü ntsun, lo a-Kerüshvuka nyu sen keryü honpen lo khun dan sen ryü laso. Nle, lo nhensin kedadan, nnudan, lo nthenudan le tsüdan ka zu shü tsüo suna, rakagi, lazo, tegi, tesen, lo tso pe kethyü tero dan tha hyulo nyüe mvu lo thame shahü kemvu tsü shwen laso. Ai nle nkesi lo kerhün ndoshü kehü lo ntho aphu ketsen kehü Sunggigü rühvu mvu laso.

²⁴Tsühontse kethyü genyu Sunggigü le ben nipe hidan thu shü.

²⁵“Tha kethu tsüle hi: ‘Swülo, swülo, kensukenshen swülo, kenjünlo.’

²⁶Lo hile a-kon: swülo, Sunggigü le nraja kethyü jon swülo lo pe a-keni thyü laso;

²⁷kensukenshen sülo, kesükü ka nsüo nshen ritsin laso;

²⁸kenjünlo, nraja le kenjün laso, lo pe Medianyu lo Persianyu tsü laso.”

²⁹Belshazzar le chosa tseo raja phinya pe Daniel nben, lo kerühvu tyü suna kerasü pe agunda ka shü lotse ahza khishü. Tson-o a-le Daniel lope a-rajaphen nyu kekvu kenshen gü thyü shüla.

³⁰Tsüje Babilon raja Belshazzar gala;

³¹lo Darius, Medianyu gü a-keyhun chen hentsero kenyhun kela gü le raja kekvu seü lola.