Read Southern Rengma Naga DANIEL 6 Bible Online

DANIEL 6 - Southern Rengma Naga bible

DANIEL 6

¹Darius le ahng tsio nki kejü pe a-raja kazü so keda thyü titse rhilo.

²Tsü nyeki a-le Daniel lo kecha mihvu kejü pe ahngdan tsontsin lo raja tho nri nrün genyu kejülo.

³Thon mvutse Daniel le kedanyu lo ahng nyu nyeki a-tho gwa nrün hyu lola. A-le gwarüchyesa kethyü genyu raja gü le a-khipe a-rajaphen apentha keshwi gü thyü shüla.

⁴Tsüselo keda nyu lo ahngdan le Daniel le tha thyü zükeshü peha tenlo nyüo ndo, ai hyu lomvu, kechamvule Daniel le tenyenlo kekünyu lo thame thyüzü nmvue njükemvu thyüla mvu.

⁵Anyugun le khinyunyu ka, “Ngun le Daniel nkhin nrün le a-nyünyu genyu a-me tson kecha thame hyulo mvula sele.”

⁶Tsügenyu anyugun le raja teno titse güo a-ka zo, “Raja Darius, raja gü no yhun kethon gü thyülo!

⁷Agun nraja hensin tha ketsen kehü- kedanyu, ahng dan, ahng keshennyu, lo keda kechadan aphu raja gü no ahza nme thuo zo nko shü mvulo shvu letse kejorhünlo sele. Jon shenryü jaka hi temi nme-e raja gü ka a-me tero kecha nmvue temi nme-e ka thame hinya lotse ahza khishülo. Lihigüe ahza higü gwenrhokela gü shwen pe shünyho le sükebin kü nyu shü lati.

⁸Tsügenyu raja gü no ahza tsügü gen azan thulao nishülo, tsonlo tsüle nko loti. Medesnyu lo Persianyu tejvü ka tsü le kelu loho.”

⁹Tsügenyu raja Darius le ahza tsü gen a-zan thula.

¹⁰Daniel le ahza tsügü gen raja zan thula sele tse nyü kelo ka a-le kaki gun la. A-ka he tesogü ki Jerusalem kentsun kipon kafüphe le bin. A-le a-zin thyü kehü hontse kafüphe khinsheo khenyüme gwenshen gen Sunggigü ka kehi thyü.

¹¹Daniel shwikerüchün nyu le a-le Sunggigü ka kehi thyü kebin hyukelo ka,

¹²anyugun aphu kengü gü raja gü ka Daniel nkhin sola. Anyugun le zo, “Rajagü, nle jon shenryü jaka hi lihigüe n nyeki tero nmvue temi nme ka tha lihie hilo pe shünyho le sükebin kü nyu shwen shü la titse nzan thu laso.” Raja gü le kenishü, “Ele, Medesnyu lo Persianyu tejvu kenko kelulo nrün kendi jo khishüle.”

¹³Tsüselo anyugun le rajagü ka zoshü, “Juda temi donyu nme, Daniel tsüle rajagü rühvu mvu lo nle khishwi keshü ahza zen mvula sele. Tson-o a-le khenyü me gwenshen gen kehi thyü zin bin nle.”

¹⁴Raha gü le tsü nyükelo ka, a-le a-nyun gwamvu lo Daniel kenishüla nrün genyu a-hen thyüo tson peha füso. Yhüko chela kemvuthen a-le ndo.

¹⁵Tsüsika temi tsüdan le raja gü ka niryüo a-ka zoshü, “Raja gü le Medesnyu lo Persianyu tejvu nyu raja gü le khishwi shü kela ahza gü tsü kelulo kemvui letse kethyü nle shabin.”

¹⁶Tsügenyu raja gü le meno Daniel tenlo-o shwen pe teme le sükebin kü nyu shüla lotse ahza shüla. A-le Daniel kazo, “Nle ketsin thyüo a-lothyü kehü n Sunggigü no nkenishwi keshügü thyüta.”

¹⁷Tso nme pe tekhün kü khinla, lo nme-e no Daniel kenishwi mvu nrün genyu raja gü le a-npvü a-mohor lo a-hensin kedadan mohor pe tsogen vüla.

¹⁸Tsüselo rajagü le a-rajabin nyu raniryüo thame tyümvu, lo shekerhün tho thame pe a-mhundyü shü mvu, lo khünsin jüe mvula.

¹⁹Tsangbenlo ntsin raja güle nyhunsa tse teme kü ki güo

²⁰A-le tsü tikelo ka, a-nyun gwamvusao Daniel ko, “Rhünkehü Sunggigü gogü Daniel! Nle ketsin nyu a-lothyü kehü Sunggigü le shünyho dan ka nkenilo mon?”

²¹Daniel le kenishü, “Raja gü no yhun kethon gü thyülo!

²²Sunggigü le shünyho dan no a nthyünnyümvu nrün genyu a-lilonyu nishüo anyugun mün khinla le. A-le tsü thyüshü, kechamvule ale thyüzüla mvu lo nkenyükemvu thyümvu tse kethyü shakebin genyu, raja gü.”

²³Raja gü le a-sherhün ritsinlao teme kü nyu Daniel khishwila lotse ahza hoshüla. Tsügenyu anyugun le a-khishwishü, lo a-gen kejünkeja thame thyümvu kethyü hyulo; a-le Sunggigü tenyen kehü genyu.

²⁴Tsüselo raja gü le Daniel kenkhinnyu aphu tenlola lotse ahza hoshü, tson-o anyugun, anyugun nunyu lo anyugun nyenyu sin-o shünyho le sükebin kü nyu shwen shüla. Anyugun le kazü tilo kemvu kanyu shünyhodan le anyugun tenlo-o anyugun ru aphu nkaren la.

²⁵Tsüselo Darius le lesü thupe kazünyu senye, tsipwen lo khwen kechacha aphu nyu shü: “Kegwagü thyülo!

²⁶Ale a raja kazü nyu kebin aphu no Daniel Sunggigü nshvu lo rühvu lotse johoshü bin nyo. “A-le rhünkehü Sunggigü, lo a-le kethonthen kekvu senti. A-rajaphen le thame ka-e nkela loho, lo a-kekvu le a-keni thyüla loho.

²⁷A-le kenishü lo kenishwishü hü; a-le tha keda lo ndunkethyü thyü hü tsangge lo kazü nyue. A-le shünyho no Daniel ten mvuo kenishü.”

²⁸Daniel le Darius keda gwünkho lo Persianyu Sairus keda gwünkho ka gwakenyelo.