Read Southern Rengma Naga DANIEL 7 Bible Online

DANIEL 7 - Southern Rengma Naga bible

DANIEL 7

¹Belshazzar le Babilon raja thyükelo chen kerigü ka, khejenyu ale amin nme nmin lo tsemi nme hyu. Ale mingü thulo, lo higü hile tsügü:

²tsüje amin ki kehyu: Tsangkenbu le lizin hizin aphu nyu gun ryüo züdagü whünbin.

³Nyukhu pezi le züda gü nyu chwiryü, nme-e nme nfümvu.

⁴Kerigü le shünyho, ai logi sekin hontse pvü. Ale nribin ntsin, a-sekindan tsü le nrhenla. Nyukhu gü penso-o no temi hontse solo. Tsüselo temi nyun khipe a-tsüla.

⁵Nyukhu shahvu gü le thyügwen hontse lo phahvu nti lo rhun-o sobin. Nikhonru kenshen nka pen bin, lo tha khwen nme le tsügü ka zoshü, “Gülo, tson-o thyü nle tyükenyü kho tsü tyülo.”

⁶Lo ale nribin nsen nyukhu kecha nme le chwiryü. Tsü le meren hontse, ai a-seren gen tegü sekin hontse pezi, lo a-pe pezi le bin. Lo tsüle kekvu le kebin hontse hyu.

⁷Ale tsü nribin nsen, nyukhu pezi gü le chwiryü. Tsüle kvusa, kenrin lo shwikenshvu. Tegi hü keda pe a-le tenkelo dan nkaren, lo tsüdan so kedüla. A-le nyukhu kechadan hontse mvuo, a-tse tseryü le bin.

⁸Ale a-tsedan tsü nrirü kebin ka a-tse keshen nme le tsüdan nyu chwiryü. Tsügü le himhundyü binkela kenshendan bosela. Tse tsügü le temi yhütyü lo mün pvüo kemakin lo ketekho sabin.

⁹Ale nrikebin ka kedakhendan pe shüshü. Kethonthen yhun kehügü le kedakhen dan nme gen dunlo. A phinya le khütsa hontse chon, lo a-pehü le thyühü kenshün hontse. A-kedakhen le mah kenyü gen bin-o benchvü tse bin,

¹⁰lo mah züri le tsünyu tsun chwiryü bin. Temi yeye le a-lothyü, lo shin shin le a-mhundyü nyu sobin. Jokera binzenlo, lo lesü dan helo.

¹¹Ale nribin nsen nyukhu tse keshen gü le kemakin-o jozo kebin nyülo bin zun. Ale nrikebin ka nyukhu pezi gü boshvu la, lo a-min lope mah kenyü bin nyu shwen shüo rola.

¹²Nyukhu kechadan kekvu sen tinla, ai anyugun no jon keshanyu yhun binlo kegwa khishü.

¹³Khejegwen tsemin higü hyu kebin ka temi hontse nme hyu. A-le nmha lope a-hunpvüo a-khonni ryüjü, tsügü le kethonthen yhunkehü gü ki gü, a-mhundyü nyu binlo.

¹⁴Kekvu, kerühvu, lo raja kekvu pe a-tsüshü, senye, tsipwen lo khwenkechacha aphu a-lothyü nrün genyu. A-kekvu le kethonthen binti, lo a-raja le a-keni thyüla loho.

¹⁵Ale temin gü hyu shüo nshvu, lo akevü sala.

¹⁶Ale tsü nyu sokebin nyu nme ki güo a-no tsü aphu pe aka zolo tse hi. Tsügenyu a-le a-kon zoshü.

¹⁷A-le zo, “Nyukhu keda pezi hile kazünyu chwiryü nrün raja pezidan.

¹⁸Lo kekvutsin Sunggigü temidan le raja kekvu hyulo-o kethonthen senbinti.”

¹⁹Tsüselo ale nyukhu pezigü, kechadan hontse kemvu, nyukhu kenrin, a-tsen lazo pe kethyü, lo tegi pe a-hü kethyü lope a-le tenlo kela dan nkaren lo tsüdan kedü kela rüla shasin lonyü so.

²⁰Lo a-pe gen a-tse tseryüdan, lo kenkhin ki chwikeryü tse, lo a-tse kenshen borenkela gü rüla shanyü lola. A-le a-yhütyü lo kemakin ketekho jozo kehü mün le bin. Tsügü le kecha aphu nyeki kenrin thyü kvu.

²¹Ale nribin nsen, a-tse tsügü le Sunggigü temidan zen terithyüo anyugun so kvula.

²²Tsüselo kethonthen yhunkehü gü le ryüo kekvutsin Sunggigü temidan jünzo-o jokera penshü. Sunggigü temidan no raja kekvu lolo kegwa gwünkho le ryüla.

²³Hihontse a-kon zo pe ahi: “Nyukhu pezigü le kazünyu raja pezigü lo a-le raja kecha aphu nyeki kecha thyüti. A-le kazü apentha borenla lo tsüso kedü lati.

²⁴A-tse tseryü dan tsüle kazü tsügü sogon nrün raja tseryü dan. Tsüsika raja kecha nme le soryüti; a-le kerika dan nyeki kechathyü lo raja kenshen so kvulati.

²⁵A-le kekvutsin Sunggigü ntsun-o jozo lo Sunggigü temidan nshwenti. A-le Sunggigü temidan ketsenyü jvu lo anyugun nga jondan kelula titse ndoti, tson-o Sunggigü temidan le chenshen-o ponha a-kekvu hensin binti.

²⁶Tsüsika tsangge a-jün kera-o, a-kekvu sentin lati, lo a-bokemhe shü lati.

²⁷Kazü nyu rajadan kekvu lo keda aphu pe kekvutsin Sunggigü temidan tsü lati. Anyugun raja kekvu le ndila loho lo kazünyu kekvu kesen nyu aphu anyugun lothyüo anyugun jo zen ti.”

²⁸Higü hile tha rüla khikeshü kenkhin gü. A kerüshvulao amhun-e jvuri la, lo ale tha aphu pe anyun ki shülo la.