Read Southern Rengma Naga DANIEL 8 Bible Online

DANIEL 8 - Southern Rengma Naga bible

DANIEL 8

¹Belshazzar le raja thyü kelo chenshen gü ka ale tsemin kenyhun gü hyu.

²Tsemin ki tsü ale whütse Elam kazü ki Susa nyida khwen kenjü gü nyu kebin a npvü ahyulo. Ale Ulai züri seki sobin,

³lo züri tsügü seka ale tanyütse a-tse kethon kenyhun kepvü hyu, nmegü le kechagü nye thon lo shün kvu.

⁴Tanyütse gü tsüle a-tse lope nkhünzin, tesozin, lo tesinzin shen kebin hyu. Nyukhu nme-e a-khin lomvu, nmvue a-kekvu nrhi lomvu. A-le thyükenyü thyü lo ketekho ketsin tinla.

⁵Ale tsüle nyulayo tse rüchün kebin ka, tenyü nme le nkhünzin tin chwiryü, a-le tin nmhensao a-pha pe kazü-e kesü mvu. A-le a-yhütyü hvu jaka a-tse kvusa kethyü nme pvü hü.

⁶Tsügü le ale züri seka kehyu gü tanyütse gü ki a-kekvuthyü tinryü.

⁷Tsügü le tanyütse gü when kethyü hyu. A-le a-nyun ntasao when gü a-jon-o a-tse shahvu bosela. Tanyütse gü le nrenlo kegwa kekvu ndila. Tson-o a-jonketo pe kazü nyu shüo a-kedüla, lo nme-e a-kenilo kegwa ndila.

⁸Tenyü gü le kvuketsin-o ketekho kvulo la, ai a-le kvusa kebin ka a-tse gü bosela. Tsübin nyu a-tse pezi le nichwiryü, lo nmeme tse bin kechacha ki ntsun.

⁹A-tse pezidan nyu nme gen a-tse keshen nme le chwiryü, a-kekvu le kethen sen-o tesinzin, nphozin lo Zopebinkenjü kazü kipon kethen so.

¹⁰Tsüle kvusa gü tsangge rihüdan, shyenyüdan-e whenlo kegwa thyüla, tson-o tsüdan peha süshye pe kazü nyu shüo anyugun so kedüla.

¹¹Tsüle tsange rihü kedagü sümvu la, khenyütsen kerüshvu thyüpe a-ketsüe khinla, lo Kerüshvuka-e nrhula.

¹²Temi le tsünyu khenyütsen kerüshvu kethyü sunka, kemu thyüla, lo ketsenyü ketsin gü pe shwenla. A-tsegü tsüle a-le tha kethyü aphu nyu gwalo.

¹³Tsüselo ale tsanggelonyu le khinyunyu ka shün kebin nyülo, “Tsemin ki hyukebin tsüle dithen bin tiyo? Kemu gwakemvu gü hile dithen khenyütsen kerüshvu hi khinbin tiyo?”

¹⁴Tsanggelonyu kecha gü le hihontse keni keshü ale nyü, “Hile jon 1,150 keti thyüti. Hi gwünkho ka seyi gü lo lonyü gü-e kerüshvu tho thyü loho. Tsüsiki Kerüshvuka gü sen nilo ti.”

¹⁵Ale tsemin gü tsüle nyulayo tse shalo nyü kebin ka, nme le whütse amhundyü solo.

¹⁶Thakhwen nmele Ulai züri peri ki senshü, “Gabriel, a-le tsemin ki kehyu gü kon zope a-zenshü lo.”

¹⁷Gabriel le ryüo akhoka solo, lo ale akerüshvu lao kazü nyu chetsü la. A-le aka zo, “Silakehü Temigü, a-kon gü shalo. Tsemin gü tsüle kazü keni ki thyüti.”

¹⁸A-le a nthon bin nsen ale kazünyu chetsüo thame shamvu la. Ai a-le asülo-o apenso shüo,

¹⁹aka zo, “Ale Sunggigü nyunkenthün le dihontsela tiyo pe nhishü bin nyo. Tsemin gü tsüle kenkhin ki rüla.

²⁰“Nle kehyu tanyütse a-tse kenyhun kepvü gü tsüle Media lo Persia hvu tsin keshü.

²¹Tenyü tsüle Greece rajaphün, lo a-yhütyü hvu jaka a-tse kekvu gü tsüle raja kerigü.

²²A-tse kerigü bosekela siki pezi chwikeryü dan tsüle senye tsügü kenjün pe raja pezi thyüla nrün tsinshü, lo tsüdan le kerigü kekvu hontse loha lati.

²³“Raja tsüdan le keni thyüla nrün gwünkho le kho nnio anyugun le serimvusa-o shaja pe tsüla mvulo keshvu le keryü ka, a-nyunkerü, a-jvü gwamvu sa kethyü, lo kekhünkekho kethyü raja nme le soryüti.

²⁴A-le kvu chwiryüti, ai tsüle a-npvü a-kekvu nyu mvu. Tsügü le tha nke pe ketetsin thyü lo a-le tha kethyü aphu gwa loti. A-le temi kekvu nyu gen lo Sunggigü temidan gen kenke senryüti.

²⁵A-le kekhün kekho kethyü genyu a-kenku nyu chwiloti. A-le a-rüchün ketekhosao me tesha mvutse temi kechon nke lati. A-le raja aphu so kedagüe sümvuo khenti, ai temi kekvu sen mvuo a-nke lati.

²⁶Seyigü lo lonyügü kerüshvu tsemi kehyu kon zope nzenkela tsüle thyü chvuti. Ai ntsoka tsüpe zonyatse, tsü thyüpenlo nrün gwünkho kethon le bin zun kethyü genyu.”

²⁷Ale kvumulao jon peha ho tinla. Tsüsiki ale so-o raja gü le pe a tenyen keshü gü thyü, ai tsemin gü rüchün pe akevüo tsü shalo mvula.