Read Southern Rengma Naga HOSEA 10 Bible Online

HOSEA 10 - Southern Rengma Naga bible

HOSEA 10

¹Israel temi le vain a-sha nshasa kehü hontse. Anyugun le gwakenye lo kershvubin thyüchon. Anyugun kazü le tha hyu chon lo tso kenshün kesen thyü kezegwa pe rüshvu chon.

²Anyun nyu kekhünkekho kehü temidan le ntsoka anyugun kemu genyu kenjün thyü mvu loshvu. Sunggigü le anyugun kershvubin boren, lo anyugun tso kenshün kesen dan nke lati.

³Temi hidan le whütse hihontse zoti, “Ngun le Npugü nshvu mvukela genyu ngun raja ndi laso. Ai raja le ngun genyu nyu thyükeloi mon?”

⁴Anyugun le jo kenrunkenryü zo lo kenku johoshü lo a-kon kendi nyu me zen-o gwatho hünyo. Kenjü le njü kemvu thyülao, low phokela nyu jontsü gwakemvu le tsüchwi keryü hontse laso.

⁵Samaria nyida nyu keyhun nyu le Bethel ka suna pe kethyü methutse gü nkekela nshvu-o chechüti. Anyugun lo teromenkezü lothyükehü peshükedadan le tsü chechüti, Suna kezegwa gü le tsügen khülo lalo anyugun le chüti.

⁶Teromenkezü gütsü lope raja kedagü jwe thyüo pvü Assiria ki tsü lati. Israel le mejo zenkela gü genyu, kemeni lo keja lati.

⁷A-raja lope zü so gen senrosenrü chünsen kehü hontse pvüo tin lati.

⁸Rincho sunki Israel nyu le teromen rüshvu kehü Aven kerüshvu bin nke lati. Tsehü lo jontsü le anyugun kershvubin gen yhunti. Temidan le kazüthundan ko-o, “Agun kebulo!” lo rincho dan ka, “Agun sunlo lalo!” tson soti.

⁹Npugü le zo, “Israel temi le Gibeah ka kemu thyükeso siki kemu thyü pe a ntsun kethyü khela mvu. Tsügenyu Gibeah ka teri le anyugun hülo lati.

¹⁰Ale kemu thyü kehü temidan hi when-o shaja pe anyugun tsüti. Senyedan le kerhün-o anyugun ntsun, anyugun kemu kechon genyu shaja pe tsü lati.

¹¹“Israel le gwüngwa ka we senthyü sa kela methulü bwe, shye nyu titse ndao günyü kebin hontse hüle. Ai ale gunda kekhen nme pe a-gunda kezegwa gen shüo no thatho kekvu thyüni nrün genyu rhilo laso. Ale Juda no dyükonsü lo Israel no a-sithyü hü.

¹²Ale zo, ‘Hagun genyu kazü keshün tso, kentsenkenjü pe senlo, lo hagun le arüshvu kethyü nyu jochü hyulo nrün gü gvülo. Hile hagun le ranio hagun Npugü, aki keryü gwünkho le, lo ale ryüo jochü run pe hagun gen shüti.’

¹³Ai tson mvule hagun le gwakemvu sen shüo tsü gvu laso. Hagun kenku rasha chwikeryü gü tyü laso. “Hagun le terigaridan lo hagun shüpahü kechon tenyen kela genyu,

¹⁴teri le hagun temi gen ryüo nchwida kekhwen aphu nkelati. Tsüle raja Shalman le teri nyu Betharbel nyida nkela lo mejvü nyu lope a-nyenyu sin-o kedüshvu kela jon hontse lati.

¹⁵Bethel temidan, tsüle hagun gen thyü nrün gü tsüle, hagun le gwakemvu kenrin thyükela genyu. Teri thyüso ntsin Israel raja le silati.”