Read Southern Rengma Naga HOSEA 11 Bible Online

HOSEA 11 - Southern Rengma Naga bible

HOSEA 11

¹Npugü le zo, “Israel le nche ketse ka ale a-sohü lo alope anyu hontseo Ijipt nyu a-koshwilo.

²Ai ale a-ko chonlo, a-le rani a-zen nithen. Atemi le kerüshvu thyüpe Baal tsü; anyugun le rünkenyü rope teromen tsü.

³Ai Israel senthyü pe tsonchü kelo tsüle ale. Ale aben nyu atemi pensolo, ai anyugun le ale anyugun nucha kehü shalomvu.

⁴Ale keso lo shwikenjün pe anyugun nsüpe aki shülo. Ale anyugun pensolo-o pe a nsülo; Ale nkhün tsügü anyugun lüyi.

⁵“Anyugun le rani aki ryümvu letsela, tsügenyu anyugun le Ijipt ki ranila mvu loshvu, lo Assiria le anyugun so kekvu senti.

⁶Teri le anyugun nyidadan kesü thyüo anyugun nyida khinrun borho lati. Tsüle atemi nke lati, kechamvule tsüdan le anyugun mhundyü nyu kegwatsin thyü hü.

⁷Anyugun le akipon ranitin kela ndahü gwünzin. Anyugun le gunda kekhen anyugun gen kebin gü genyu nra soti, ai temi nme-e anyugun gen tsü khila loho.

⁸“Ale dihontse nhoshüla lo mon, Israel? Ale dihontse nkhela lo tila? Ale Admah ka thyükeshü hontse n nke lalo gwa ole? nmvue Zebolim ka thyükela hontse nge tsonlo ti ole? A nyun le ano tson loho! Ale nkeso le kvusa.

⁹Ale anyuntao shaja pe ntsü loho; Ale Israel nke niloho. Kechamvule ale Sunggigü a-me temi kemvu. Ale Kenshüngü, ale nzen hü nyo. Ale anyuntao nki ryü loho.

¹⁰“A temi dan le ale anyugun shwikerüchün nyu gen shünyho hontse nho keshü ka asithen ryüti. Anyugun le nkhün kipon bin-o whütse aki ryüti.

¹¹Anyugun le Ijipt ki tegü kemhe hontse aki ryüti, lo nsu hontse Assiria kipon ryüti. Ale anyugun zenryüo anyugun kaki shüni lati. Ale Npugü tsü zo laso.”

¹²Npugü le zo, “Israel temi le kenku lo kesa pe ahunla, lo Juda le ketsin lo kenshün Sunggigü ahigü nren binzun.