Read Southern Rengma Naga HOSEA 12 Bible Online

HOSEA 12 - Southern Rengma Naga bible

HOSEA 12

¹Israel temi le lonyü gü kheje keti tha thyü kehü tsüle kenrun lo nke lalo kegwa nti. Anyugun dannyu mekesa lo gwakemvu tho kethyü le chon kenye bin. Anyugun le Assiria zen gwatho lo Ijipt zen-o keha lohü.”

²Npugü le kenkhin jo sen-o Juda nmu nrün le bin; a-le Israel temi le thyü kehü hontse shaja pe a-ko tsüti tse bin. A-le anyugun le thyükela tsü kethun niti.

³Anyugun bon Jakob le a-zenkentsin nnyu kelogü Isau au mihvu nren au jvu gin nyu binketse ka nyu au kenren; a-le peshükelo ka Sunggigü zenkenren--

⁴a-le tsanggelonyu nme zenkenren-o kvulola. A-le chüo zochü hi. Lo Bethel ka Sunggigü le ngun bon Jakob ka ryüo a-zen kenthon.

⁵Tsügü tsüle Kekvutsin Npugü Sunggigü- Npugü tsüle a-le rüshvu nrün zangü.

⁶Tsügenyu Jakob tsipwendan, hagun Sunggigü tenyenlo-o a-ki rani ryülo. Jokezen nyu bin-o joketsin senlo, tson-o hagun Sunggigü no tha thyüshü nrün genyu nyhenhi-o khwenlo.

⁷Npugü le zo, “Israel temi dan le kanan nyu hontse joketsin zomvule; anyugun le kesükü njükemvu süpe anyugun ben ka tha kehei nyu salonyü hü.

⁸Anyun le zo, ‘Ngun le nnya, ngun kapu gwa laso. Ngun le joketsin zomvuo nnya kelo genyu temi nme-e ngun nkhinlo nrün ndi.’

⁹Ai ale Ijipt nyu hagun zenchwi keryü Npugü, hagun Sunggigü, hagun le tehenyhun kemvunyu kehü ka ale hagun ki keryü hontse ale hagun no phika nyu yhun niti.

¹⁰“Ale sidyükezonyu zen kenthon-o tsemi kechon pe anyugun tsüshü, lo sidyükezonyu gen bin-o petsü mvulo keshvu jo pe a temidan tsü.

¹¹Ai Gilead nyu teromen rüshvubin, lo tsüdan rüshvu kehü nyu le siti. Gilgal nyu methutse pe kerüshvu thyübin, lo tsünyu kershvubin dan tsüle phenchvunyu tsothun thyü lati.”

¹²Ngun bon Jakob le Mesopotamia ki tinla, tsünyu tenulo nrün genyu temi nme lothüo a-tanyü nucha.

¹³Npugü le Israel nyu le Ijipt kazü nyu dothyü kebinnyu kenishwi shüo anyugun ntsenlo la nrün genyu sidyükeshanyu nme nishü.

¹⁴Israel temi le Npugü no a-nyunta sala; anyugun thyükezü gü genyu kesi hyulo küla. Anyugun kejokepvü senryüo a-gen keshü genyu Npugü le shaja pe anyugun tsüti.