Read Southern Rengma Naga HOSEA 13 Bible Online

HOSEA 13 - Southern Rengma Naga bible

HOSEA 13

¹Gükela ka Efraim tsipwen le jo zoshülo, Israel tsipwen kechadan le nshvula hü; anyugun le Efraim nrihü. Ai temidan le Baal rüshvu kethyü genyu mula, lo tsügenyu anyugun le silati.

²Anyugun le ntsoka keti tegi pe teromen thyüpe rüshvuo mu hüzun-tsüle- rakagi pe temi nyun ka chwikeryü, temi ben pe zükelo teromen thyühü. Tsüsika anyugun le zohü, “Kerüshvu thyüpe tsüdan tsülo!” Dihontse temi le methutse hontse kethyü teromen kezü nbalo mon!

³Tsügenyu temi hidan le lonyü khüzü hontse hyumvu lati, lonyü nshwe khüzü hontse ndi lati. Anyugun le shyekenyubin nyu tsangkenbu le shyebün whünsen tinkela hontse, lo mah kekhupun nyu mah kekhu hontse lati.

⁴Npugü le zohü, “Ale Npugü hagun Sunggigü, Ijipt nyu hagun zenchwi keryü gü le. Hagun anyeki Sunggigü kecha ndi. A nti le hagun kenikelo gü le.

⁵Ale kazü kesi kesin nyu hagun nuchalo

⁶Ai hagun le kazü kegwa gü nyu yükelo ka hagun le nnyao ketegvülo la, tson-o ketekho lo a nmhinla.

⁷Tsügenyu ale shünyho hontseo hagun whenti. Meren hontseo hagun tson khwen ti.

⁸Ale thyügwen a-nyu nmhen kela hontse hagun when ti, tson-o ale hagun süthü lati. Shünyho hontse a-bin nyu hagun tyü lati, lo tehenthyü hontse hagun süthürü lati.

⁹“Israel temidan, ale hagun nke lati! Tsonlo segü le hagun chelo mon?

¹⁰Hagun le raja lo sharhi hihü nyo, ai anyugun le dihontse hagun senye kenilo tila?

¹¹A nyunkenta nyu ale raja dan pe hagun tsü, lo a nyunkenthün nyu ale tsüdan sen tinla.

¹²“Israel kemu lo thyü kezü le thu pe bin laso, lo thu kenjü dan tsüle ntsen kegwa thyülo laso.

¹³Israel le yhunlo kegwa gwünkho nme le bin, ai pin pe nnyu gü kejü nyugü le ajvü gin nyu chwiryü nyümvu kehü hontse le.

¹⁴Ale kesin kazü nyu temi hidan kenishü loho, nmvue kesigü kekvu nyu anyugun kenishwi shü loho! Kesi, kenpen senryülo! Kesi kazü, kenke zenryülo! Ale temi hidan shwinjün sin loho.

¹⁵Israel le jontsü hontse punbin- e ale npho kipon kazü kesi nyu tsangkenbu kenyün nishüti, tsüle a-zükepenbin lo zülvudan whün nsin lati. Tsüle a-min le kebin aphu sentin lati.

¹⁶Samaria le a ntsun-nren kethyü genyu shaja hyulo mvu loshvu. A-temi le teri nyu siti; nyuhonyu shwen pe kazü nyu jonketa lati, lo tenunyu nyuphou kepvü nyu le a-ginda durhen lati.”