Read Southern Rengma Naga HOSEA 14 Bible Online

HOSEA 14 - Southern Rengma Naga bible

HOSEA 14

¹Israel temidan, Npugü hagun Sunggigü ki niryülo. Hagun kemu genyu hagun pha nsüo nto laso.

²Npugü ki niryüo kehi kethyü higü lope hagun tha hokeshü thyü pe a-tsülo, “Agun kemu aphu jüshülao agun kehi loshüta, tsonlo agun le joshwi shü kenjü hontse nshwen tile.

³Assiria le thame ka-e agun keni loho, lo teri kerudan-e agun nolo nrün ndi. Agun le agun teromen kezü dan ka anyugun le agun Sunggigü letse zoni mvu lati. O Npugü, shwikenjün pe segü kae gü nrün ndi kehünyu hishü lo.”

⁴Npugü le zo, “Ale atemidan zen-o aki niryüti. Ale anyun aphu pe anyugun soti; ale anyugun gen anyunta sin loho.

⁵Ale Israel nyu temi gen kazü kesin nyu tsangkenri hontse ti. Anyugun le nye hontse punti; anyugun le anyugun me tsen nkoti, Lebanon nyu senbin hontse.

⁶Anyugun le a-keshün sen-o rhün loti, lo zegwape oliv bin hontse ti. Anyugun le a-rüngwa pe Lebanon nyu Sedar hontse ti.

⁷Gwengwa anyugun le ale anyugun kentsen hensin yhunti. Anyugun le chwi hontse yhun loti lo vainlow hontse nsha sati. Anyugun le kedasha yhun lo vain hontse nshati. Anyugun le Lebanon ki vainzu hontse a-zen chwiti.

⁸Israel temi le teromen kezü sen-o thame kethyüi binsin mvu lati; Ale anyugun kehi nyüshüo anyugun ntsen loti. Rügula hükemvu senbin hontseo ale anyugun sun loti; Ale anyugun jochü aphu khishü kehü gü.”

⁹Kensü nyu no hinyu nyu thu njüyo shakekho lo, anyugun no tsü pe anyugun nyun nyu shülo nda. Npugü tsondan le njü, lo kemitsin nyu le tsükethen genyu rhün loti, ai kemu nyu le ntolahü, anyugun le tsü shanyümvu kela genyu.