Read Southern Rengma Naga HOSEA 2 Bible Online

HOSEA 2 - Southern Rengma Naga bible

HOSEA 2

¹Tsügenyu npvünyu Israel dan ka, “Sunggigü temi” lo “Npugü le solo laso” tse kolo.

²A nyenyudan, hagun jvü le anu thyüsin mvula, lo ale a-nyepvü thyüsin mvulaso, ai hagun jvu ka zotengelo. A-ka zotenge-o a-no a-keyüla lo keyülachün ketyü nyu ranilo lo.

³A-le nyümvu yatselo, ale a-phiyhünlao a-no a-nnyukelo jon nyü hontse akenben lati. Ale a-thyü pe tehen yhunhü kemvu kazü kesin hontse lati, lo a-le teri silati.

⁴Ale a-nyenyu shwinjün mvu lati; anyugun le kejokemvu keyüla chün ketyü nyenyu. A-le a-npvü zo, “Ale akesonyu, ketyüketsü, lo thyühü lo linen phi, oliv-ter lo zu pe atsü kehünyu ki gü lati.”

⁶Tsügenyu ale tehen tsehü lo chwida khwen pe a-tsonkhin lati.

⁷A-le tin-o a-kesonyu hüti, ai hü loho. A-le a-nyugun füti, ai hyuloho. Tsüsiki a-le hihontse zoti, “Ale anyepvü kerigü ki nigü lati, kechamvule ale himhundyü we ntsoka nyeki gwakvu hüle.”

⁸A-le, chvu, zu, oliv terzü lo Baal tero kerüshvu ka sentin kela rakagi lo suna pe a-ketsü gü tsüle ale letse shalo kemvuiso.

⁹Tsügenyu logvu gwünkho ka ale pe a-ketsü chvü lo zu khinilo lati, lo thyühü lo linen phi a-no ben lotse pe a-ketsüdan-e sentin lati.

¹⁰Ale a-kesonyu mhundyü nyu a-phi yhün lati, lo nme-e akekvu nyu a-keniloha lati.

¹¹Ale shye lo chenkepen ki hokehü lo Sabbath jon rühvu kehü, lo nyünyü genyu keteno kehü jonkentsen aphu khin lati.

¹²Ale a-vainbin lo Kherobindan, a-le a-keso nyu dan kenyü thyükeshü genyu pe a-ketsü letse zokehü tsü nke lati. Ale a-vainlow lo terashala aphu pe tehen yhun kemvubin thyü lati; tehenthyü le tsüdan nke lati.

¹³A-le rünkenyi rope Baal tero rüshvu lo tsominketsen pe a-nthyüpvüo a-kesonyu hütin kela ka anmhinkela gwünkho tsü genyu ale shaja pe a-tsüti. Npugü le zolaso.

¹⁴Tsügenyu ale a-zen-o kazükesiki niyüti; tsünyu ale keso jodan pe a-jvuni loti.

¹⁵Ale a-hon vainlow tsüpe a-tsüni shüo kekevü kazü ketejon gü tsüpe kenrin khenpvü nme thyü lati. A-le a-selo ka Ijipt kazü nyu chwikeryü ka hontse tsü nyu ajo kenishü ti.

¹⁶Tsüselo a-le alope a-nyepvü letse koniti- a-le a lope a-Baal terogü letse kolohoso.

¹⁷Ale a-no Baal zan zoni loho.

¹⁸Tsü gwünkho ka ale tehenthyü lo tegü aphu zen-o kejopen ti, anyugun no atemi nthyüni mvu nrün genyu. Ale kazü gü nyu terikanyü aphu, jenthon lo tholevü aphu khilao atemi no nyun bwe lo nyun kenkhi ndio yhun loti.

¹⁹Israel, ale nlope anu thyüti, Ale ketsin lo joketsin zoti; Ale sozinkehü lo shwikenjün pe nhishüti tson-o nlope kethonthen ahon thyüti.

²⁰Ale zoshwikeshü then-o nlope ahon thyüti, lo nle alope Npugü letse ti.

²¹Tsü gwünkho ka ale atemi Israel kehi thyü shüti. Ale tsangri pe kazü gen shü, lo kazü gü le shye, vainsha lo oliv nsha loti.

²³Ale kazü gü nyu atemi pensoshü lo anyugun no gwakenye loti. Ale keso lope “Somvule” letse kokehü nyu hishüti, lo “Atemi kemvu” letse ko kehü dan gen-e tsonti. Ale zoti, “Hagun le atemi,” lo anyugun le, “Nle agun Sunggigü,” tse zoti.