Read Southern Rengma Naga HOSEA 4 Bible Online

HOSEA 4 - Southern Rengma Naga bible

HOSEA 4

¹Npugü le kazü higü nyu yhunkebin nyu nmu kethyü jo nme le bin. Npugü le zokebin jo nyüshülo, Israel: “Kazü günyu joketsin kesen nmvue keso ndilaso, lo temidan le alope Sunggigü letse mvu laso.

²Anyugun le swe-o gwünrho lahü, anyugun le nku, dushvu, rühu lo keyüla hü nyo. Thyüzükela le chonkvu bin, lo me dushvu zin bin nyo.

³Tsügenyu kazü gü le sin lati, lo tsünyu yhunkebin tha lihie silati. Nyukhu, tegü, lo tsehü-e aphu silati.”

⁴Npugü le zo, “Nme-e no temi dan nmu nmvue tsinrho nya ale hagun Peshükedanyu ge kenya kethyü le bin.

⁵Kheje khentsenyü hagun le zozübin, lo sidyükeshanyu-e hagun nyeki kegwa thyümvu. Ale hagun jvu Israel nke lati.

⁶Atemidan le thyülo binso, kechamvule anyugun le ale tse shahü kemvu genyu. Hagun peshükedanyu le ashalo nyümvu lo asenkethyü khela, tsügenyu ale hagun khela lo hagun nyenyu le adenzin peshükedanyu letse kemvuiso.

⁷“Hagun peshükedanyu le chon kvulo kemu thyüpe a ntsun chon kvu gwünzin, tsügenyu ale hagun kerühvu kelupe kejokepvü thyü shüti.

⁸Hagun le atemi kemu nyu nnyakenye bin nyo, tsügenyu hagun le anyugun no kemu thyüchon kelo hagun kenyü bin laso.

⁹Hagun le temidan shaja hontse hyuloti! Ale shaja pe hagun tsüo hagun no hagun tho gwakemvu thoti.

¹⁰Hagun le kerüshvu tho nyu hagun jün tyüti, tson-e nnyon binti. Hagun le yhun chvukelo tero rüshvuti, tson-e hagun nyenyu nditi, kechamvule hagun le tero kecha rüshvu titseo rani laso.”

¹¹Npugü le zo, “Zu, keshün lo a-when-e tsüpvüo atemi no ntsenkelo thyülo mvu laso!

¹²Anyugun le tesen keshen nme ka thape anyugun teshashü lotse hihü! Thün nme le anyugun le shanyü kebin gü pe zoshü hü! Anyugun le akhelaso. Nyeginyu nme le keyülachün ketyünyu thyütin kela hontse anyugun le anyugun khipe tero kecha tsü laso.

¹³Kazüthun gen bin kenshün dan ka anyugun le kerüshvu tho thyühü, lo rinchodan ki anyugun le senbin kethon lo a-shwakechon le kebin hensin rünkenyi rohü nyo, kechamvule tsüdan sun le nyunyü! “Tsü genyu hagun nyu tenunyu ju le keyüla chün tyü, lo hagun monyu dan ko keyüla tho thyü hü nyo.

¹⁴Ai ale tsügenyu shaja pe anyugun tsü loho, hagun le kerüshvuka nyu keyülachün ketyü nyu zen-o tinla, lo tsüdan zenkerhün-o hagun le tero kecha kerüshvu tho thyü. Thakesha jo nyu zokehü hontse, ‘Thashalo kemvu temi le nke lati.’

¹⁵“Hagun Israel temi le aka joketsin senlo mvula-e, Juda we no tsü hontse thyüzüla nyata, Gilgal nmvue Bethaven ka rüshvu nya, nmvue tsünyu rhünkehü Npugü zan nyu keswe thyü nya.

¹⁶Israel temi le gada nyu nyunkerü hontse. Ale dihontse tanyü nyu le shonphu sütyü kehü hontseo anyugun ginthyü lo mon?

¹⁷Israel temi le teromenkezü kekvu hensin nyu bin laso. Anyugun no anyugun tson nyu gülo.

¹⁸Zu kechon tsükelo sika, anyugun le anyugun keyülachün ketyü thonyu anyugun kenyü tin lao, kerü-hvu gümvuo kejokepvü gü le anyugun kenyü lahü.

¹⁹Anyugun le tsangkenbu le whünsen tinkela hontse lati, tson-o anyugun le terokecha kerüshvu thodan genyu keja lati.