Read Southern Rengma Naga HOSEA 5 Bible Online

HOSEA 5 - Southern Rengma Naga bible

HOSEA 5

¹“Peshükedanyudan, hi nyülo! Nyü petsülo, Israel temidan! Nyülo, hagun raja kamidan! Hagun le joketsin nyu mejün kera zü, tsügenyu jokekera le hagun gen ryüti! Hagun le Mizpah nyu chwa nme thyü, lo Tabor kazüthun gen joh süren keshü nme thyüla.

²Lo Akakia nyida nyu kazü kü thyü, tsü genyu ale shaja pe hagun aphu tsü lati.

³Ale Israel le dihontse kethyüyo sha-- a-le akebu loho. A-le joketsin thyü mvula, lo a-temi le arüshvulo kümvu laso.”

⁴Temidan tho gwakemvu le anyugun no Sunggigü ki rani keryü khin laso. Teromen kerüshvu le anyugun khinsalo laso.

⁵Israel temi ketekho le nrao anyugun ntsun bin nyo. Anyugun kemu le anyugun pha nsüo ntola, lo Juda temidan le anyugun zen-o ntolahü.

⁶Anyugun le tanyü lo senru dan sen-o Npugü kerüshvu tho thyühü, ai tsüle anyugun genyu thame kegwa thyü lomvu. Anyugun le a-hyu loho, a-le anyugun khekela genyu.

⁷Anyugun le Npugü ka joketsin senlomvu laso; anyugun nyenyu le a-hon thyümvula. Tsügenyu anyugun lo anyugun kazüe whütse nke lati.

⁸Gibeah nyu teri shu khun shülo! Rama nyu petsübin kelo khwen thyülo! Bethel nyu teri khwen shwishü! Teri nyu gülo gwün, Benjamin temi dan!

⁹Shaja jon le ryüjü, lo Israel le nke lati. Israel temidan, hile thyütsentsü ti.

¹⁰Npugü le zo, “Ale anyunta hü kechamvule Juda sharhidan le Israel hüo a-ka kazü rühula. Tsügenyu ale zükeda hontse shaja run pe anyugun gen shüti.

¹¹Israel le mele a-kenshwen pvüo kenjün thyübin; a-le a-hon thyülozüsa kethyü kazü nmhen la, kechamvule a-le thame khishülo kehonyu kechefü sintinla.

¹²Ale kenke senryüo Israel gen shü lo Juda bokemhen lati.

¹³“Israel le a-keho hyu lo Juda le a-npvü a-tejünshvu hyu, tsüselo Israel le Assiria ki gü raja kekvugü ka keche hitin la, ai a-le anyugun thyü ngwalomvu nmvue anyugun tejünshvu no pon lomvu.

¹⁴Ale shünyho hontseo Israel lo Juda temi whenti. Ale anyugun süthürü lati, lo anyugun khelati. Ale anyugun süshwi kethyü ka we nme-e anyugun kenilo kegwa ndi lati.

¹⁵“A temidan le anyugun kemu genyu kenjünthyü kekü thyülao afüni ryü kemvuthen ale anyugun khebinti. A nyugun le kenjün kethyü nyu afüti tse soe shalo hole.”