Read Southern Rengma Naga HOSEA 8 Bible Online

HOSEA 8 - Southern Rengma Naga bible

HOSEA 8

¹Npugü le zo, “Kenshvu khwen thyü shülo! Shwikerüchün nyu le logi hontse a kazü gen tsüryü jüso! A temi dan le ale anyugun zen-o kejozenkelo gü gwünrho lo a senkethyü jo ntsun laso.

²Anyugun le alope anyugun Sunggigü letse hü lo anyugun le atemi letse zohü yatse-e,

³anyugun le kegwagü khelaso. Higü genyu shwikerüchünnyu le anyugun hüti.

⁴“A temi dan le anyugun rajadan kejülo, ai anyugun kenda nyu tsü thyü. Anyugun sharhi kejüshü, ai akenda senmvuo thyü. Anyugun suna lo raka khipe teromen züpe anyugun npvü anyugun kenke thyülo.

⁵Ale Samaria nyida nyu temi le rüshvu kethyü suna methutse gü tsü nrhile. Ale anyugun gen anyuntasa bin. Anyugun le teromenkezü kerüshvu khemvuo dithen bin mon?

⁶Israel temi tha kechanyu nme le teromen gü thyüshü, lo tsüle tero ketsin kemvu! Samaria kazü nyu rüshvu kehü suna methutse gü tsü vükho lati.

⁷Anyugun le tsangkenbu yishü, tsangterhi gvuti! Low nyu shye nyünkemvu tsüle chvüsa thyü loho. Lo tsonlo yatse-e, sinrünyi nyu le tsü tyülati.

⁸Israel le senye kechanyu hontse la lo tson-o nnyonla keka senlo kemvui thyülaso.

⁹Israel temi dan le gada nyunkerü gwakemvu hontseo anyugun npvü anyugun tson nyu gü hü. Anyugun le Assiria kipon keche fü titse gü, lo senye kechadan no anyugun nokhin nrün genyu jwe pe tsü laso.

¹⁰Ai ale anyugun khokequenlo-o shaja pe tsüla titse bin laso. Assiria nyu raja le whütse anyugun nshwen ryüla, anyugun khipe kenjün kethyü nyu shü whütse kelai.

¹¹“Israel nyu le kemu khila nrün genyu kershvubin thyüchon lo anyugun le kemu thyü nrün bin le chonkvu!

¹²Ale temidan genyu senkethyü jo swülobukeho thu, ai anyugun le tsü lope shakemvu lo sinrünyi ki nyu tho hontseo khela hü.

¹³Anyugun le kerüshvu thyüpe atsü lo kerüshvu thyü tyühü. Ai Npugü ahigü le anyugun gen akenyümvu, lo ale anyugun kemu rüchün-o tsü genyu shaja pe anyugun tsüti; ale anyugun ni nipe Ijipt ki shü lati!

¹⁴“Israel temidan le rajabin dan thyü, ai anyugun le anyugun nyhunkeshü gü nmhin laso. Juda temidan le nyida chwida kenkodan thyü. Ai ale mah nishüo anyugun rajabin lo nyidadan rolati.”