Read Southern Rengma Naga HOSEA 9 Bible Online

HOSEA 9 - Southern Rengma Naga bible

HOSEA 9

¹Israel temidan, Sunggigü shakemvu nyu hontse keho kethyü dan khelalo. Hagun le hagun Sunggigü kipon rani tinla-o a-ka joketsin senmvu bin laso. Kazü aphu nyu hagun npvü hagun keyülachünketyünyu hontse pe tero Baal ka jwela lo a-le pe hagun tsüle tse rüchün kehü shyegü so tinlaso!

²Ai nmhe satseo hagun le shyeni lo oliv-ter ko kechon ndilati, tson-o vainzu ndi lati.

³Israel temidan le Npugü kazü nyu bin mvu lati, ai Ijipt nyu nigüo Assiria nyu kazü nyu khinkehü ketyüketsü tyütsüti.

⁴Sinrünyidan ki anyugun le vainzu pe Npugü kerüshvu thyülo mvu lati. Anyugun ketyüketsü le temi kesibin nyu tyükelo chvü hontseo tyükelo nyu aphu nrhu lati. Tsüle anyugun kenyon gwünkelo ntiti; tsüdan nme-e lope kerüshvu kanyü hontse sen Npugü Kerushvuka nyu gü loho.

⁵Lo Npugü kerüshvu genyu keho gwünkho le ryülo anyugun le nyu thyü mon?

⁶Kenke le keryü ka temidan le kezenla lo Ijiptdan le tsüdan pe Memphis ka sunla nrün genyu kegwün loti! Anyugun kenya rakagi dan lo gwüngwa anyugun le anyugun ka thyüo bin kehü bindan tsüle tehen lo tsehü le yhunti.

⁷Temidan le hyulo kezü hyulo nrün shaja pe tsü nrün gwünkho le ryü laso. Tsü thyükeshü ka Israel le sha loti! “Sidyükesha higü le nlu laso. Thukeyhun kelo temi gü le nlu laso” tson-o hagun le zohü. Hagun le a nrhisa kechamvu le hagun kemu le gonsa.

⁸Sunggigü le a-temi Israel no petsülo nrün genyu sidyükesha ahigü nishü. Ai ale lihiki güe hagun le tegü kensen hontse a nden. Sunggigü kerüshvuka nyue temidan le sidyükeshagü shwikerüchün nyu thyü laso.

⁹A nyugun le Gibeah ka kethyü hontse, anyugun tho le gwamvu pe keloi thyü mvulaso. Sunggigü le anyugun kemu rüchün bin-o tsügenyu shaja pe anyugun tsüti.

¹⁰Npugü le zo, “Ale Israel hyulo kerika, tsüle tehen nyu vain le senkebin hyukelo hontsele. Ale hagun pvübon nyu hyulo kerika khürosha nshakerigü hyukelo hontse. Ai anyugun le Peor kazüthun ki ryükelo ki we, anyugun le Baal rüshvu tinla, lo anyugun le sokehü tero hontseo kentsükenchen thyü whütsela.

¹¹Israel zankechwi le tegü hontse nyetinla, tson-o nyu nnyu mvula, tenunyu le nyuphou pvü mvula, temi phou pvüsin mvu lati.

¹²Anyugun le ntsenyu zenlo-e ale tsüdan sentin lao nme-e no rhün mvu lati. Ale temi hidan khekela ka anyugun gen kenrin le ryü lati.”

¹³Npugü, mele anyugun nyenyu hüo boshvukethyü ale hyulo gwa.

¹⁴Ale nno temi hidan gen nyu thyü shülo tse hi mon? Anyugun tenunyu no nyuzen kemvui thyü lalo! Anyugun no nyu lüyilo kemvui thyü lalo!

¹⁵Npugü le zo, “Anyugun tha gwakemvu aphu Gilgal ka bin zenlo. Tsü nyu ale anyugun nrhisa so. Lo anyugun tho gwakemvu dan genyu, ale a kazü nyu anyugun hüshwi lati. Ale anyugun so sin mvuso; anyugun sharhi aphu a ntsun nren laso.

¹⁶Israel temidan le senbin a-me sinlao a-sha nsha kemvu hontse laso. Anyugun le nyuzen loho, ai anyugun le zenlo-o, anyuso sahü-e ale boshvu lati.”

¹⁷Ale a-lo thyükehü Sunggigü tsüle a-temi khelati, anyugun le a-khwen nyümvu kela genyu. Anyugun le senyedan nyu nmhon kehü nyu thyü lati.