Read Southern Rengma Naga JOEL 1 Bible Online

JOEL 1 - Southern Rengma Naga bible

JOEL 1

¹Higü hile Npugü le jolo khipe Pethuel nyugü Joel ketsü.

²Hagun peshünyu ju, nyüshü lo; Juda kazü nyu kebin aphu nyülo. Tha hihontse kethyü le hagun bonnyu nmvue hagun gwünkho ka thyü ole?

³Hagun nyenyu ka tsü rüla pe zolo; anyugun le anyenyu ka zoti, tsüdan le shenhe kechagü ka zolo ti.

⁴Tsekhvudan kechacha le hagun low jebin; a-dan nme le khekela gü tsüle dan kechagü le tyüla.

⁵Chonso-o chülo, hagun kenzeü nyu; nralo, hagun zu ketsünyu; vainzu keshün thyülo nrün dan nke laso.

⁶Tsekhvu dan nme le ngun kazü whenlo laso; a-nyugun le kvusa lo sülobu keho; a-nyugun hü le shünyho hüyi kegwa hontse.

⁷Tsüdan le ngun vainyhun nkela lo ngun khürobindan tyübu laso. Tsüdan le a-yhü tsobula a-rodan le chonla kemvuthen.

⁸Chülo, hagun temidan, lünyu nme le a-lo titse kebin peche gü kesi chechü kebin hontse.

⁹Shyeni lo vainzu lope Kerüshvuka nyu rüshvu nrün ndi laso; Peshükedadan le nyugwamvubin, anyugun le thape Npugü rüshvu nrün ndi kela genyu.

¹⁰Low dan le ndo laso, Kazü gü le nyungwamvu laso kechamvu le low nkela, vainsha le tsenla, lo oliv bin le rügu kela genyu.

¹¹Nyunkenjün thyülo, Low ketsünyu; Chülo, vainlow nucha kehüdan, kechamvule thoshe lo barley, ele, shyeni aphu nke laso.

¹²Vain lo khürobin le rügu laso; terasha bin aphu pen-o sila so. Temidan shekerhün le ndiso.

¹³Ronphi ben-o chülo, kershvubin nyu lotho thyü kehü ju! Kerüshvuka nyu güo khünsin chülo! Shyeni nmvue vainzu pe hagun Sunggigü rüshvu nrün ndiso.

¹⁴Nyün nrün ahza hoshülo; temi kokequen shü! Sharhidan lo Juda temi aphu kequen pe Npugü hagun Sunggigü Kerüshvuka nyu shüo a-ka hilo.

¹⁵Npugü jon le khonni laso; Kekvutsin gü le kenke senryü nrün jon gü tsüle. Tsüjon tsü ketetsin kethyü dihontse ryü tiyono!

¹⁶Ngun shyeni nkekela ka ngun keche ndila. Ngun Sunggigü Kerüshvuka nyu shekerhün ndiso.

¹⁷Thatsidan le kazü kesin nyu tenla. Shyeni pe kequen keloi ndila, tsügenyu süsen kenrun dan le renla.

¹⁸Methu dan le kenjünthyüo nhobin, a-nyugun chvu ndikela genyu, tanyü dan-e kenjünthyü binso.

¹⁹Ale chüo nka hibin le, Npugü, kechamvule jonyü lo senbin le silaso, mah le rokela hontseo.

²⁰Tehenthyüe chü nrao nka hibin nle kechamvule rinyu dan-e sinlaso.